ദേശതാൽപര്യവും വസ്തുനിഷ്ഠതയും വാർത്തകൾക്ക് അടിസ്ഥാനമെന്ന് ആർ. പ്രസന്നൻ

ഡൽഹി:  വസ്തുതകളും യുക്തിയും ദേശതാൽപര്യവും വാർത്താ റിപ്പോർട്ടിംഗിൽ പ്രധാന പങ്കു വഹിക്കുന്നതായി പ്രമുഖ പത്രപ്രവർത്തകൻ ആർ. പ്രസന്നൻ.

പ്രതിരോധ റിപ്പോർട്ടുകളിൽ ഇന്ത്യയിലെ മാധ്യമങ്ങളും മാധ്യമപ്രവർത്തകരും പക്വത കാട്ടിയിരുന്നെന്നും, എങ്കിലും അടുത്തകാലത്തായി വസ്തുതകൾ മറച്ചുവെക്കാനുള്ള പ്രവണത അധികാരികളുടെ ഭാഗത്ത് കാണുന്നുണ്ടെന്നും അദ്ദേഹം പറഞ്ഞു.

ഗ്ലോബൽ മലയാളി പ്രസ് ക്ലബ്ബ് (ജിഎംപിസി) ഓൺലൈനായി സംഘടിപ്പിച്ച 'വഴികാട്ടികൾ' എന്ന ചർച്ചാ പരിപാടിയിൽ സംസാരിക്കുകയായിരുന്നു അദ്ദേഹം.

കേരള സർക്കാരിൻറെ മാധ്യമ രംഗത്തെ ഉന്നത പുരസ്കാരമായ സ്വദേശാഭിമാനി അവാർഡ് ലഭിച്ച മുതിർന്ന പ്രത്രപ്രവർത്തകനും ഗ്ലോബൽ മലയാളി പ്രസ് ക്ലബ്ബിന്റെ എക്സിക്യൂട്ടിവ് അംഗവുമായ എൻ. അശോകനെ പരിപാടിയിൽ ആദരിച്ചു. മാധ്യമങ്ങളും മാധ്യമപ്രവർത്തകരും സമൂഹത്തിന്റെ വഴികാട്ടികളാണെന്ന് യോഗത്തിൽ വിശിഷ്ട അതിഥിയായി പങ്കെടുത്ത ബെന്നി ബെഹനാൻ എംപി ചൂണ്ടിക്കാട്ടി.

 ഗ്ലോബൽ മലയാളി പ്രസ് ക്ലബ്ബ് പ്രസിഡൻറ് ജോർജ് കള്ളിവയലിൽ അധ്യക്ഷത വഹിച്ചു. ജനറൽ സെക്രട്ടറി കെ.സി. രാജഗോപാൽ സ്വാഗതവും ജോയിൻ്റ് സെക്രട്ടറി ജോസ് കുമ്പിളുവേലിൽ നന്ദിയും പറഞ്ഞു.

മുതിർന്ന പത്രപ്രവർത്തകരായ കെ.പി. നായർ, സോമൻ ബേബി, സണ്ണി സെബാസ്റ്റ്യൻ, ജോൺ മുണ്ടക്കയം, വി.എസ്. രാജേഷ്, അനിൽ അടൂർ, സജീവ് പീറ്റർ,  പി.എം. നാരായണൻ  തുടങ്ങിയവർ പ്രസംഗിച്ചു.  അശോക് കുമാർ, ഉബൈദ് ഇടവന, സനു സിറിയക് തുടങ്ങിയവർ പരിപാടികൾ ഏകോപിപ്പിച്ചു.