ടർബോ പെട്രോൾ എഞ്ചിനോടുകൂടിയ ഷൈൻ വേരിയന്റിനെ അവതരിപ്പിച്ച് സിട്രോൺ

കഴിഞ്ഞ മാസം, ഷൈൻ, ഷൈൻ വൈബ് പാക്ക്, ഷൈൻ എന്നീ നാല് പതിപ്പുകളിൽ സി3 ഹാച്ചിന് പുതിയ ടോപ്പ്-ഓഫ്-ലൈൻ ഷൈൻ ട്രിം ലഭിച്ചു. ഡ്യുവൽ ടോൺ, വൈബ് പാക്കിനൊപ്പം ഷൈൻ ഡ്യുവൽ ടോൺ. ഈ വേരിയന്റ് നാച്ച്വറലി ആസ്പിറേറ്റഡ് എഞ്ചിനിൽ മാത്രമേ ലഭ്യമായിരുന്നുള്ളൂ. ഇപ്പോഴിതാ, ടർബോ പെട്രോൾ എഞ്ചിനോടുകൂടിയ ഷൈൻ വേരിയന്റിനെ അവതരിപ്പിച്ചിരിക്കുകയാണ് സിട്രോൺ.

C3 ടർബോ ഷൈൻ ട്രിം മൈ സിട്രോൺ കണക്ട് ആപ്പ്, പുതിയ ഫീച്ചറുകൾ, മെച്ചപ്പെടുത്തിയ സുരക്ഷാ ഫീച്ചറുകൾ എന്നിവയോടെയാണ് വരുന്നത്. പുതിയ C3 ടർബോ ഷൈൻ ഡ്യുവൽ ടോൺ, ഡ്യുവൽ ടോൺ വൈബ് പാക്ക് എന്നിങ്ങനെ രണ്ട് പതിപ്പുകളിൽ ലഭ്യമാണ്. യഥാക്രമം 8.80 ലക്ഷം രൂപയും 8.92 ലക്ഷം രൂപയുമാണ് ഇവയുടെ വില. ടർബോ ഫീൽ ഡ്യുവൽ ടോൺ & ഫീൽ ഡ്യുവൽ ടോൺ വൈബ് പാക്കിന് യഥാക്രമം 8.28 ലക്ഷം രൂപയും 8.43 ലക്ഷം രൂപയുമാണ് വില.

110bhp കരുത്തും 190Nm ടോര്‍ക്കും ഉത്പാദിപ്പിക്കുന്ന ജെൻ III പ്യുവര്‍ടെക്ക് 1.2L 3-സിലിണ്ടർ ടർബോ പെട്രോൾ എഞ്ചിനാണ് സിട്രോണ്‍ സി3 ടർബോ ഷൈൻ വേരിയന്റിന് കരുത്തേകുന്നത്. 6 സ്പീഡ് മാനുവൽ ഗിയർബോക്‌സ് വഴിയാണ് മുൻ ചക്രങ്ങളിലേക്ക് പവർ കൈമാറുന്നത്. 82 ബിഎച്ച്‌പിയും 115 എൻഎം ടോർക്കും നൽകുന്ന 1.2 എൽ എൻഎ പെട്രോൾ എഞ്ചിനുമായാണ് ബി-ഹാച്ചിന്റെ വരവ്. ഇത് 5-സ്പീഡ് മാനുവൽ ഗിയർബോക്സിൽ ലഭ്യമാണ്. C3 ടർബോ, നോൺ-ടർബോ വേരിയന്റുകൾ 19.3kmpl എന്ന എആർഎഐ സാക്ഷ്യപ്പെടുത്തിയ ഇന്ധനക്ഷമത വാഗ്ദാനം ചെയ്യുമെന്ന് കമ്പനി അവകാശപ്പെടുന്നു.

ഇഎസ്പി (ഇലക്‌ട്രോണിക് സ്റ്റെബിലിറ്റി പ്രോഗ്രാം), ഹിൽ-ഹോൾഡ് അസിസ്റ്റ്, ടയർ പ്രഷർ മോണിറ്ററിംഗ് സിസ്റ്റം (ടിപിഎംഎസ്), എഞ്ചിൻ സ്റ്റാർട്ട്/സ്റ്റോപ്പ് എന്നിവ ഉൾപ്പെടുന്ന അഡ്വാൻസ്ഡ് സേഫ്റ്റി സ്യൂട്ട് ഉൾപ്പെടെ 13 പുതിയ ഫീച്ചറുകളുമായാണ് ടോപ്-എൻഡ് ഷൈൻ വേരിയന്റ് വരുന്നത്. ഫീച്ചർ ലിസ്റ്റിൽ വൈദ്യുതപരമായി ക്രമീകരിക്കാവുന്ന ഓആര്‍വിഎം, പിൻ പാർക്കിംഗ് ക്യാമറ, ഡേ/നൈറ്റ് ഐആര്‍വിഎം, 15 ഇഞ്ച് ഡയമണ്ട് കട്ട് അലോയ്‌കൾ, ഫ്രണ്ട് ഫോഗ് ലാമ്പുകൾ, റിയർ സ്‌കിഡ് പ്ലേറ്റുകൾ, റിയർ വൈപ്പർ & വാഷർ, റിയർ ഡീഫോഗർ എന്നിവ ഉൾപ്പെടുന്നു. സിട്രോയിന്റെ കണക്റ്റിവിറ്റി 1.0 പ്ലാനിന്റെ ഭാഗമായി 35 സ്‌മാർട്ട് കണക്റ്റിവിറ്റി ഫീച്ചറുകളുള്ള മൈ സിട്രോൺ കണക്ട് ആപ്പും ഇതിലുണ്ട്.

അതേസമയം സിട്രോണ്‍ സി3 എയര്‍ക്രോസ് എസ്‍യുവി അടുത്തിടെയാണ് കമ്പനി അവതരിപ്പിച്ചത്. ഫ്രഞ്ച് വാഹന നിർമ്മാതാക്കളുടെ ഇന്ത്യയിലെ നാലാമത്തെ ഓഫറാണിത്. ഇവിടെ ഹ്യുണ്ടായ് ക്രെറ്റ, കിയ സെൽറ്റോസ്, മാരുതി സുസുക്കി ഗ്രാൻഡ് വിറ്റാര, ടൊയോട്ട ഹൈറൈഡർ തുടങ്ങിയ കാറുകൾക്കെതിരെ ഈ മോഡല്‍ മത്സരിക്കും. പുതിയ സിട്രോണ്‍ സി3 എയര്‍ക്രോസ് എസ്‍യുവി അഞ്ച്, ഏഴ് സീറ്റ് കോൺഫിഗറേഷൻ ഓപ്ഷനുകളോടെയാണ് വാഗ്‍ദാനം ചെയ്യുന്നത്. 2023-ന്റെ രണ്ടാം പകുതിയോടെ അതിന്റെ വിപണി ലോഞ്ച് നടക്കും.