ഓൾ-ബ്ലാക്ക് തീം' യമഹ എയ്‌റോക്‌സ് 155 മോട്ടോജിപി പതിപ്പ് ഇന്ത്യയിൽ

2022 ഓഗസ്റ്റിൽ, ഇന്ത്യ യമഹ മോട്ടോർ അവരുടെ ഉൽപ്പന്നങ്ങളുടെ പുതിയ മോട്ടോജിപി പതിപ്പ് പുറത്തിറക്കിയിരുന്നു. ഇപ്പോൾ, കമ്പനി എയറോക്സ് 155 ന്റെ മോട്ടോജിപി പതിപ്പ് 1.41 ലക്ഷം രൂപ എക്സ്-ഷോറൂം വിലയില്‍ പുറത്തിറക്കിയിരിക്കുകയാണ് . എയ്‌റോക്‌സ് 155-ന്റെ സ്റ്റാൻഡേർഡ് പതിപ്പിനേക്കാൾ 2,000 രൂപ കൂടുതലാണിത്. യമഹയുടെ മോൺസ്റ്റർ എനർജി മോട്ടോജിപി എം1 മോട്ടോർസൈക്കിളിൽ നിന്ന് പ്രചോദനം ഉൾക്കൊണ്ടാണ് മോട്ടോജിപി പതിപ്പ്.

എയറോക്സ് 155 മോട്ടോജിപി പതിപ്പിലെ മാറ്റങ്ങൾ ബ്യൂട്ടിഫിക്കേഷൻ മാത്രമാണ് എന്നാണ് റിപ്പോര്‍ട്ടുകള്‍. നീലയും പച്ചയും ഹൈലൈറ്റുകളുള്ള ഓൾ-ബ്ലാക്ക് തീമിലാണ് സ്കൂട്ടർ പൂർത്തിയാക്കിയിരിക്കുന്നത്. മുൻവശത്തെ മഡ്ഗാർഡ്, സൈഡ് പാനലുകൾ, പിൻ പാനലുകൾ, വിസർ, ഫ്രണ്ട് ഏപ്രൺ എന്നിവയിൽ മോൺസ്റ്റർ എനർജി ഡിക്കലുകളാണുള്ളത്. ബാക്കിയുള്ള സ്കൂട്ടർ സാധാരണ പതിപ്പിന് സമാനമാണ്. ഇപ്പോൾ എയറോക്സ് 155 നാല് നിറങ്ങളിൽ ലഭ്യമാണ്. മെറ്റാലിക് ബ്ലാക്ക്, റേസിംഗ് ബ്ലൂ, ഗ്രേ വെർമില്യൺ, മോൺസ്റ്റർ എനർജി മോട്ടോജിപി എഡിഷൻ എന്നിവയുണ്ട്.

മെക്കാനിക്കലി, അത് അതേപടി തുടരുന്നു. അതിനാൽ, R15 ൽ നിന്ന് ഉരുത്തിരിഞ്ഞ 155 സിസി, ലിക്വിഡ്-കൂൾഡ് എഞ്ചിൻ ഉണ്ട്. ഇത് പരമാവധി 14.79 bhp കരുത്തും 13.9 Nm ടോര്‍ക്കും ഉത്പാദിപ്പിക്കുന്നു. ഇത് സിവിടി ഓട്ടോമാറ്റിക് ട്രാൻസ്മിഷനുമായി ഘടിപ്പിച്ചിരിക്കുന്നു. ട്യൂബ്‌ലെസ് ടയറുകളുള്ള 14 ഇഞ്ച് അലോയി വീലുകളാണ് എയ്‌റോക്‌സ് 155-ൽ ഉപയോഗിച്ചിരിക്കുന്നത്. മുൻവശത്തെ ടയർ 110/80 ആണ്, പിന്നിൽ 140/70 ആണ്. മുന്നിൽ 230 എംഎം ഡിസ്‌ക്കും പിന്നിൽ 130 എംഎം ഡ്രം ബ്രേക്കുമാണ് ബ്രേക്കിംഗ് ഡ്യൂട്ടി ചെയ്യുന്നത്. മുൻ ബ്രേക്കിൽ സിംഗിൾ-ചാനൽ ആന്റി-ലോക്ക് ബ്രേക്കിംഗ് സംവിധാനവും ഉണ്ട്.

ഫ്രണ്ട് ടെലിസ്‌കോപ്പിക് ഫോർക്കുകളും പിന്നിൽ ഡ്യുവൽ ഷോക്ക് അബ്‌സോർബറുകളുമാണ് ഫ്രെയിം സസ്പെൻഡ് ചെയ്‍തിരിക്കുന്നത്. ഫീച്ചറുകളുടെ കാര്യത്തിൽ, എൽഇഡി ഡെയ്‌ടൈം റണ്ണിംഗ് ലാമ്പുകളുള്ള എൽഇഡി ഹെഡ്‌ലാമ്പ്, എൽഇഡി ടെയിൽ ലാമ്പ്, ഫ്രണ്ട് പോക്കറ്റ്, മൊബൈൽ ഉപകരണങ്ങൾ ചാർജ് ചെയ്യുന്നതിനുള്ള യുഎസ്ബി സോക്കറ്റ്, 24.5 ലിറ്റർ ബൂട്ട് സ്പേസ്, മൾട്ടി-ഫംഗ്ഷൻ കീ സ്വിച്ച് എന്നിവയുമായാണ് എയറോക്സ് 155 വരുന്നത്. ഒരു ബാഹ്യ ഇന്ധന ലിഡും വാഹനത്തില്‍ ഉണ്ട്. ബോഡി കവർ, എൽഇഡി ഫ്ലാഷർ, സീറ്റ് കവർ, നക്കിൾ ഗാർഡുകൾ, സീറ്റ് കവർ, സ്‌പോർട്‌സ് സ്‌ക്രീൻ സ്‌മോക്ക്, വിസർ ട്രിം കാർബൺ തുടങ്ങിയ ആക്‌സസറികളും ഈ വാഹനത്തില്‍ ഉണ്ട്.