നിങ്ങള്‍ ഈ സ്ഥലങ്ങള്‍ സന്ദര്‍ശിക്കുന്നത് ഒഴിവാക്കുക. പാക്കിസ്താനിലുള്ള യുഎസ് പൗരന്മാര്‍ക്ക് യുഎസ് സുരക്ഷാ മിഷന്റെ മുന്നറിയിപ്പ്

വാഷിംഗ്ടണ്‍: ഡിസംബര്‍ 16 വരെ പെഷവാറിലെ സെറീന ഹോട്ടലും പെഷവാര്‍ ഗോള്‍ഫ് ക്ലബ് ഉള്‍പ്പെടെയുള്ള പരിസര പ്രദേശങ്ങളും സന്ദര്‍ശിക്കുന്നത് ഒഴിവാക്കണമെന്ന് പാക്കിസ്താനിലുള്ള യുഎസ് പൗരന്മാര്‍ക്ക് യുഎസ് സുരക്ഷാ മിഷന്റെ മുന്നറിയിപ്പ്. 

നിരന്തരമായി ഭീകരവാദികളുടെ ഭീഷണികള്‍ കാരണം ഖൈബര്‍ പഖ്തൂണ്‍ഖ്വ പ്രവിശ്യയില്‍ യാത്ര ചെയ്യരുതെന്നും ഈ മേഖലയിലേക്കുള്ള യാത്രാ പദ്ധതികള്‍ പുനഃപരിശോധിക്കണമെന്നും മുന്നറിയിപ്പില്‍ വ്യക്തമാക്കി.

സുന്നി -  ഷിയാ വിഭാഗങ്ങള്‍ തമ്മില്‍ നടന്ന ഏറ്റുമുട്ടലില്‍ കുറഞ്ഞത് 10 പേര്‍ കൊല്ലപ്പെടുകയും 21 പേര്‍ക്ക് പരുക്കേല്‍ക്കുകയും ചെയ്ത സാഹചര്യത്തിലാണ് മുന്നറിയിപ്പ്. ഖൈബര്‍ പഖ്തൂണ്‍ഖ്വ പ്രവിശ്യയിലെ അഫ്ഗാനിസ്ഥാന്‍ അതിര്‍ത്തിയായ കുറം ജില്ലയില്‍ ചൊവാഴ്ചയാണ് ഏറ്റവും ഒടുവിലത്തെ ആക്രമണം നടന്നത്.

സെറീന ഹോട്ടല്‍ പെഷവാറും സമീപ പ്രദേശങ്ങളും ഒഴിവാക്കുക,അപ്ഡേറ്റുകള്‍ക്കായി പ്രാദേശിക വാര്‍ത്തകള്‍ നിരീക്ഷിക്കുകയും വ്യക്തിഗത സുരക്ഷാ നടപടികള്‍ വീണ്ടും വിലയിരുത്തുകയും ചെയ്യുക, ചുറ്റുപാടുകളെ കുറിച്ച് ശ്രദ്ധാലുവായിരിക്കുകയും തിരിച്ചറിയല്‍ രേഖ കൈവശം വയ്ക്കുകയും ചെയ്യുക, പ്രാദേശിക അധികാരികളുമായി സഹകരിക്കുക എന്നിങ്ങനെയാണ് മുന്നറിയിപ്പില്‍ പറഞ്ഞിരിക്കുന്നത്.