കൊടുമണ്ണില്‍ ഷെഡ്ഡില്‍ നിന്ന് 2 പെരുമ്പാമ്പിനെയും കുഞ്ഞുങ്ങളെയും കണ്ടെത്തി. തകര്‍ന്ന ഷെഡ്ഡില്‍ കുഞ്ഞുങ്ങളും മുട്ടകളും

പത്തനംതിട്ട: ആള്‍താമസം ഇല്ലാത്ത ഷെഡ്ഡില്‍ നിന്ന് പെരുമ്പാമ്പിനെയും കുഞ്ഞുങ്ങളെയും കണ്ടെത്തി. രണ്ടു വലിയ പെരുമ്പാമ്പുകളും പത്തു കുഞ്ഞുങ്ങളും മുട്ടകളുമാണ് കണ്ടെത്തിയത്. പത്തനംതിട്ട കൊടുമണ്ണിലാണ് സംഭവം. ഷെഡിലെ താമസക്കാരിയായ വയോധിക ഒരുമാസം മുന്‍പാണ് മരിച്ചത്. 

ഈ ഷെഡില്‍ നിന്നാണ് പാമ്പിനേയും കുഞ്ഞുങ്ങളേയും കിട്ടിയത്. ഷെഡ് പൂര്‍ണമായും തകര്‍ന്ന നിലയിലായിരുന്നു. വിവരം നാട്ടുകാര്‍ പൊലീസിനെ അറിയിക്കുകയായിരുന്നു. 

പൊലീസ് കോന്നി വനംവകുപ്പിനെ ബന്ധപ്പെടുകയും അവരെത്തി പാമ്പിനേയും കുഞ്ഞുങ്ങളേയും പിടിക്കുകയുമായിരുന്നു. ഷെഡിന്റെ അടിയിലാണ് പാമ്പും കൂട്ടത്തെ കണ്ടെത്തിയതെന്ന് നാട്ടുകാര്‍ പറയുന്നു.