കശ്മീരിലെ കത്വയിൽ സൈനിക വാഹനത്തിന് നേരെ ഭീകരാക്രമണം; രണ്ട് ജവാന്മാർക്ക് പരിക്ക്

ശ്രീന​ഗർ: ജമ്മു കശ്മീരിലെ കത്വ ജില്ലയിലെ ബില്ലവാർ മേഖലയിൽ സൈനിക വാഹനത്തിന് നേരെ ഭീകരരുടെ ആക്രമണം. ആക്രമണത്തിൽ രണ്ട് സൈനികർക്ക് പരിക്കേറ്റു. പരിക്കേറ്റവരെ ആശുപത്രിയിൽ പ്രവേശിപ്പിച്ചു. കുന്നിൻ മുകളിൽ നിന്നാണ് ഭീകരർ സൈനിക വാഹനത്തിന് നേരെ വെടിയുതിർത്തതെന്നും ആക്രമണത്തിന് ശേഷം മേഖലയിൽ തിരച്ചിൽ തുടരുകയാണെന്നും സൈനിക വൃത്തങ്ങൾ അറിയിച്ചു. 

കഴിഞ്ഞ ഏതാനും ആഴ്ചകളായി ജമ്മു കശ്മീരിൽ ഭീകരാക്രമണങ്ങൾ വർധിച്ചുവരികയാണ്. ജൂൺ 11, 12 തീയതികളിലായി ജമ്മു കശ്മീരിലെ ദോഡ ജില്ലയിൽ ഇരട്ട ഭീകരാക്രമണം നടന്നിരുന്നു.  ജൂൺ 11 ന് ഛത്തർഗല്ലയിലെ സംയുക്ത ചെക്ക് പോസ്റ്റിൽ തീവ്രവാദികൾ നടത്തിയ ആക്രമണത്തിൽ ആറ് സുരക്ഷാ ഉദ്യോഗസ്ഥർക്ക് പരിക്കേറ്റിരുന്നു. 

ജൂൺ 26ന് ജമ്മു കശ്മീരിലെ ദോഡ ജില്ലയിലെ വനമേഖലയിൽ സുരക്ഷാസേനയുമായുള്ള ഏറ്റുമുട്ടലിൽ മൂന്ന് ഭീകരർ കൊല്ലപ്പെട്ടിരുന്നു. ജൂൺ 11, 12 തീയതികളിൽ മലയോര ജില്ലയിലുണ്ടായ ഇരട്ട ഭീകരാക്രമണത്തെത്തുടർന്ന് സൈന്യവും സെൻട്രൽ റിസർവ് പോലീസ് സേനയും (സിആർപിഎഫ്) പോലീസ് നടത്തിയ തിരച്ചിലിനും വലയ ഓപ്പറേഷനും ഇടയിലാണ് ഭീകരർ കൊല്ലപ്പെട്ടത്.