കോട്ടയം: അടുത്ത അക്കാദമിക് വര്‍ഷം സംസ്ഥാനത്ത് ആദ്യമായി ആരംഭിക്കുന്ന ബിരുദ ഓണേഴ്സ് പ്രോഗ്രാമുകളുടെ പ്രവേശന നടപടികൾക്ക് തുടക്കംകുറിച്ച് മഹാത്മാ ഗാന്ധി സര്‍വകലാശാല. സര്‍വകലാശാലയ്ക്കു കീഴിലുള്ള വിവിധ കോളജുകളില്‍ ഓണേഴ്സ് പ്രോഗ്രാമുകളില്‍ ഏകജാലക പ്രവേശനത്തിന് ഇപ്പോള്‍ ഓണ്‍ലൈന്‍ രജിസ്ട്രേഷന് നടത്താം. സംസ്ഥാനത്ത് ആദ്യമായി രജിസ്ട്രേഷന് തുടങ്ങിയത് എം.ജിയിലാണ്.
രാജ്യാന്തര, ദേശീയ തലങ്ങളിലെ ഏറ്റവും മികച്ച സര്‍വകലാശാലകളുടെ കോഴ്സുകള്‍ക്കൊപ്പം നില്‍ക്കുന്ന രീതിയിലാണ് ഓരോ പ്രോഗ്രാമിന്‍റെയും സിലബസുകള്‍ ചിട്ടപ്പെടുത്തിയിരിക്കുന്നതെന്ന് വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ പറഞ്ഞു.
ബിരുദ ഓണേഴ്സ് പ്രോഗ്രാമുകള്‍ക്ക് https://cap.mgu.ac.in/ എന്ന പോര്‍ട്ടലിലാണ് രജിസ്റ്റര്‍ ചെയ്യേണ്ടത്. പ്രോഗ്രാമുകള്‍ ഓരോന്നും ഏതു കോളേജുകളിലാണുള്ളതെന്ന് പോര്‍ട്ടലില്‍ അറിയാം. പ്രവേശന നടപടികള്‍ ഏകോപിപ്പിക്കുന്നതിന് കോളജുകളില്‍ നോഡല്‍ ഓഫീസര്‍മാരെ നിയോഗിച്ചിട്ടുണ്ട്. ഏല്ലാ കോളജുകളിലും ഹെല്‍പ് ഡെസ്‌കുകളും പ്രവര്‍ത്തിച്ചുവരുന്നു. നോഡല്‍ ഓഫീസര്‍മാരുടെയും ഹെല്‍പ് ഡെസ്‌കുകളുടെയും ഫോണ്‍ നമ്പരുകള്‍ പോര്‍ട്ടലില്‍ ലഭ്യമാണ്.
നിലവിലുള്ള കോഴ്സ് ഘടനയില്‍ മാറ്റംവന്നിട്ടുള്ളതുകൊണ്ടുതന്നെ ഓണ്‍ലൈന്‍ രജിസ്ട്രേഷന് വിദ്യാര്‍ഥികള്‍ കോളജുകളിലെ ഹെല്‍പ് ഡെസ്കുകളുടെ സേവനം തേടുന്നതാണ് അഭികാമ്യമെന്ന് ഓണേഴ്സ് പ്രോഗ്രാമിന്‍റെ ചുമതലയുള്ള നിർവാഹക സമിതി അധ്യക്ഷനായ സിൻഡിക്കേറ്റ് അംഗം ഡോ. ബിജു പുഷ്പൻ അറിയിച്ചു. ഓണേഴ്സ് ബിരുദത്തെക്കുറിച്ച് കൂടുതല്‍ അറിയുന്നതിന് സര്‍വകലാശാലയും കോളജുകളും സംയുക്തമായി നടത്തുന്ന മുഖാമുഖം പരിപാടികള്‍ വിദ്യാര്‍ഥികളും മാതാപിതാക്കളും പ്രയോജനപ്പെടുത്തണെമന്ന് അദ്ദേഹം നിര്‍ദേശിച്ചു.
കോളേജുകളിലെ അഞ്ചുവര്‍ഷ ഇന്റഗ്രേറ്റഡ് ബിരുദാനന്തര ബിരുദം, സര്‍വകലാശാലാ കാമ്പസില്‍ നടത്തുന്ന 4+1 ഓണേഴ്സ് പ്രോഗ്രാം എന്നിവയുടെ പ്രവേശനത്തിനും https://cap.mgu.ac.in/ എന്ന പോര്‍ട്ടല്‍ മുഖേനയാണ് രജിസ്റ്റര്‍ ചെയ്യേണ്ടത്.
കൂടുതല്‍ വിവരങ്ങള്‍ 0481-2733511, 0481-2733521, 0481-2733518 എന്നീ ഫോണ്‍ നമ്പറുകളില്‍ ലഭിക്കും. ഇ-മെയില്‍: ugcap@mgu.ac.in
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/ZeFeqrbEVjqBNVc6SWZV.jpeg)