ഏറ്റവും കനം കുറഞ്ഞ ഐഫോണ്‍ 17 വേരിയന്‍റ് ആപ്പിള്‍ അവതരിപ്പിക്കുന്നു

ഏറ്റവും കനം കുറഞ്ഞ ഐഫോണ്‍ 17 വേരിയന്‍റ്, മാക്‌ബുക്ക് പ്രോ, ആപ്പിള്‍ വാച്ച് എന്നിവയും അവതരിപ്പിക്കാനുള്ള ഒരുക്കത്തിലാണ് ആപ്പിള്‍ എന്നാണ് ബ്ലൂംബെര്‍ഗിന്‍റെ പുതിയ റിപ്പോര്‍ട്ട്. 'ഐഫോണ്‍ 17 സ്ലിം' എന്നാകും കനം കുറഞ്ഞ മോഡ‍ലിന്‍റെ പേര്. കനംകുറഞ്ഞ ഐഫോണ്‍ 17 മോഡല്‍ പുറത്തിറക്കാനുള്ള പദ്ധതികളിലാണ് ആപ്പിള്‍ കമ്പനി. 

ആപ്പിള്‍ വാച്ച്, മാക്‌ബുക്ക് പ്രോ എന്നിവയിലും പുത്തന്‍ ഡിസൈനുകള്‍ അണിയറയില്‍ ഒരുങ്ങുകയാണ്. ടെക് ലോകത്ത് ഓരോ പ്രൊഡക്‌ടിലെയും ഏറ്റവും കനം കുറഞ്ഞതും ഭാരം കുറഞ്ഞതുമായ മോഡലുകള്‍ തങ്ങളുടേതാക്കി മാറ്റാനാണ് ആപ്പിള്‍ ഉദേശിക്കുന്നത്. ഇതിന്‍റെ തുടക്കമെന്ന നിലയിലാണ് പുതിയ ഐപാഡ് പ്രോയുടെ വരവ്. 

ഐഫോണ്‍ 17, ഐഫോണ്‍ 17 സ്ലിം, ഐഫോണ്‍ 17 പ്രോ,  ഐഫോണ്‍ 17 പ്രോ മാക്‌സ് എന്നിങ്ങനെ നാല് വേരിയന്‍റുകളില്‍ ഐഫോണ്‍ 17 സീരീസ് വിപണിയിലേക്ക് വരാനാണ് സാധ്യത. ഐഫോണ്‍ 17, ഐഫോണ്‍ 17 സ്ലിം, ഐഫോണ്‍ 17 പ്രോ എന്നിവ അലുമിനിയം ഡിസൈനിലും പ്രോ മാക്‌സ് ടൈറ്റാനിയം ബോഡിയിലുമാണ് വരിക.

ഐഫോണ്‍ 17, ഐഫോണ്‍ 17 സ്ലിം വേരിയന്‍റുകള്‍ക്ക് 8ജിബി റാമും ഐഫോണ്‍ 17 പ്രോ, ഐഫോണ്‍ 17 പ്രോ മാക്‌സ് എന്നിവയ്ക്ക് 12 ജിബി റാമുവാണ് വരാനിട. ഐഫോണ്‍ 17 സീരീസിലെ എല്ലാ ഫോണുകള്‍ക്കും 24 എംപി മുന്‍ ക്യാമറയും പ്രതീക്ഷിക്കുന്നു. പുതിയ ചിപ് സെറ്റുകളും എഐ സാങ്കേതികവിദ്യകളും ഐഫോണ്‍ 17 സീരീസിലുണ്ടാകും.