രാഷ്ട്രത്തെ അഭിസംബോധന ചെയ്ത് ജോ ബൈഡന്റെ വിടവാങ്ങല്‍ പ്രസംഗം ജനുവരി 15ന്

വാഷിങ്ടണ്‍: യു എസ് പ്രസിഡന്റ് ജോ ബൈഡന്‍ രാഷ്ട്രത്തെ അഭിസംബോധന ചെയ്ത് വിടവാങ്ങല്‍ പ്രസംഗം നടത്തുന്നു. ജനുവരി 15ന് ന്യൂയോര്‍ക്ക് സമയം രാത്രി 8 മണിക്കാണ് ബൈഡന്റെ വിടവാങ്ങല്‍ പ്രസംഗമെന്ന് വൈറ്റ് ഹൗസ് അറിയിച്ചു. ജനുവരി 20നാണ് ട്രംപ് പ്രസിഡന്റായി സ്ഥാനമേല്‍ക്കുന്നത്.

രാജ്യത്തിന്റെ ഭാവിയെ കുറിച്ചുള്ള സന്ദേശമാകും അദ്ദേഹത്തിന്റെ വിടവാങ്ങല്‍ പ്രസംഗമെന്നാണ് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നത്.

 ഒപ്പം തന്റെ ഭരണകാലയളവിലെ അഭിമാനകരമായ നേട്ടങ്ങളും പരാമര്‍ശിക്കും. നാലു വര്‍ഷം മുന്‍പ് വിടവാങ്ങല്‍ പ്രസംഗം നടത്തിയ ഡോണള്‍ഡ് ട്രംപ് ബൈഡന്‍ ഭരണകൂടത്തിന് ആശംസകള്‍ നേര്‍ന്നിരുന്നു. നേരത്തെ റെക്കോര്‍ഡ് ചെയ്ത പ്രസംഗമായിരുന്നു ഇത്.

ഓവല്‍ ഓഫീസില്‍ നിന്ന് ബൈഡന്‍ അവസാനമായി സംസാരിച്ചത് മത്സരത്തില്‍ നിന്ന് പിന്മാറാനുള്ള തീരുമാനത്തെക്കുറിച്ച് രാജ്യത്തെ അഭിസംബോധന ചെയ്തപ്പോഴാണ്.