ഡിഎംഎയുടെ കേരളപ്പിറവി - മാതൃഭാഷാ ദിനാഘോഷത്തിൽ ഡിഎംഎയുടെ മലയാളാ ഭാഷാ കോർഡിനേറ്റർമാർക്കും 'നീലക്കുറിഞ്ഞി' പരീക്ഷാ വിജയികൾക്കും ആദരവ്

ന്യൂ ഡൽഹി: ഡൽഹി മലയാളി അസോസിയേഷൻ്റെ കേരളപ്പിറവി ദിനാഘോഷങ്ങൾ നാളെ (ശനിയാഴ്ച - 2025 നവംബർ 1) വൈകുന്നേരം 6 മണിക്ക് ഡിഎംഎ സാംസ്കാരിക സമുച്ചയത്തിൽ അരങ്ങേറും.

ഡിഎംഎ പ്രസിഡൻ്റ് കെ രഘുനാഥിൻ്റെ  അദ്ധ്യക്ഷതയിൽ ചേരുന്ന സാംസ്കാരിക സമ്മേളനത്തിൽ കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി എക്സിക്യൂട്ടീവ് ഡയറക്ടർ ഡോ ബിനോയ് ജോബ് മുഖ്യാതിഥിയും മനോരമ ന്യൂസ് റീജിയണൽ ചീഫ് നിഷാ പുരുഷോത്തമൻ, പ്രശസ്ത സംരംഭകനും ഓൾ ഇന്ത്യാ മലയാളി അസോസിയേഷൻ ജനറൽ സെക്രട്ടറിയുമായ കെ ആർ മനോജ് എന്നിവർ വിശിഷാതിഥികളുമാകും. ജനറൽ സെക്രട്ടറി ടോണി കണ്ണമ്പുഴ, അഡീഷണൽ ജനറൽ സെക്രട്ടറിയും പ്രോഗ്രാം കൺവീനറുമായ പി എൻ ഷാജി, ചീഫ് ട്രഷറാർ മാത്യു ജോസ് തുടങ്ങിയവർ പ്രസംഗിക്കും.

ഡിഎംഎയുടെ മലയാള ഭാഷാ പഠന കേന്ദ്രങ്ങളിൽ നിന്നും നീലക്കുറിഞ്ഞി പരീക്ഷയിൽ വിജയികളായ ഡോ അഞ്ജലി എസ് നായർ, അർജുൻ നമ്പ്യാർ, വീനസ് മരിയ ടോംസ്, റിഫ്സാനാ ഇക്ബാൽ, എം ആരതി എന്നിവരെയും മലയാളാ ഭാഷാ കോർഡിനേറ്റർമാരായ എസ് ഷാജി കുമാർ, വി ആർ കൃഷ്ണദാസ്, സെൽമാ ഗിരീഷ്, സാറാ ഐസക്, രജനി രാജീവ് എന്നിവരെയും ചടങ്ങിൽ ആദരിക്കും.

തുടർന്ന് ഡിഎംഎയുടെ വിവിധ ഏരിയകളിൽ നിന്നുള്ള ഗായകർ അവതരിപ്പിക്കുന്ന ഗാനമാലികയും നൃത്തനൃത്യങ്ങളും കേരളപ്പിറവി ദിനം ആസ്വാദ്യ മധുരമാക്കും.