ലക്നോ: അയോധ്യ പ്രതിഷ്ഠ ചടങ്ങിൽ 54 രാജ്യങ്ങളിൽ നിന്ന് 100 പ്രതിനിധികൾ പങ്കെടുക്കുമെന്ന് റിപ്പോർട്ട്. വിവിധ സംസ്ഥാനങ്ങളിൽ നിന്നായി 506 അതിഥികളും ചടങ്ങിൽ പങ്കെടുക്കും.
ദക്ഷിണ കൊറിയയിൽ നിന്നുള്ള കിം ചിൽ-സു ആണ് വിദേശത്തുനിന്നുള്ള അതിഥികളിൽ പ്രമുഖൻ. യുഎസ്, ബ്രിട്ടൻ, ഓസ്ട്രേലിയ, മൗറീഷ്യസ്, ആഫ്രിക്ക തുടങ്ങിയ രാജ്യങ്ങളിലെ സർക്കാർ പ്രതിനിധികളെയും ചടങ്ങിലേക്ക് ക്ഷണിച്ചിട്ടുണ്ട്.
ബോളിവുഡ് താരം അമിതാഭ് ബച്ചൻ, അജയ് ദേവ്ഗൺ, അക്ഷയ് കുമാർ എന്നിവർ ചടങ്ങിൽ പങ്കെടുക്കും. അല്ലു അർജുൻ, മോഹൻലാൽ, അനുപം ഖേർ, ചിരഞ്ജീവി സംവിധായകരായ സഞ്ജയ് ലീല ബൻസാലി, ചന്ദ്രപ്രകാശ് ദ്വിവേദി എന്നിവരാണ് സിനിമ മേഖലയിൽ നിന്ന് ചടങ്ങിലേക്ക് ക്ഷണം ലഭിച്ച പ്രമുഖർ.
ലോക്സഭാ മുൻ സ്പീക്കർ മീരാ കുമാർ, ആസൂത്രണ കമ്മിഷൻ മുൻ ഉപാധ്യക്ഷൻ മൊൻഡേക് സിംഗ് അലുവാലിയ, മുൻ അറ്റോർണി ജനറൽമാരായ കെ.കെ. വേണുഗോപാൽ, മുകുൾ റോത്തഗി, ഇന്ത്യൻ വനിതാ ക്രിക്കറ്റ് മുൻ ക്യാപ്റ്റൻ മിതാലി രാജ് എന്നിവരും ചടങ്ങിൽ പങ്കെടുക്കും.
ആദിത്യ ബിർല ഗ്രൂപ്പ് ചെയർപേഴ്സൻ കുമാർ മംഗലം ബിർല, ഭാര്യ നിർജ, റിലയൻസ് ഇൻഡസ്ട്രീസ് മേധാവി മുകേഷ് അംബാനിയും കുടുംബവും, ഇൻഫോസിസ് സ്ഥാപകൻ എൻ.ആർ. നാരായണ മൂർത്തി, മഹീന്ദ്ര ആൻഡ് മഹീന്ദ്ര ഗ്രൂപ്പിന്റെ ആനന്ദ് മഹീന്ദ്ര എന്നിവരാണ് ക്ഷണപ്പട്ടികയിലുള്ള പ്രമുഖ വ്യവസായികൾ.