ദിവസവും മുട്ട കഴിക്കുന്നത് നല്ലതാണോ? ആഴ്ചയിൽ എത്ര മുട്ട കഴിക്കാം?

മുട്ട അമിതമായി കഴിക്കുന്നത് കൊളസ്ട്രോൾ കൂടാൻ കാരണമാകുമെന്ന് ആരോഗ്യവിദ​ഗ്ധരടക്കം പറയാറുണ്ട്. എന്നാൽ പ്രോട്ടീനും വൈറ്റമിൻ ഡിയും കോളൈൻ പോലുള്ള പോഷകങ്ങളും അടങ്ങിയ മുട്ട സമീകൃത ആഹാരമാണെന്നും നമുക്കറിയാം. എന്നാൽ ദിവസവും മുട്ട കഴിക്കുന്നത് നല്ലതാണോ? ആഴ്ചയിൽ എത്ര മുട്ട കഴിക്കാം? ഈ സംശയങ്ങൾക്കുള്ള ഉത്തരമാണ് പുതിയ പഠനം. ‌

‌‌

ആഴ്ചയിൽ അഞ്ചോ അതിലധികമോ മുട്ട കഴിക്കുന്നത് ഹൃദ്രോഗം, പ്രമേഹം, ഉയർന്ന രക്ത സമ്മർദം എന്നിവയുടെ സാധ്യത കുറയ്ക്കുമെന്നാണ് പുതിയ ചില പഠനങ്ങൾ പറയുന്ന്. അഞ്ചോ അതിലധികമോ മുട്ട കഴിക്കുന്നത് രക്തത്തിലെ പഞ്ചസാരയെയോ രക്തസമ്മർദത്തെയോ പ്രതികൂലമായി ബാധിക്കില്ലെന്നാണ് ന്യൂട്രിയന്റ്സ് ജേണലിൽ പ്രസിദ്ധീകരിച്ച പഠനം പറയുന്നത്. പരിമിതമായ തോതിൽ മുട്ട കഴിക്കുന്നതാണ് സുരക്ഷിതമെന്ന് അമേരിക്കൻ ഹാർട്ട് അസോസിയേഷൻ ഉൾപ്പെടെയുള്ള ആരോഗ്യ സംഘടനകളും പറയുന്നുണ്ട്.

അതേസമയം മുട്ട കൊളസ്ട്രോളിലും ട്രൈഗ്ലിസറൈഡ് തോതിലും ചെലുത്തുന്ന സ്വാധീനം ഈ ഗവേഷണങ്ങൾ പരിശോധിച്ചിട്ടില്ലെന്ന ചില വിമർശനങ്ങളും ഉയരുന്നുണ്ട്. രക്തസമ്മർദവും പ്രമേഹ സാധ്യതകളും മാത്രം പരിഗണിച്ചാണ് മുട്ട ഹൃദയത്തിന് നല്ലതാണെന്ന് ഈ പഠനങ്ങൾ പറയുന്നത്.