കർണാടകയിൽ എല്ലാം ഭദ്രം. കഴിഞ്ഞ രണ്ടുദിവസമായി നടത്തിവന്ന ചര്‍ച്ചകള്‍ക്കൊടുവില്‍ കര്‍ണാടക കോണ്‍ഗ്രസിലെ സിദ്ധരാമയ്യ - ഡി.കെ ശിവകുമാര്‍ തര്‍ക്കം പരിഹരിക്കാൻ ഇടപെട്ട് കെ.സി വേണുഗോപാല്‍. മുതലെടുപ്പിന് ഒരുങ്ങിയ ബിജെപിക്കും മാധ്യമങ്ങള്‍ക്കും നിരാശ. അഹമ്മദ് പട്ടേലിനു ശേഷം കോണ്‍ഗ്രസിൽ മികച്ച നയതന്ത്ര ഇടപെടലായി കെസി

ഡല്‍ഹി: അഹമ്മദ് പട്ടേലിനു ശേഷം കോണ്‍ഗ്രസിനു കിട്ടിയ മികച്ച നയതന്ത്രജ്ഞനായി മാറുകയാണ് കെ.സി വേണുഗോപാല്‍. 

ഒരു സര്‍ക്കാരിന്റെ അടിവേര് അറുക്കുന്ന തര്‍ക്കം ലളിതമായി പരിഹരിച്ച കെ.സി വേണുഗോപാല്‍ ഒരിക്കല്‍ക്കൂടി തന്റെ സംഘടനാ വൈഭവവും വൈദഗ്ധ്യവും അടയാളപ്പെടുത്തുകയാണ്. 

കര്‍ണ്ണാടക കോണ്‍ഗ്രസിനും സര്‍ക്കാരിനും മേല്‍ കാര്‍മേഘങ്ങള്‍ ഉരുണ്ടുകൂടിയപ്പോൾ എല്ലാ കണ്ണുകളും ഹൈക്കമാന്റിൽ ആയിരുന്നു.

കര്‍ണ്ണാടക രാഷ്ട്രീയത്തിലെ ശക്തിദുര്‍ഗങ്ങളായ സിദ്ധരാമയ്യയോടും ഡി.കെ ശിവകുമാറിനോടും വ്യക്തിബന്ധം പുലര്‍ത്തുന്ന സംഘടനാ ചുമതലയുള്ള ജനറൽ സെക്രട്ടറി കെ സി വേണുഗോപാലിനെ ദൗത്യം ഏൽപ്പിക്കുകയായിരുന്നു നേതൃത്വം ചെയ്തത്.

കർണാടക നേതാക്കളെ എങ്ങനെ സ്വാന്തനിപ്പിക്കണമെന്നു മൂന്നര വര്‍ഷക്കാലം കര്‍ണ്ണാടകയുടെ ചുമതല വഹിച്ച ദേശീയ നേതാവെന്ന നിലയില്‍ കൃത്യമായി അറിയാവുന്ന നേതാവാണ് കെ സി എന്ന് കോണ്‍ഗ്രസ് നേതാക്കള്‍ ഉറച്ചു വിശ്വസിക്കുന്നു.

2023 ലെ കര്‍ണ്ണാടക നിയമസഭയിലെ തെരഞ്ഞെടുപ്പു വിജയത്തിനു തെട്ടുപിന്നാലെ ഉടലെടുത്ത മുഖ്യമന്ത്രി സ്ഥാനാര്‍ഥി തര്‍ക്കം രമ്യമായി പരിഹരിച്ചതു അന്ന് കെ.സിയുടെ സമയോചിതമായ കരുനീക്കങ്ങളാണ്.

രാഹുല്‍ ഗാന്ധിയുടെ നിര്‍ശേ പ്രകാരം ദൗത്യമേറ്റെടുത്ത വേണുഗോപാല്‍ ഡി.കെ ശിവകുമാറിനോടും സിദ്ധരാമയ്യയോടും ആദ്യം ആശയവിനിമയം നടത്തി.

ഇതോടെ വന്‍ഭൂരിപക്ഷത്തോടെ ബി.ജെ.പിക്കെതിരെ നേടിയ വിജയത്തിന്റെ ശോഭ കെടുത്തുന്ന നീക്കത്തെ മുളയിലേ തകര്‍ത്തു.

കര്‍ണ്ണാടകയിലും ഡല്‍ഹിയും രാവും പകലും നീളുന്ന ചര്‍ച്ചകള്‍. ഒടുവില്‍ മഞ്ഞുരുക്കം. നയതന്ത്ര ഇടപെടലില്‍ ഭക്ഷണത്തിനു പ്രാധാന്യം തിരിച്ചറിഞ്ഞ കെ.സി ഇരുവരേയും തന്റെ വസതിയിലേക്ക് വിളിച്ച് പ്രഭാതഭക്ഷണം നല്‍കിയാണ് അന്നതിനു പരിഹാരം കണ്ടത്. 

കെ.സിക്ക് ഇരുവശവും ഇരുന്ന് ഇരുവരും സൗഹൃദം പങ്കിട്ട് ഭക്ഷണം കഴിക്കുന്ന ആ ചിത്രം ഇന്നും ജനങ്ങളുടെ മനസിലുണ്ട്.

ഇന്ന് വീണ്ടും കര്‍ണ്ണാടക കോണ്‍ഗ്രസിനും സര്‍ക്കാരിനും മേല്‍ കാര്‍മേഘങ്ങള്‍ ഉരുണ്ടുകൂടിയപ്പോഴും ഇത് വേണുഗോപാൽ എങ്ങനെ പരിഹരിക്കും എന്നായിരുന്നു എല്ലാവരും ഉറ്റുനോക്കിയത് .

നേതൃമാറ്റം എന്ന ആശയം കര്‍ണ്ണാടകയിലും അവിടെനിന്നു ഡല്‍ഹിയിലേക്കും നീണ്ടപ്പോൾ പക്വതയോടെയാണു ഹൈക്കമാന്‍ഡ് പ്രതികരിച്ചത്.

ഡി.കെയെ അനുകൂലിക്കുന്ന ചില എം.എല്‍.എ.മാര്‍ ഡല്‍ഹിയിലെത്തിയതും തുടര്‍ന്ന് നേതൃമാറ്റമെന്ന ആവശ്യത്തിന് ശക്തിപ്രാപിച്ചപ്പോഴും രാഷ്ട്രീയ മുതലെടുപ്പിനുള്ള അവസരമായി ബി.ജെ.പി അതിനെ കണ്ടു. 

എന്നാലതിന് അവര്‍ക്ക് അവസരം നല്‍കാതെയാണു കെസിയുടെ ചടുലമായ നീക്കങ്ങളും ഇടപെടലും ഇപ്പോഴും ഉണ്ടായത്.

അനുരജ്ഞന ചര്‍ച്ചകള്‍ക്കു കെ.സി വേണുഗോപാലിനെ നിയോഗിക്കാന്‍ കര്‍ണ്ണാടകയില്‍ നിന്നുള്ള എ.ഐ.സി.സി അധ്യക്ഷന്‍ മല്ലികാര്‍ജ്ജുന്‍ ഖാര്‍ഗെയ്ക്കും രണ്ടാമതൊന്ന് അലോചിക്കേണ്ടി വന്നില്ല.

കഴിഞ്ഞ രണ്ടു ദിവസമായി ഫോണില്‍ ഇരു നേതാക്കളുമായും ആശയവിനിമയം നടത്തുകയും  പ്രശ്നപരിഹാരത്തിനായി ഹൈക്കമാന്‍ഡിന്റെ നിര്‍ദേശങ്ങള്‍ കെ.സി. ഇരുവര്‍ക്കും കൈമാറുകയും ചെയ്തു. 

ഇരുവരും പരസ്പരം കൂടിക്കാഴ്ച നടത്തി തര്‍ക്കരഹിതമായി സര്‍ക്കാരിനെ മുന്നോട്ട് കൊണ്ടുപോകേണ്ടതിന്റെ പ്രാധാന്യം കെസി അവരെ ധരിപ്പിച്ചു.

പൊതുസ്വീകാര്യനായ കെസി വേണുഗോപാലിനെ തള്ളാനോ, അദ്ദേഹത്തിന്റെ നിര്‍ദേശം നിരസിക്കാനോ കഴിയാതെ ധര്‍മ്മസങ്കടത്തിലായ ഇരുനേതാക്കളും മഞ്ഞുരുക്കുന്നതിനു വാതിലുകള്‍ തുറന്നിട്ടു.

ഡി.കെ.യെ പ്രഭാതഭക്ഷണത്തിനു ക്ഷണിക്കാന്‍ സിദ്ധരാമയ്യയോട് കെ.സി ആവശ്യപ്പെട്ടു. ഇനി സമയക്കുറവുണ്ടെങ്കില്‍ ഉച്ചഭക്ഷണം ഡി.കെ.യുടെ വീട്ടിലാക്കാന്‍ സിദ്ധരാമയ്യക്കും കെ.സി. നിര്‍ദേശം നല്‍കി. 

ഇതിനിടെ കര്‍ണ്ണാടകയിലെ ഓരോ നീക്കങ്ങളും കെ.സി ഡല്‍ഹിയിലെ കോണ്‍ഗ്രസ് നേതൃത്വത്തെ അറിയിച്ചു കൊണ്ടിരുന്നു. അവിടുന്നുള്ള നിര്‍ദേശങ്ങള്‍ കൂടി ഉള്‍ക്കൊണ്ടു കെ.സി കരുനീക്കങ്ങള്‍ വേഗത്തിലാക്കി.

നേതാക്കള്‍ക്കിടയിലെ ഭിന്നതമുതലാക്കി രാഷ്ട്രീയ നേട്ടം കൊയ്യാമെന്നു കരുതിയ ബി.ജെ.പിയേയും കുത്തിത്തിരിപ്പിന് ഇറങ്ങിയ ചില മാധ്യമങ്ങളെയും നിരാശരാക്കി സിദ്ധരാമയ്യയുടെ ഫോണ്‍ ഡി.കെ ശിവകുമാറിനെത്തി.

രാവിലെ തന്റെ വീട്ടില്‍ കാവേരിയില്‍ ഒരുമിച്ചു പ്രഭാതഭക്ഷണം, അതിനു ശേഷം മാധ്യമങ്ങളെ കാണാം. ഇതായിരുന്നു സന്ദേശം. കാര്യങ്ങള്‍ കെസി വേണുഗോപാല്‍ കണക്കു കൂട്ടിയതു പോലെ കൃത്യം.

സിദ്ധരാമയ്യയുടെ വീട്ടിലെത്തിയ ഡികെ  ഊഷ്മളമായ സൗഹൃദം പങ്കിട്ടശേഷം, ഒരുമിച്ചുള്ള പ്രാതലിനു പിന്നാലെ ഇരുവരും മാധ്യമങ്ങളെ കണ്ടു ഹൈക്കമാന്‍ഡിന്റെ നിര്‍ദേശങ്ങള്‍ ശിരസാവഹിക്കുമെന്ന് അറിയിച്ചു.

കോണ്‍ഗ്രസിനെ ദുര്‍ബലപ്പെടുത്താനില്ലെന്നും ഒറ്റക്കെട്ടായി മുന്നോട്ടു പോകുമെന്നും ഇരുവരും നിലപാട് വ്യക്തമാക്കിയതോടെ കുറച്ച ദിവസമായി നിലനിന്ന സംഘര്‍ഭരിതമായ അന്തരീക്ഷത്തിനും അനിശ്ചിത്വത്തിനും അഭ്യൂവങ്ങള്‍ക്കും പൂര്‍ണ വിരമമായി.

പ്രതിസന്ധികളില്‍ കോണ്‍ഗ്രസിന്റെ പുതിയ മൃതസജ്ഞീവിനി കൂടി ആവുകയാണു കെസി. കെ.സി.യുടെ നയതന്ത്രമികവും സംഘടനാ മികവും കോണ്‍ഗ്രസിന് എക്കാലവും മുതല്‍ക്കൂട്ടു തന്നെയാകും എന്ന് പ്രതീക്ഷിക്കുന്നവർ ഏറെയാണ്.