മുന്നിലുള്ളത് മൂന്ന് മാര്‍ഗങ്ങള്‍; ഒന്നുങ്കില്‍ വിരമിക്കുക, അല്ലെങ്കില്‍ സ്വന്തം സംഘടന രൂപീകരിക്കുക, അതുമല്ലെങ്കില്‍ പുതിയ കൂട്ടാളിയെ കണ്ടെത്തുക ! ജെഎംഎം വിടുമെന്ന് സൂചിപ്പിച്ച് ചമ്പായി സോറന്‍; പാര്‍ട്ടിയില്‍ അപമാനിക്കപ്പെട്ടെന്ന് ജാര്‍ഖണ്ഡ് മുന്‍ മുഖ്യമന്ത്രി; ഇനി ലക്ഷ്യം ബിജെപി ?

റാഞ്ചി: ജാര്‍ഖണ്ഡ് മുന്‍ മുഖ്യമന്ത്രിയും ജെഎംഎം നേതാവുമായ ചമ്പായി സോറന്‍ ബിജെപിയില്‍ ചേരുമെന്ന അഭ്യൂഹം ശക്തമാകുന്നു. തനിക്ക് മുന്നില്‍ മൂന്ന് വഴികളാണുള്ളതെന്ന് ചമ്പായി പറഞ്ഞു. ജെഎംഎം വിടുമെന്ന സൂചനയാണ് ചമ്പായി നല്‍കുന്നത്.

“ജനുവരി 31 ന്, അഭൂതപൂർവമായ സംഭവവികാസങ്ങൾക്ക് ശേഷം, ജാർഖണ്ഡിൻ്റെ 12-ാമത് മുഖ്യമന്ത്രിയായി സംസ്ഥാനത്തെ സേവിക്കാൻ ഇന്ത്യാ മുന്നണി എന്നെ തിരഞ്ഞെടുത്തു. എൻ്റെ ചുമതലയുടെ ആദ്യ ദിവസം മുതൽ അവസാന ദിവസം (ജൂലൈ 3) വരെ ഞാൻ സംസ്ഥാനത്തോടുള്ള എൻ്റെ കടമകൾ തികഞ്ഞ അർപ്പണബോധത്തോടെയും സമർപ്പണത്തോടെയും നിറവേറ്റി. ഈ കാലയളവിൽ, ഞങ്ങൾ പൊതു താൽപ്പര്യങ്ങൾക്കായി നിരവധി തീരുമാനങ്ങൾ എടുത്തു. മുതിർന്നവരെയും സ്ത്രീകളെയും യുവാക്കളെയും വിദ്യാർത്ഥികളെയും സമൂഹത്തിലെ എല്ലാ വിഭാഗങ്ങളെയും മനസ്സിൽ വെച്ചുകൊണ്ട് ഞങ്ങൾ എടുത്ത തീരുമാനങ്ങൾ സംസ്ഥാനത്തെ ജനങ്ങൾ വിലയിരുത്തും”-ചമ്പായി 'എക്‌സി'ല്‍ പങ്കുവച്ച കുറിപ്പിലൂടെ പ്രതികരിച്ചു.

ഭൂമി തട്ടിപ്പ് കേസിൽ എൻഫോഴ്‌സ്‌മെൻ്റ് ഡയറക്ടറേറ്റ് (ഇഡി) അറസ്റ്റ് ചെയ്യുന്നതിനുമുമ്പ് ഹേമന്ത് സോറൻ രാജിവയ്ക്കാൻ നിർബന്ധിതനായതിനെത്തുടർന്നാണ്‌ 67 കാരനായ ചമ്പായി സോറന്‍ മുഖ്യമന്ത്രിയായത്. ജൂൺ 28ന് ഹേമന്ത് സോറന് ജാർഖണ്ഡ് ഹൈക്കോടതി ജാമ്യം അനുവദിക്കുകയും തുടർന്ന് മുഖ്യമന്ത്രിയായി തിരിച്ചെത്തുകയും ചെയ്തു. ഇതോടെ മുഖ്യമന്ത്രി സ്ഥാനം നഷ്ടപ്പെട്ട ചമ്പായി കടുത്ത അതൃപ്തിയിലായിരുന്നു.

നിയമസഭാ കക്ഷി യോഗത്തിൽ തന്നോട് രാജിവെക്കാൻ ആവശ്യപ്പെടുകയായിരുന്നുവെന്ന് ചമ്പായി പറഞ്ഞു. ഇതില്‍ താന്‍ ആശ്ചര്യപ്പെട്ടെങ്കിലും അധികാരത്തോട് ആര്‍ത്തിയില്ലാത്തതിനാല്‍ രാജിവച്ചെന്നും, എന്നാല്‍ ആത്മാഭിമാനത്തിന് മുറിവേറ്റെന്നും അദ്ദേഹം കൂട്ടിച്ചേര്‍ത്തു. അപമാനത്തിനും അവഹേളനത്തിനും ശേഷം ബദല്‍ മാര്‍ഗം തേടാന്‍ താന്‍ നിര്‍ബന്ധിതനാവുകയായിരുന്നുവെന്നും ചമ്പായി വ്യക്തമാക്കി.

"എൻ്റെ ജീവിതത്തിലെ ഒരു പുതിയ അധ്യായം ഇന്ന് മുതൽ ആരംഭിക്കാൻ പോകുന്നുവെന്ന് ഹൃദയഭാരത്തോടെ നിയമസഭാ കക്ഷിയോഗത്തില്‍ ഞാന്‍ പറഞ്ഞു.  രാഷ്ട്രീയത്തിൽ നിന്ന് വിരമിക്കുക, രണ്ടാമതായി, സ്വന്തം സംഘടന രൂപീകരിക്കുക, ഈ പാതയിൽ ഒരു കൂട്ടാളിയെ കണ്ടെത്തിയാൽ, അവരോടൊപ്പം യാത്ര ചെയ്യുക എന്നീ മൂന്ന് മാര്‍ഗങ്ങളാണ് എനിക്ക് മുമ്പിലുള്ളത്‌"-ചമ്പായി പറഞ്ഞു.