പിടിച്ചെടുത്തത് കിലോക്കണക്കിന് ഗുളികകളും കെട്ടുകണക്കിന് കാശും; ഹൈദരാബാദിൽ സ്കൂ‍ളിനുള്ളിൽ മയക്കുമരുന്ന് ഫാക്ടറി, മാനേജർ പിടിയിൽ

ഹൈദരാബാദ്: ബോവൻപള്ളിയിലെ ഒരു സ്വകാര്യ സ്കൂളിനുള്ളിൽ പ്രവർത്തിച്ചിരുന്ന അനധികൃത ആൽപ്രാസോലം നിർമ്മാണ യൂണിറ്റ് പൊലീസ് റെയ്ഡിൽ പിടികൂടി. 

ഹൈദരാബാദ് എലൈറ്റ് ആക്ഷൻ ഗ്രൂപ്പ് ഫോർ ഡ്രഗ് ലോ എൻഫോഴ്‌സ്‌മെന്റ് (EAGLE) സംഘമാണ് പരിശോധന നടത്തി ഫാക്ടറി കണ്ടെത്തിയത്.

സ്കൂൾ മാനേജറും ഉടമയുമായ മഹബൂബ് നഗർ സ്വദേശി മലേല ജയ പ്രകാശ് ഗൗഡാണ് അറസ്റ്റിലായത്. ജയ പ്രകാശ്, ആൽപ്രാസോലം നിർമ്മാണ ഫോർമുലയും പ്രക്രിയയും അറിയാവുന്ന ഗുരുവറെഡ്ഡി എന്ന വ്യക്തിയുടെ സഹായത്തോടെയാണ് മയക്കുമരുന്ന് നിർമ്മിച്ചിരുന്നത്.

റെയ്ഡിൽ നിന്നും 3.5 കിലോഗ്രാം നിർമ്മിത ആൽപ്രാസോലം, 4.3 കിലോഗ്രാം സെമി-പ്രോസസ്ഡ് ടാബ്‌ലെറ്റുകൾ, അസംസ്കൃത വസ്തുക്കൾ, നിർമ്മാണ ഉപകരണങ്ങൾ, 21 ലക്ഷം രൂപയുടെ കാശ് എന്നിവ പിടിച്ചെടുത്തു.

നിരവധി കുട്ടികൾ പഠിക്കുന്ന സ്കൂളിൽ ഇത്തരമൊരു അനധികൃത പ്രവർത്തനം നടന്നത് ഗുരുതര സുരക്ഷാ പ്രശ്നമായി അധികൃതർ വിലയിരുത്തുന്നു. 

മയക്കുമരുന്ന് ഉത്പാദനത്തിലും വിതരണത്തിലും ഉൾപ്പെട്ടിരിക്കാൻ സാധ്യതയുള്ള മറ്റ് ആളുകളെ കണ്ടെത്താൻ അന്വേഷണ സംഘം അന്വേഷണം തുടരുകയാണ്. ഉത്തരവാദികൾക്കെതിരെ കർശന നടപടി സ്വീകരിക്കുമെന്ന് പൊലീസ് അറിയിച്ചു.