ആലപ്പുഴയില്‍ രണ്ടിടങ്ങളിലായി മൂന്ന് കിലോയിലധികം കഞ്ചാവ്. അന്യസംസ്ഥാനതൊഴിലാളി ഉള്‍പ്പെടെ മൂന്ന് യുവാക്കള്‍ അറസ്റ്റില്‍

ആലപ്പുഴ: ആലപ്പുഴയില്‍ രണ്ടിടങ്ങളിലായി മൂന്ന് കിലോയിലധികം കഞ്ചാവുമായി മൂന്ന് പേരെ അറസ്റ്റ് ചെയ്‌തെന്ന് എക്‌സൈസ് അറിയിച്ചു. 

കുത്തിയതോട് ബസ് കാത്തിരിപ്പ് കേന്ദ്രത്തില്‍ 1.235 കിലോഗ്രാം കഞ്ചാവുമായി നിന്ന എറണാകുളം സ്വദേശികളായ രണ്ട് പേരെ പിടികൂടി. മഹേഷ് (35 വയസ്), അഫ്‌സല്‍ അബ്ദു (28 വയസ്) എന്നിവരാണ് പിടിയിലായത്. 

കുത്തിയതോട് എക്‌സൈസ് ഇന്‍സ്‌പെക്ടര്‍ പി സി ഗിരീഷിന്റെ നേതൃത്വത്തിലാണ് ഇരുവരെയും പിടികൂടിയത്. എറണാകുളം ജില്ലാ പൊലീസ് കാപ്പ ചുമത്തിയ പ്രതികളാണ് ഇവര്‍.

കായംകുളത്ത് രണ്ട് കിലോഗ്രാം കഞ്ചാവുമായി ബീഹാര്‍ സ്വദേശിയെ പിടികൂടി. പ്രദീപ് ചൗധരി (32 വയസ്) എന്നയാളാണ് പിടിയിലായത്. ഹരിപ്പാട് എക്‌സൈസ് സര്‍ക്കിള്‍ ഇന്‍സ്പെക്ടര്‍ ഇ ആര്‍ ഗിരീഷ് കുമാറിന്റെ നേതൃത്വത്തിലുള്ള എക്‌സൈസ് സംഘമാണ് സൈബര്‍ സെല്ലിന്റെ സഹായത്തോടെ പ്രതിയെ അറസ്റ്റ് ചെയ്തത്.