നിറച്ചാർത്തണിയിച്ച് ഡൽഹി മലയാളി അസോസിയേഷന്റെ വനിതാ ദിനാഘോഷങ്ങൾ ആർകെ പുരത്തെ ഡിഎംഎ സാംസ്‌കാരിക സമുച്ചയത്തിൽ അരങ്ങേറി

ന്യൂ ഡൽഹി: നിറച്ചാർത്തണിയിച്ച് ഡൽഹി മലയാളി അസോസിയേഷന്റെ വനിതാ ദിനാഘോഷങ്ങൾ ആർകെ പുരത്തെ ഡിഎംഎ സാംസ്‌കാരിക സമുച്ചയത്തിൽ അരങ്ങേറി. 

ഡിഎംഎ പ്രസിഡന്റ് കെ രഘുനാഥിന്റെ അധ്യക്ഷതയിൽ ചേർന്ന സാംസ്‌കാരിക സമ്മേളനം ശ്രേയാ എസ് നായർ ആലപിച്ച പ്രാർത്ഥനാ ഗീതത്തോടെ ആരംഭിച്ചു. മുഖ്യാതിഥിയായി പങ്കെടുത്ത ആർ കെ പുരം എംഎൽഎ അനിൽ കുമാർ ശർമ്മ ഭദ്രദീപം കൊളുത്തി ചടങ്ങുകൾ ഉദ്ഘാടനം ചെയ്‌തു. 

വിശിഷ്ടാതിഥികളായി പങ്കെടുത്ത എൻ.ഐ.പി.എഫ്.പി. പ്രൊഫസർ ലേഖാ എസ് ചക്രബർത്തി, മനോരമ ന്യൂസ് ഡൽഹി റീജിയണൽ ബ്യൂറോ ചീഫ് നിഷാ പുരുഷോത്തമൻ, തില്ലാനാ സ്‌കൂൾ ഓഫ് മ്യൂസിക് & ഡാൻസ്, ഡയറക്ടർ ഡോ നിഷാ റാണി, പ്രമുഖ സംരംഭകയായ രാധികാ നായർ തുടങ്ങിയവർ ആശംസകൾ നേർന്നുകൊണ്ട് സംസാരിച്ചു.  ജനറൽ സെക്രട്ടറി ടോണി കണ്ണമ്പുഴ സ്വാഗതവും പ്രോഗ്രാം കൺവീനറും അഡീഷണൽ ഇന്റെർണൽ ഓഡിറ്ററുമായ ലീനാ രമണൻ നന്ദി പ്രകാശനവും നടത്തി.

മാനവ സേവനത്തിൽ വ്യക്തിമുദ്ര പതിപ്പിച്ച  മഹിളാ രത്നങ്ങളായ ലൂണാ രാജൻ, ജീമോൾ ഷാജി, മിനി രാജൻ, സുജാതാ ഈശ്വർ, ജ്യോതി ആർ പിള്ള, ശൈലജാ അരവിന്ദാക്ഷൻ, രജനി രാജീവ്, അമ്പിളി സതീഷ് എന്നിവരെയും ഡിഎംഎ കേന്ദ്ര നിർവ്വാഹക സമിതിയിലെ വനിതകളേയും ഏരിയകളിലെ വനിതാ വിഭാഗം കൺവീനർമാരെയും, ചെയർമാൻ, സെക്രട്ടറി, ട്രെഷറർ എന്നീ പദവികൾ അലങ്കരിക്കുന്ന വനിതകളെയും ഡിഎംഎ ഓഫീസിലെ വനിതാ സ്റ്റാഫുകളെയും ചടങ്ങിൽ ആദരിച്ചു. കൂടാതെ ഏരിയകളിലെ വനിതാ വിഭാഗം ജോയിന്റ് കൺവീനർമാർക്ക് സമ്മാനങ്ങളും നൽകി ആദരിച്ചു.

ഡിഎംഎയുടെ സ്ത്രീ ശാക്തീകരണ വിഭാഗവും ഇന്ദ്രിയ ജൂവല്ലറിയും വെവ്വേറെ ഒരുക്കിയ ലക്കി ഡ്രോ കൂപ്പണുകളുടെ നറുക്കെടുപ്പും അവയുടെ സമ്മാനങ്ങളും ചടങ്ങിൽ വിതരണം ചെയ്‌തു. 

എയിംസ് ട്രോമാ സെന്ററിലെ അത്യാഹിത വിഭാഗത്തിലെ ജോലിക്കാരിയും ഡിഎംഎ ദ്വാരക ഏരിയയിലെ അംഗവുമായ സിന്ധു ഗോപൻ രചിച്ച 'മിന്നാമിനുങ്ങുകൾ പൂക്കുന്ന മരം' എന്ന പുസ്തകത്തിന്റെ പ്രകാശനവും ചടങ്ങിൽ നിർവഹിച്ചു.

ഡൽഹി പഞ്ചവാദ്യ ട്രസ്റ്റ് അവതരിപ്പിച്ച വാദ്യമേളങ്ങളുടെ അകമ്പടിയോടെ സ്ത്രീ ശാക്തീകരണ വിഭാഗം കൺവീനർ സുജാ രാജേന്ദ്രന്റെ നേതൃത്വത്തിൽ ഡിഎംഎ സാംസ്‌കാരിക സമുച്ചയത്തിലേക്ക് താലപ്പൊലി എഴുന്നെള്ളത്ത് നടത്തി.

തുടർന്ന് ഗുരു രാജി രാജഗോപാലിന്റെ നൃത്ത സംവിധാനത്തിൽ കേന്ദ്രക്കമ്മിറ്റി ഒരുക്കിയ രംഗപൂജയോടെ കലാപരിപാടികൾ ആരംഭിച്ചു. വീണാ എസ് നായരും പി എൻ ഷാജിയുമായിരുന്നു അവതാരകർ.

വസുന്ധരാ എൻക്ലേവ്, മയൂർ വിഹാർ ഫേസ് 3 - ഗാസിപ്പൂർ, ആശ്രം - ശ്രീനിവാസ്‌പുരി, വിനയ് നഗർ - കിദ്വായ് നഗർ, ആർ കെ പുരം, അംബേദ്‌കർ നഗർ - പുഷ്പ് വിഹാർ, മയൂർ വിഹാർ ഫേസ്-2, വികാസ്‌പുരി - ഹസ്തസാൽ, മഹിപാൽപ്പൂർ - കാപ്പസ്ഹേഡാ, ദ്വാരക, മെഹ്റോളി, കാൽക്കാജി എന്നീ ഡിഎംഎയുടെ ഏരിയകൾ അവതരിപ്പിച്ച സ്കിറ്റ്, സിനിമാറ്റിക് ഡാൻസ്, നാടോടി നൃത്തം, സമൂഹ നൃത്തം, സമൂഹ ഗാനം, സെമി സിനിമാറ്റിക് ഫ്യൂഷൻ തുടങ്ങിയ കലാ പരിപാടികൾ വനിതാ ദിനാഘോഷങ്ങൾക്ക് ചാരുതയേകി. വിഭവ സമൃദ്ധമായ അത്താഴ സദ്യയോടെയാണ് ചടങ്ങുകൾ സമാപിച്ചത്.