ഈ പിറന്നാളിന് ഇരട്ടി മധുരം; കാപ്പയുടെ സെറ്റില്‍ പിറന്നാള്‍ ആഘോഷിച്ച് അപര്‍ണ ബാലമുരളി

ദേശീയ പുരസ്‌ക്കാര നിറവില്‍ ഏറെ അഭിമാനങ്ങളുടേയും പ്രതീക്ഷകളുടേയും ഇരട്ടി മധുരത്തിലാണ് അപര്‍ണയുടെ ഈ വര്‍ഷത്തെ പിറന്നാളാഘോഷം. ഷൂട്ടിംഗ് ലൊക്കേഷനില്‍ നില്‍ക്കുമ്പോഴായിരുന്നു ദേശീയ അവാര്‍ഡ് ലഭിക്കുന്നത് ആ സന്തോഷം ആഘോഷിക്കുന്നതും.

ഇപ്പോള്‍ പിറന്നാളാഘോഷിക്കുന്നതും ലൊക്കേഷനില്‍ തന്നെയാണ്. പൃഥ്വിരാജും ഷാജി കൈലാസും ഒന്നിക്കുന്ന ഏറ്റവും പുതിയ ചിത്രമാണ് കാപ്പ. അപര്‍ണ ബാലമുരളിയാണ് ഈ ചിത്രത്തില്‍ നായികയായി എത്തുന്നത്. അപര്‍ണയുടെ ജന്മദിനം ഇന്നാണെന്നറിഞ്ഞതോടെ കേക്ക് മുറിച്ചും സദ്യ വിളമ്പിയുമാണ് അണിയറ പ്രവര്‍ത്തകര്‍ പിറന്നാള്‍ ആഘോഷമാക്കിയത്.

തിരുവനന്തപുരത്തെ ലോക്കല്‍ ഗുണ്ടകളുടെ പശ്ചാത്തലത്തിലാണ് കാപ്പയുടെ കഥ പറയുന്നത്. ചിത്രത്തിലെ പൃഥ്വിരാജിന്റെ ലുക്കും കൊട്ടമധു എന്ന കഥാപാത്രവും ഇതിനോടകം തന്നെ സോഷ്യല്‍ മീഡിയകളില്‍ ശ്രദ്ധ നേടിയിരുന്നു. പൃഥ്വിരാജിനെയും അപര്‍ണയെയും കൂടാതെ ആസിഫ് അലി, അന്ന ബെന്‍ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ദിലീഷ് പോത്തന്‍, ജഗദീഷ്, നന്ദു എന്നിവരും ചിത്രത്തിന്റെ താരനിരയില്‍ ഉണ്ട്.

സംവിധായകന്‍ ഷാജി കൈലാസ്, ഛായാഗ്രാഹകന്‍ ജോമോന്‍ ടി ജോണ്‍, ദിലീഷ് നായര്‍, ജി ആര്‍ ഇന്ദുഗോപന്‍, നിര്‍മാതാവ് ടോള്‍വിന്‍ കുര്യാക്കോസ് , അപര്‍ണയുടെ അമ്മ തുടങ്ങിവരൊക്കെ പിറന്നാള്‍ ആഘോഷത്തില്‍ പങ്കെടുത്തു. കുറച്ചു ദിവസങ്ങള്‍ക്ക് മുന്‍പായിരുന്നു അപര്‍ണ കാപ്പയുടെ ഭാഗമായത്. പൃഥ്വിരാജിനൊപ്പം ഇതാദ്യമായാണ് അപര്‍ണ ബാലമുരളി എത്തുന്നത്.

ജിനു വി ഏബ്രഹാം, ഡോള്‍വിന്‍ കുര്യാക്കോസ് ദിലീഷ് നായര്‍ എന്നിവരുടെ പങ്കാളിത്തത്തില്‍ ആരംഭിച്ച തിയ്യേറ്റര്‍ ഓഫ് ഡ്രീംസ്, ഫെഫ്ക റൈറ്റേഴ്‌സ് യൂണിയന്റെ സഹകരണത്തില്‍ നിര്‍മ്മിക്കുന്ന ചിത്രമാണ് കാപ്പ. ഇന്ദുഗോപന്റെ പ്രശസ്ത നോവലായ ശങ്കുമുഖിയെ അടിസ്ഥാനപ്പെടുത്തിയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഇന്ദുഗോപന്‍ തന്നെയാണ് ചിത്രത്തിന്റെ രചനയും നിര്‍വഹിക്കുന്നത്.