ഗുജറാത്തില്‍ ആം ആദ്മി പാര്‍ട്ടിക്ക് തലവേദന; എംഎല്‍എമാര്‍ ബിജെപിയില്‍ ചേരാന്‍ നീക്കം നടത്തുന്നുവെന്ന് റിപ്പോര്‍ട്ടുകള്‍

ഗാന്ധിനഗര്‍: ഗുജറാത്ത് നിയമസഭാ തിരഞ്ഞെടുപ്പില്‍ അഞ്ച് സീറ്റുകളില്‍ വിജയിച്ച് സാന്നിധ്യം അറിയിച്ച ആം ആദ്മി പാര്‍ട്ടിക്ക് പുതിയ തലവേദന. എംഎല്‍എമാര്‍ ബിജെപിയില്‍ ചേരാന്‍ ശ്രമിക്കുന്നുവെന്ന റിപ്പോര്‍ട്ടുകളാണ് പാര്‍ട്ടിക്ക് തലവേദന സൃഷ്ടിക്കുന്നത്.

ജുനഗഡ് ജില്ലയിലെ വിസാവാദർ മണ്ഡലത്തിൽനിന്നു ജയിച്ച എഎപി എംഎൽഎ ഭൂപത് ഭയാനി ഉടന്‍ ബിജെപിയില്‍ ചേരുമെന്നാണ് റിപ്പോര്‍ട്ട്. "ജനങ്ങളുടെ അഭിപ്രായം" സ്വീകരിക്കുമെന്നായിരുന്നു ഭയാനിയുടെ പ്രതികരണം. "ഞാൻ ബിജെപിയിൽ ചേർന്നിട്ടില്ല... ബിജെപിയിൽ ചേരണോ വേണ്ടയോ എന്ന് ഞാൻ ജനങ്ങളോട് ചോദിക്കും," ഒരു ദേശീയ മാധ്യമത്തിന്‌ നൽകിയ പ്രത്യേക അഭിമുഖത്തിൽ ഭയാനി പറഞ്ഞു.

"ഗുജറാത്തിലെ ജനങ്ങൾ നരേന്ദ്ര മോദിക്കും ബി.ജെ.പി.ക്കും റെക്കോർഡ് ജനവിധിയാണ് നൽകിയത്. ഞാൻ അത് ബഹുമാനിക്കുന്നു... ഞാൻ നേരത്തെ ബി.ജെ.പിയോടൊപ്പമായിരുന്നു, നേതാക്കളുമായി നല്ല ബന്ധമുണ്ട്," ഭൂപത് ഭയാനി പറഞ്ഞു.

നേരത്തെ ബിജെപിയിൽ ഉണ്ടായിരുന്ന ഭയാനി വിമതനായി എഎപിയിൽ ചേരുകയായിരുന്നു. ജുനഗഡ് ജില്ലയിലെ വിസാവാദർ മണ്ഡലത്തിൽ നിന്നുള്ള തന്റെ വിജയത്തിന് കാരണം ബിജെപി എംഎൽഎ എന്ന നിലയിലുള്ള പ്രവർത്തനമാണ്. ജനങ്ങൾക്ക് എന്നെ അറിയാമെന്നും അദ്ദേഹം കൂട്ടിച്ചേർത്തു.

കൂറുമാറ്റ നിരോധന നിയമം പ്രാബല്യത്തിൽ വരാനുള്ള സാധ്യതയെക്കുറിച്ച് ചോദിച്ചപ്പോൾ ഭയാനി അത് തള്ളിക്കളഞ്ഞു. ഇന്ത്യ ഒരു ജനാധിപത്യ രാജ്യമാണെന്നും ജനങ്ങൾക്ക് വേണ്ടി പ്രവർത്തിക്കുന്നത് തന്റെ അവകാശമാണെന്നും അദ്ദേഹം പറഞ്ഞു.

ബയാദ്, ധനേര, വഗോഡിയ എന്നിവിടങ്ങളിൽ നിന്നുള്ള മൂന്ന് സ്വതന്ത്ര എംഎൽഎമാരും വൻ ഭൂരിപക്ഷത്തോടെ സംസ്ഥാനത്ത് ഏഴാം തവണയും വിജയിച്ച ബിജെപിയെ പിന്തുണയ്ക്കാൻ സാധ്യതയുണ്ടെന്ന് വൃത്തങ്ങൾ സൂചിപ്പിച്ചു.

ആം ആദ്മി പാർട്ടിക്ക് അഞ്ച് സീറ്റുകൾ മാത്രമാണ് നേടാനായത്. പ്രധാന നേതാക്കളായ സംസ്ഥാന അധ്യക്ഷൻ ഗോപാൽ ഇറ്റാലിയ, പാട്ടിദാർ നേതാവ് അൽപേഷ് കത്തിരിയ, മുഖ്യമന്ത്രി സ്ഥാനാർഥി ഇസുദൻ ഗധ്വി എന്നിവരെല്ലാം പരാജയപ്പെട്ടു.