രാഷ്ട്രീയത്തില്‍ ഭക്ഷണത്തിനു പ്രാധാന്യമുണ്ടോ ? ഉണ്ടെന്നു തെളിയിക്കുന്നതാണു കര്‍ണാടക കോണ്‍ഗ്രസിലെ പ്രശ്‌ന പരിഹാരം. കലങ്ങി മറിഞ്ഞ കര്‍ണാടക കോണ്‍ഗ്രസിലെ തര്‍ക്കും പരിഹരിക്കാന്‍ കെസി വേണുഗോപാല്‍ പയറ്റി വിജയിച്ചതു ബ്രേക്ക് ഫാസ്റ്റ് നയതന്ത്രം

ഡല്‍ഹി: രാഷ്ട്രീയത്തില്‍ ഭക്ഷണത്തിനു പ്രാധാന്യമുണ്ടോ ? ഉണ്ടെന്നു തെളിയിക്കുന്നതാണു കര്‍ണാടക കോണ്‍ഗ്രസിലെ പ്രശ്‌ന പരിഹാരം. 

കോണ്‍ഗ്രസ് അധ്യക്ഷന്റെ നിര്‍ദേശ പ്രകാരം ദൗത്യമേറ്റെടുത്ത കെ.സി വേണുഗോപാലിന്റെ നയതന്ത്രം വിജയിച്ചതിന്റെ ആശ്വാസത്തിലാണു നേതൃത്വം. 

പ്രശ്‌നങ്ങള്‍ പരിഹരിക്കാന്‍ കെ.സി. വേണുഗോപാല്‍ കണ്ടെത്തിയ മാര്‍ഗം ബ്രേക്ക് ഫാസ്റ്റ നയതന്ത്രമായിരുന്നു. കര്‍ണാടകയിലെ സര്‍ക്കാര്‍ രൂപീകരണത്തിനിടയില്‍ ഉടലെടുത്ത പ്രശ്‌നങ്ങള്‍ക്കു പരിഹാരം ഉണ്ടാക്കിയതും ബ്രേക്ക് ഫാസ്റ്റ് നയതന്ത്രത്തിലൂടെയായതുകൊണ്ടാണ് ഇപ്പോഴും അതേ മാര്‍ഗം പിന്തുടരാന്‍ കോണ്‍ഗ്രസ് ഹൈക്കമാന്‍ഡ് നിര്‍ദേശിച്ചത്. 

സിദ്ധരാമയ്യയും ഡി.കെ.ശിവകുമാറും തമ്മിലുളള അധികാരകൈമാറ്റ തര്‍ക്കം അതിരുവിടുന്നുവെന്ന് മനസിലാക്കിയാണ് പ്രശ്‌നം പരിഹാരത്തിനായി ഹൈക്കമാന്‍ഡ് നേരിട്ട്  ഇടപെട്ടത്.

കര്‍ണാടക കോണ്‍ഗ്രസിലെ പ്രശ്‌നങ്ങള്‍ പരിഹരിക്കുന്നതില്‍ ഇടപെടുമ്പോഴെല്ലാം കോണ്‍ഗ്രസ് ഹൈക്കമാന്‍ഡ് ഉപയോഗിക്കുന്ന തന്ത്രം നേതാക്കളെ ഒരുമേശക്ക് ചുറ്റും ഇരുത്തിയുളള ബ്രേക്ക് ഫാസ്റ്റ് മീറ്റിങ്ങാണ്. 

2023ല്‍ ബിജെപിയുടെ പ്രതീക്ഷകളെ തല്ലിക്കെടുത്തി കൊണ്ട് അധികാരം പിടിച്ച ശേഷം മുഖ്യമന്ത്രി സ്ഥാനത്തേ ചൊല്ലിയുളള തര്‍ക്കം തീര്‍ക്കാനും ബ്രേക്ക് ഫാസ്റ്റ് നയതന്ത്രമാണ് പ്രധാന പങ്കുവഹിച്ചത്. 

മുഖ്യമന്ത്രിസ്ഥാനത്തിനായി വാശിപിടിച്ച ഡി.കെ ശിവകുമാറിനോടും സിദ്ധരാമയ്യയോടും സംസാരിച്ചു  പ്രതിസന്ധി പരിഹരിക്കാന്‍ അന്നും നിയുക്തനായത് എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ ആയിരുന്നു.

എ.ഐ.സി.സി അധ്യക്ഷന്‍ മല്ലികാര്‍ജുന ഖാര്‍ഗേയുടെ തട്ടകമായ കര്‍ണാടകയിലെ പ്രശ്‌നം പരിഹരിക്കുന്നതിനായി ഇക്കുറിയും ഹൈക്കമാന്‍ഡ് നിയോഗിച്ചത് എ.ഐ.സി.സിയുടെ സംഘടനാ ചുമതലയുളള ജനറല്‍ സെക്രട്ടറി കെ.സി വേണുഗോപാലിനെ തന്നെയായിരുന്നു. 

ഹൈക്കമാന്‍ഡ് മുന്നോട്ടുവെച്ച സമവായ ഫോര്‍മുല കൃത്യതയോടെ നടപ്പാക്കപ്പെടുന്നു എന്ന് ഉറപ്പുവരുത്തുന്നതിനു വേണ്ടിയാണു തന്റെ സ്വന്തം സംസ്ഥാനത്തെ 'സമാധാന ദൌത്യത്തിന്' ദേശിയഅധ്യക്ഷന്‍ മല്ലികാര്‍ജുന ഖാര്‍ഗെ, സംഘടനാ ജനറല്‍ സെക്രട്ടറിയായ കെ.സി.വേണുഗോപാലിനെ തന്നെ നിയോഗിച്ചത്. 

കര്‍ണാടകയിലെ സംഘടനാ പ്രശ്‌നങ്ങളില്‍ നേരത്തെയും ഇടപെട്ട് പരിചയമുള്ള നേതാവ് എന്ന നിലയിലാണു ഖാര്‍ഗേ കെ.സി. വേണുഗോപാലിനെ നയതന്ത്രനീക്കത്തിനായി ചുമതലപ്പെടുത്തിയത്.

എ.ഐ.സി.സി അധ്യക്ഷന്‍ മല്ലികാര്‍ജുന ഖാര്‍ഗെയും ലോകസഭാ പ്രതിപക്ഷ നേതാവ് രാഹുല്‍ ഗാന്ധിയും പങ്കെടുത്ത ചര്‍ച്ചയിലെ തീരുമാനപ്രകാരമാണ് ഹൈക്കമാന്‍ഡ് കര്‍ണാടകയില്‍ 'സമാധാന ദൌത്യത്തിന്' ഇറങ്ങിയത്. 

മൂന്നു വര്‍ഷത്തോളം കര്‍ണാടകത്തിന്റെ ചുമതലയുള്ള എ.ഐ.സി.സി. ജനറല്‍ സെക്രട്ടറിയായിരുന്ന കെ.സി.വേണുഗോപാല്‍ കഴിഞ്ഞ രണ്ടുദിവസമായി ഫോണില്‍  ഇരു നേതാക്കളുമായും ആശയവിനിമയം നടത്തിവരുകയായിരുന്നു.

പ്രശ്‌നപരിഹാരത്തിനായി ഹൈക്കമാന്‍ഡിന്റെ കൈക്കൊണ്ടിരിക്കുന്ന തീരുമാനങ്ങളും നിര്‍ദ്ദേശങ്ങളും ഇരുവരെയും അറിയിച്ചു. വ്യക്തിപരമായ പ്രശ്‌നങ്ങള്‍ മറന്ന് ഇരുനേതാക്കളും ഒരുമിച്ചിരിക്കുകയും തുറന്ന് സംസാരിക്കുകയും വേണമെന്നതായിരുന്നു ഹൈക്കമാന്‍ഡിന്റെ പ്രധാന നിര്‍ദ്ദേശം. 

തുറന്ന ചര്‍ച്ച നടന്നാല്‍ തെറ്റിദ്ധാരണകള്‍ അകലുകയും യോജിപ്പിന്റെ അന്തരീക്ഷം സംജാതമാകുകയും ചെയ്യുമെന്ന കണക്കൂകൂട്ടലിലാണ് ഈ നിര്‍ദേശം മുന്നോട്ടുവെച്ചത്. 

ഒരുമിച്ചിരുന്നുളള ചര്‍ച്ചക്ക് കളമൊരുക്കുന്നതിനായി ഡി.കെ.ശിവകുമാറിനെ പ്രഭാതഭക്ഷണത്തിനു ക്ഷണിക്കണമെന്ന നിര്‍ദേശം കെ.സി വേണുഗോപാലാണ് മുന്നോട്ടു വെച്ചത്.

ബ്രേക്ക് ഫാസ്റ്റ് മീറ്റിങ്ങിന് സമയക്കുറവ് പോലുള്ള അസൗകര്യങ്ങളുണ്ടെങ്കില്‍  ഉച്ചഭക്ഷണം ഡി.കെ.യുടെ വീട്ടിലാക്കാമെന്ന നിര്‍ദ്ദേശവും വെച്ചു.

ഇന്നലെ രാത്രിയായിരുന്നു കന്നട കോണ്‍ഗ്രസിലെ പ്രശ്‌നങ്ങള്‍ പരിഹരിക്കാനുളള നിര്‍ണായക ചര്‍ച്ചകള്‍ നടന്നത്. ഹൈക്കമാന്‍ഡ് നിര്‍ദേശങ്ങള്‍ ശിരസാവഹിച്ച സിദ്ധരാമയ്യ രാത്രി തന്നെ ഡി.കെ.ശിവകുമാറിനെ പ്രഭാത ഭക്ഷണത്തിനായി ക്ഷണിച്ചു.

മുഖ്യമന്ത്രിയുടെ വസതിയായ കാവേരിയിലെ പ്രഭാത ഭക്ഷണത്തിനുളള ക്ഷണം സ്വീകരിച്ച ശിവകുമാര്‍, ഭക്ഷണത്തിന് ശേഷം ഒരുമിച്ച് മാധ്യമങ്ങള്‍ക്ക് മുന്നിലെത്താമെന്ന സിദ്ധരാമയ്യയുടെ നിര്‍ദ്ദേശവും അംഗീകരിച്ചു. 

ഇതോടെ കര്‍ണാടകയിലെ കോണ്‍ഗ്രസ് നേരിട്ട പ്രതിസന്ധിയില്‍ മഞ്ഞുരുക്കത്തിന്റെ സൂചനകള്‍ കണ്ടുതുടങ്ങി.ബ്രേക്ക് ഫാസ്റ്റ് മീറ്റിങ്ങ് ഫലം കണ്ടുവെന്ന് തെളിയിക്കുന്ന രംഗങ്ങള്‍ക്കാണ് ഇന്ന് ബംഗലരു സാക്ഷ്യം വഹിച്ചത്. 

മുഖ്യമന്ത്രിയുടെ വസതിയിലെ പ്രാതലിന് ശേഷം മാധ്യമങ്ങളെ കണ്ട മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ.ശിവകുമാറും  ഹൈക്കമാന്‍ഡിന്റെ നിര്‍ദേശങ്ങള്‍ പൂര്‍ണമായും അനുസരിക്കുമെന്ന് വ്യക്തമാക്കി.

തങ്ങള്‍ക്കിടയില്‍ തര്‍ക്കങ്ങളില്ലെന്നും നിയമസഭയുടെ ശീതകാലസമ്മേളനത്തില്‍  സര്‍ക്കാര്‍ സ്വീകരിക്കേണ്ട നയസമീപനങ്ങളെക്കുറിച്ചായിരുന്നു ചര്‍ച്ചയെന്നും ഇരുവരും മാധ്യമങ്ങള്‍ക്ക് മുന്നില്‍ വിശദീകരിച്ചു.

ദേശീയതലത്തില്‍ കോണ്‍ഗ്രസ് നേരിടുന്ന വെല്ലുവിളികള്‍ നിറഞ്ഞ രാഷ്ട്രീയ സാഹചര്യത്തില്‍ പാര്‍ട്ടിയെ ദുര്‍ബലപ്പെടുത്തുന്നതൊന്നും  ചെയ്യില്ലെന്നും ഇരുവരും വ്യക്തമാക്കി. 

2028-ലെ കര്‍ണാടക തിരഞ്ഞെടുപ്പിലും 2029-ലെ പാര്‍ലമെന്റ് തിരഞ്ഞെടുപ്പിലും കര്‍ണാടകയിലെ കോണ്‍ഗ്രസ് ഒറ്റക്കെട്ടായി പൊരുതും. പാര്‍ട്ടിയെ ദേശീയതലത്തില്‍ അധികാരത്തില്‍ തിരിച്ചെത്തിക്കുകയും കര്‍ണാടകത്തില്‍ ഭരണ തുടര്‍ച്ചയുമാണ് പരമമായ ലക്ഷ്യമെന്ന് കൂടി ഇരുനേതാക്കളും പ്രഖ്യാപിച്ചതോടെ കര്‍ണാടകയില്‍ കോണ്‍ഗ്രസ് നേരിട്ട പ്രതിസന്ധി ഒഴിഞ്ഞുവെന്ന് വ്യക്തമായി.

കര്‍ണാടകയിലെ അധികാര തര്‍ക്കം പരിഹരിക്കാന്‍ ട്രബിള്‍ ഷൂട്ടറുടെ റോളില്‍ ഇടപെട്ട കെ.സി. വേണുഗോപാല്‍, പ്രശ്‌നം തീര്‍ക്കാന്‍ വഹിച്ച പങ്ക് മാധ്യമങ്ങളോട് മറച്ചുവെച്ചു.

കര്‍ണാടകയിലെ പ്രശ്‌നങ്ങളെപ്പറ്റിയുളള മാധ്യമങ്ങളുടെ ചോദ്യങ്ങളോട് പ്രതികരിച്ച വേണുഗോപാല്‍ പ്രശ്‌നം ഉണ്ടെന്നു വരുത്തുന്നത് മാധ്യമങ്ങളാണെന്നു കുറ്റപ്പെടുത്തി. 

മുഖ്യമന്ത്രിയും ഉപമുഖ്യമന്ത്രിയും ഒരുമിച്ച ബ്രേക്ക് ഫാസ്റ്റ് മീറ്റിങ്ങോടെ പ്രശ്‌നമൊന്നുമില്ലെന്നു വ്യക്തമായിരിക്കുകയാണെന്നും അദ്ദേഹം തിരുവനന്തപുരത്ത് മാധ്യമങ്ങളോട് പറഞ്ഞു.