ആയിരത്തിലധികം ജീവനക്കാരോട് കമ്പനി വിട്ടുപോകാന്‍ നിര്‍ദേശിച്ച് മൈക്രോസോഫ്റ്റ്

മൈക്രോസോഫ്റ്റ് ആയിരത്തിലധികം ജീവനക്കാരോടാണ് കമ്പനി വിട്ടുകൊള്ളാന്‍ നിര്‍ദേശിച്ചിരിക്കുന്നത് എന്നാണ് സിഎന്‍ബിസിയുടെ വാര്‍ത്ത. ജീവനക്കാര്‍ക്ക് തൊഴില്‍ നഷ്‌ടമാകുന്ന കാര്യം മൈക്രോസോഫ്റ്റ് വക്‌താവ് സിഎന്‍ബിസിയോട് സ്ഥിരീകരിച്ചിട്ടുണ്ട്. ഹോളോലെന്‍സ് 2 നിര്‍മ്മാണത്തെ തൊഴിലാളികളുടെ പിരിച്ചുവിടല്‍ സാരമായി ബാധിക്കുമോ എന്ന ആശങ്കയുണ്ട്. 

ഹോളോലെന്‍സ് 2 ഓഗ്‌മെന്‍റ് റിയാലിറ്റി ഹെഡ്‌സെറ്റുകള്‍ നിര്‍മ്മിക്കുന്ന വിഭാഗമാണിത്. മൈക്രോസോഫ്റ്റ് വികസിപ്പിച്ചെടുത്ത സ്‌മാര്‍ട്ട് ഗ്ലാസുകളാണ് ഹോളോലെന്‍സുകള്‍. മൈക്രോസോഫ്റ്റിന്‍റെ അഭിമാന ഉല്‍പന്നമായ ഹോളോലെന്‍സ് 2 നിര്‍മ്മാണത്തെ ജീവനക്കാരുടെ പിരിച്ചുവിടല്‍ സാരമായി ബാധിക്കുമോ എന്ന ആശങ്ക ഉടലെടുത്തുകഴിഞ്ഞു.

അമേരിക്കന്‍ പ്രതിരോധ മന്ത്രാലയത്തിന് ഹോളോലെന്‍ഡ് 2 നിര്‍മ്മിച്ചുനല്‍കാന്‍ മൈക്രോസോഫ്റ്റിന് നിലവില്‍ കരാറുണ്ട്. എന്നാല്‍ തൊഴിലാളികളെ പിരിച്ചുവിടുന്നത് ഹോളോലെന്‍ഡ് 2 അടക്കമുള്ള ഓഗ്‌മെന്‍റ് റിയാലിറ്റി പദ്ധതികളെ സാരമായി ബാധിക്കില്ല എന്ന് മൈക്രോസോഫ്റ്റ് വിശദീകരിക്കുന്നു. 2016 മാര്‍ച്ചിലാണ് മൈക്രോസോഫ്റ്റ് ഹോളോ ലെന്‍സ് അവതരിപ്പിച്ചത്.

ഈ കണ്ണടയിലൂടെ കാണുന്ന കാഴ്ചകള്‍ക്കൊപ്പം ഡിജിറ്റല്‍ ഹോളോഗ്രാഫിക് ചിത്രങ്ങളും കാണാന്‍ സാധിക്കും. ഹോളോലെന്‍സില്‍ ചിപ്പുകള്‍, സെന്‍സറുകള്‍, വൈഫെ, ബ്ലൂടൂത്ത്, എച്ച്‌ഡി ക്യാമറകള്‍, മൈക്രോഫോണുകള്‍, ഐ-ട്രാക്കിംഗ്, ഹാന്‍ഡ്-ട്രാക്കിംഗ് തുടങ്ങി നിരവധി സംവിധാനങ്ങളുണ്ട്. 2019ല്‍ ബാഴ്‌സലോണയിൽ നടന്ന മൊബൈൽ വേൾഡ് കോൺഗ്രസിലാണ് ഹോളോ ലെൻസ് 2 പ്രഖ്യാപിച്ചത്.