ഇനി മുതല്‍ എംഎല്‍എമാര്‍ക്ക് ഒരു ടേം പെന്‍ഷന്‍ മാത്രം; പഞ്ചാബിലെ പെന്‍ഷന്‍ രീതികള്‍ പൊളിച്ചെഴുതി ആം ആദ്മി സര്‍ക്കാര്‍; ഖജനാവില്‍ വന്‍ ലാഭം

ചണ്ഡീഗഡ്: എംഎല്‍എമാരുടെ പെന്‍ഷന്‍ ഫോര്‍മുലയില്‍ മാറ്റം വരുത്തി പഞ്ചാബിലെ ആം ആദ്മി സര്‍ക്കാര്‍. ഇനി മുതല്‍ എംഎല്‍എമാര്‍ക്ക് ഒരു ടേം പെന്‍ഷന്‍ മാത്രമായിരിക്കും ലഭിക്കുകയെന്ന് മുഖ്യമന്ത്രി ഭഗവന്ത് മാന്‍ പറഞ്ഞു.

എം‌എൽ‌എ പെൻഷനുകൾക്കായി ചെലവഴിക്കുന്ന ആയിരക്കണക്കിന് കോടി രൂപ ഇനി പഞ്ചാബിലെ ജനങ്ങൾക്ക് പ്രയോജനപ്പെടുമെന്ന് മാൻ തന്റെ ട്വിറ്റർ അക്കൗണ്ടിലൂടെ പറഞ്ഞു.

''സംസ്ഥാനത്തെ തൊഴിലില്ലായ്മ വലിയൊരു പ്രശ്നമാണ്. എല്ലാ ആൺകുട്ടികളും പെൺകുട്ടികളും ഉന്നത ബിരുദങ്ങൾ നേടുന്നു, പക്ഷേ അവർക്ക് അവരുടെ വീടുകളിലേക്ക് മടങ്ങേണ്ടിവരുന്നു. ആ ബിരുദങ്ങളുടെ അടിസ്ഥാനത്തിൽ ജോലി അന്വേഷിക്കുമ്പോൾ ലാത്തിയടി കിട്ടുന്നു..എന്നാൽ ജോലി ലഭിക്കുന്നില്ല. ഈ ദിശയിൽ ഞങ്ങൾ വലിയ ചുവടുകൾ എടുക്കുകയാണ്," മാൻ പറഞ്ഞു.

ജനങ്ങളെ സേവിക്കാനാണ് രാഷ്ട്രീയ നേതാക്കൾ കൂപ്പുകൈകളോടെ വോട്ട് തേടുന്നതെന്നും അദ്ദേഹം പറഞ്ഞു. എന്നാൽ, പല എംഎൽഎമാരും മൂന്നോ നാലോ അഞ്ചോ തവണ വിജയിച്ചതിന് ശേഷവും ലക്ഷക്കണക്കിന് രൂപ പെൻഷനായി വാങ്ങുന്നു. അലവൻസ് വെട്ടിക്കുറയ്ക്കാനും തീരുമാനിച്ചതായി അദ്ദേഹം വ്യക്തമാക്കി.