എട്ടുവയസുകാരിയെ 29ാം നിലയിൽ നിന്ന് താഴേക്ക് വലിച്ചെറിഞ്ഞു കൊലപ്പെടുത്തി. പിന്നാലെ അമ്മയും ചാടി ജീവനൊടുക്കി

മുംബൈ: എട്ടുവയസുള്ള മകളെ 29-ാം നിലയിൽ നിന്ന് താഴെയെറിഞ്ഞ് കൊലപ്പെടുത്തിയ ശേഷം മാതാവ് ജീവനൊടുക്കി. മഹാരാഷ്ട്രയിലെ നവി മുംബൈയിലെ പനവേലിലാണ് സംഭവം. 

മൈഥിലി ദുവാ എന്ന 37കാരിയും 8 വയസുള്ള മകളുമാണ് മരിച്ചത്. ഫ്ലാറ്റിലെ 29-ാം നിലയിലായിരുന്നു യുവതിയും കുടുംബവും താമസിച്ചിരുന്നത്. 

യുവതി രാവിലെ തന്നെ മകളെയുമെടുത്ത് മുറിയിൽ കയറുകയായിരുന്നു. ഏറെ നേരമായിട്ടും കതക് തുറക്കാത്തതിനാൽ ഭർത്താവ് കതക് തുറക്കാൻ ആവശ്യപ്പെട്ടിരുന്നു.

ഈ സമയത്ത് മുറിക്കുള്ളിൽ നിന്ന് എട്ട് വയസുകാരിയും അമ്മയോട് മുറി തുറക്കാൻ ആവശ്യപ്പെട്ട് കരയുന്നതും കേട്ടിരുന്നുവെന്നാണ് ഭർത്താവ് ആശിഷ് വിശദമാക്കുന്നത്.

എന്നാൽ ബാൽക്കണിയിലെത്തിയ മൈഥിലി മകളെ ബാൽക്കണിയിൽ നിന്ന് താഴേക്ക് എറിഞ്ഞ ശേഷം കെട്ടിടത്തിൽ നിന്ന് ചാടി ആത്മഹത്യ ചെയ്യുകയായിരുന്നു. 

ഭർത്താവും ഫ്ലാറ്റിലെ ജീവനക്കാരും ചേർന്ന് ഇരുവരേയും ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. 

മൈഥിലി ഏറെക്കാലമായി മാനസിക സമ്മർദ്ദം നേരിട്ട് ചികിത്സയിലായിരുന്നതായാണ് ഭർത്താവ് വിശദമാക്കുന്നത്. എന്നാൽ ഭർത്താവിൽ നിന്നുള്ള പീഡനത്തേ തുടർന്നാണ്  യുവതി ജീവനൊടുക്കിയതെന്നാണ് മൈഥിലിയുടെ രക്ഷിതാക്കൾ ആരോപിക്കുന്നത്.