ബംഗളൂരുവിൽ മുൻകൂർ നോട്ടീസില്ലാതെ വ്യാപക കുടിയൊഴിപ്പിക്കൽ; താനിസാന്ദ്രയിൽ ബുൾഡോസർ നടപടിയിൽ അറുപതോളം വീടുകൾ ഇടിച്ചുനിരത്തി, ഭവനരഹിതരായി നൂറുകണക്കിന് കുടുംബങ്ങൾ

ബംഗളൂരു: ബംഗളൂരു അർബൻ ജില്ലയിലെ താനിസാന്ദ്രയിൽ വ്യാപക കുടിയൊഴിപ്പിക്കൽ നടപടിയുമായി കർണാടക സർക്കാർ. യാതൊരു മുൻകൂർ നോട്ടീസും നൽകാതെയാണ് അധികൃതർ ബുൾഡോസർ ഉപയോഗിച്ച് അറുപതോളം വീടുകൾ ഇടിച്ചുനിരത്തിയത്. സർക്കാരിന്റെ നടപടിയിൽ നൂറുകണക്കിന് കുടുംബങ്ങൾ ഭവനരഹിതരായി.

നാല് ജെസിബികൾ ഉപയോഗിച്ച് നടത്തിയ ഒഴിപ്പിക്കൽ എസ്ആർകെ നഗറിനടുത്ത് രാവിലെ നാല് മണിയോടെയാണ് ആരംഭിച്ചത്. ഏകദേശം 400 കുടുംബങ്ങൾക്കാണ് വീടുകൾ നഷ്ടമായത്. മുന്നറിയിപ്പില്ലാതെ ഉദ്യോഗസ്ഥർ പെട്ടെന്ന് എത്തി വീടുകൾ പൊളിച്ചുമാറ്റിയെന്നാണ് പ്രദേശവാസികളുടെ പരാതി.

കർണാടകയുടെ വിവിധ ഭാഗങ്ങളിൽ അടുത്തിടെ സമാന രീതിയിലുള്ള ബുൾഡോസർ നടപടികൾ തുടരുകയാണെന്നും, പാവപ്പെട്ട കുടുംബങ്ങളുടെ പാർപ്പിടങ്ങൾ മുൻകരുതലുകളില്ലാതെ തകർക്കുന്നതിനെതിരെ ശക്തമായ പ്രതിഷേധം ഉയരുകയാണെന്നും നാട്ടുകാർ പറഞ്ഞു.