പുതുവത്സരം ആഘോഷിക്കാന്‍ റേവ് പാര്‍ട്ടി, നൂറോളം പേര്‍ കസ്റ്റഡിയില്‍; മയക്കുമരുന്ന് പിടികൂടി

താനെ: മഹാരാഷ്ട്രയിലെ താനെയില്‍ റേവ് പാര്‍ട്ടിയെന്നാരോപിച്ച് നൂറോളം പേരെ പൊലീസ് കസ്റ്റഡിയിലെടുത്തു. റെയ്ഡിൽ പാര്‍ട്ടി സംഘടിപ്പിച്ചുവെന്ന് സംശയിക്കുന്ന രണ്ടുപേരെയും പൊലീസ് പിടികൂടിയിട്ടുണ്ട്. താനെ പോലീസിന്റെ ക്രൈംബ്രാഞ്ച് യൂണിറ്റാണ് പുലര്‍ച്ചെ രണ്ട് മണിയോടെ ആരംഭിച്ച ഓപ്പറേഷന് നേതൃത്വം നല്‍കിയത്. പുതുവത്സരാഘോഷങ്ങള്‍ക്ക് മുന്നോടിയായി ഞായറാഴ്ച പുലര്‍ച്ചെയാണ് റെയ്ഡ് നടത്തിയത്.

റെയ്ഡിനിടെ മയക്കുമരുന്ന് ഉപയോഗം സൂചിപ്പിക്കുന്ന എല്‍എസ്ഡി, കഞ്ചാവ് ഉള്‍പ്പെടെ വിവിധ നിയമവിരുദ്ധ വസ്തുക്കള്‍ ഉദ്യോഗസ്ഥര്‍ കസ്റ്റഡിയിലെടുത്തിട്ടുണ്ട്. മയക്കുമരുന്ന് കഴിച്ചുവെന്ന ആരോപണം സ്ഥിരീകരിക്കുന്നതിനായി കസ്റ്റഡിയിലെടുത്തവരുടെ വൈദ്യപരിശോധന നടത്തിവരികയാണ്. ഇതിനായി ഇവരെ താനെ സിവിൽ ആശുപത്രിയിൽ പ്രവേശിപ്പിച്ചു. പാർട്ടി ആസൂത്രണം ചെയ്തത് കൽവ ഡോംബിവാലി സ്വദേശിയാണെന്ന സൂചന ലഭിച്ചിട്ടുണ്ട്. 

മുംബൈയോട് ചേർന്നുള്ള താനെയിലെ ഗോഡ്ബന്ദർ റോഡിലാണ് ഈ റേവ് പാർട്ടി സംഘടിപ്പിച്ചത്. യുവാക്കളെ കൂടാതെ 12 പെൺകുട്ടികളും  പിടിയിലായിട്ടുണ്ട്. പിടിയിലായ യുവാക്കളിൽ ഭൂരിഭാഗവും മയക്കുമരുന്ന് ഉപയോഗിക്കുന്നവരാണെന്നാണ് പൊലീസ് നൽകുന്ന വിവരം.  പാർട്ടിയിൽ പങ്കെടുത്തവരുടെ 19 ഇരുചക്ര വാഹനങ്ങളും പോലീസ് പിടിച്ചെടുത്തിട്ടുണ്ട്.