ടൊവീനോ തോമസ് ചിത്രം 'മിന്നൽ മുരളി'യുടെ ട്രെയ്‌ലർ റെക്കോർഡുകൾ തകർത്ത് മുന്നേറുന്നു

ടൊവീനോ തോമസ് നായകനാകുന്ന ബിഗ് ബജറ്റ് ചിത്രം 'മിന്നൽ മുരളി'യുടെ ട്രെയ്‌ലർ റെക്കോർഡുകൾ തകർത്ത് മുന്നേറുന്നു. റിലീസ് ചെയ്ത് 23 മണിക്കൂർ കഴിയുമ്പോൾ യുട്യൂബിൽ അറുപത്തിയൊന്ന് ലക്ഷം കാഴ്ചക്കാരുമായി മിന്നൽ‌ വേഗത്തിലാണ് ട്രെയ്‌ലർ എത്തുന്നത്. ഇതിനോടകം അഞ്ച് ലക്ഷത്തിനടുത്ത് ആൾക്കാർ ട്രെയ്‌ലർ ലൈക്ക് ചെയ്തു.

ചിത്രം ഡിസംബർ 24ന് നെറ്റ്ഫ്ലിക്സിലൂടെ ലോകമൊട്ടാകെ റിലീസ് ചെയ്യും. ചിത്രത്തിൽ ജയ്സൺ എന്ന കഥാപാത്രമായാണ് ടൊവീനോ എത്തുന്നത്. ഇടിമിന്നലേറ്റ് അസാധാരണ ശക്തി കൈവരിച്ച ജയ്സൺ സൂപ്പർ ഹീറോ ആയി മാറുന്നതാണ് കഥ. തൊണ്ണൂറുകളിൽ നടക്കുന്ന സംഭവമാണ് സിനിമയുടെ കഥാപശ്ചാത്തലം.വീക്കെൻഡ് ബ്ലോക്ക്‌ ബസ്റ്റേഴ്സിന്റെ ബാനറിൽ സോഫിയ പോൾ നിർമിച്ച ചിത്രം ബേസിൽ ജോസഫ് സംവിധാനം ചെയ്യുന്നു.

സൂപ്പര്‍ഹിറ്റ് ചിത്രം 'ഗോദ'യക്കു ശേഷം ടൊവിനോ തോമസും ബേസിൽ ജോസഫും ഒരുമിക്കുന്ന ചിത്രംകൂടെയാണ് മിന്നൽ മുരളി. മലയാളം, തമിഴ്, തെലുങ്ക്, ഹിന്ദി എന്നിങ്ങനെ നാല് ഭാഷകളിലാണ് ചിത്രം ഒരുങ്ങുന്നത്.മിസ്റ്റര്‍ മുരളിയെന്നാണ് ഹിന്ദി പതിപ്പിന്റെ പേര്. മെരുപ്പ് മുരളിയെന്ന് തെലുങ്ക് പതിപ്പിനും മിഞ്ചു മുരളിയെന്ന് കന്നഡ പതിപ്പിനും പേരിട്ടിരിക്കുന്നു. അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. അരുൺ അനിരുദ്ധൻ, ജസ്റ്റിൻ മാത്യു എന്നിവരാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്.

സമീര്‍ താഹിര്‍ ആണ് ഛായാഗ്രഹണം. സംഗീതം ഷാന്‍ റഹ്മാന്‍. ചിത്രത്തിലെ രണ്ട് വമ്പൻ സംഘട്ടനങ്ങൾ സംവിധാനം ചെയ്യുന്നത് ബാറ്റ്മാൻ, ബാഹുബലി, സുൽത്താൻ തുടങ്ങിയ ചിത്രങ്ങൾക്ക് പിന്നിൽ പ്രവർത്തിച്ച വ്ളാഡ് റിംബർഗാണ്. വിഎഫ്എക്സിന് ഏറെ പ്രാധാന്യമുള്ള ചിത്രത്തിന്റെ വിഎഫ്എക്‌സ് സൂപ്പർവൈസര്‍ ആൻഡ്രൂ ഡിക്രൂസ് ആണ്. മനു ജഗദ് ആണ് കലാസംവിധാനം.