ഇന്ധനം ഗണ്യമായി കുറഞ്ഞു, വിമാനത്തിൽ നിന്നും ‘മെയ് ഡേ’ സന്ദേശം; ചെന്നൈയിലേക്ക് പോയ ഇൻഡിഗോ വിമാനം ഇറക്കിയത് ബംഗളൂരുവിൽ

ബംഗളൂരു: ഗുവാഹത്തിയിൽ നിന്ന് ചെന്നൈയിലേക്ക് പോയ ഇൻഡിഗോ വിമാനം പൈലറ്റ് ബംഗളൂരു വിമാനത്താവളത്തില്‍ ഇറക്കി. വിമാനത്തിലെ ഇന്ധനം ഗണ്യമായി കുറഞ്ഞതോടെ പൈലറ്റ് മെയ് ഡേ കോള്‍ നല്‍കിയെന്നാണ് റിപ്പോർട്ട്.

ഇക്കഴിഞ്ഞ വ്യാഴാഴ്ചയാണ് ഇന്‍ഡിഗോ വിമാനത്തിന് സാങ്കേതിക തകരാറുണ്ടായത്. ഇന്‍ഡിഗോയുടെ 6E-6764 വിമാനം, വ്യാഴാഴ്ച വൈകുന്നേരം 7:45 ഓടെ ചെന്നൈയില്‍ ലാന്‍ഡ് ചെയ്യാന്‍ ശ്രമിച്ചെങ്കിലും ചെന്നൈയിലെ എയര്‍ ട്രാഫിക് കൂടുതലായിരുന്നത് കാരണം ഇത് നടന്നില്ല. 

തുടര്‍ന്ന് ബംഗളൂരുവിലേക്ക് തിരിച്ചു പറക്കുകയായിരുന്നു. 168 യാത്രക്കാരുമായിട്ടാണ് വിമാനം സുരക്ഷിതമായി ഇറങ്ങിയത്.

രാത്രി 8:20ന് കെംപഗൗഡ രാജ്യാന്തര വിമാനത്താവളത്തില്‍ സുരക്ഷിതമായി ലാന്‍ഡ് ചെയ്യുകയായിരുന്നു. ലാന്‍ഡിംഗ് സമയത്ത് മെഡിക്കല്‍, ഫയര്‍ സര്‍വീസ് ഉദ്യോഗസ്ഥര്‍ സജ്ജരായിരുന്നു, പരമാവധി സുരക്ഷാ മുന്‍കരുതലുകളും ഉറപ്പാക്കിയിരുന്നതായി വിമാനത്താവള അധികൃതരെ ഉദ്ധരിച്ച് ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നു. 

സംഭവത്തിന് പിന്നാലെ, രണ്ട് പൈലറ്റുമാരെയും ആഭ്യന്തര അന്വേഷണത്തെ തുടര്‍ന്ന് ജോലിയില്‍ നിന്നും മാറ്റി നിര്‍ത്തിയിരിക്കുകയാണ്. യാത്രക്കാര്‍ക്കുണ്ടായ അസൗകര്യത്തില്‍ എയര്‍ലൈന്‍ ഖേദം അറിയിച്ചു.