പത്തനംതിട്ട ജില്ലാ കളക്ടറുടെ ഔദ്യോഗിക വാഹനം കാറുമായി കൂട്ടിയിടിച്ച് അപകടം; കളക്ടർ ഉൾപ്പെടെ മൂന്ന് പേർക്ക് പരിക്ക്

പത്തനംതിട്ട: ജില്ലാ കളക്ടർ എസ്. പ്രേംകൃഷ്ണൻ സഞ്ചരിച്ച ഔദ്യോഗിക വാഹനം കോന്നിയിൽ അപകടത്തിൽപ്പെട്ടു.

മാമൂടിന് സമീപം വെച്ച് മറ്റൊരു കാറുമായി കൂട്ടിയിടിച്ച കളക്ടറുടെ വാഹനം നിയന്ത്രണം വിട്ട് തലകീഴായി മറിയുകയായിരുന്നു.

അപകടത്തിൽ കളക്ടറെ കൂടാതെ ഡ്രൈവർ കുഞ്ഞുമോൻ, ഗൺമാൻ മനോജ് എന്നിവർക്കും പരിക്കേറ്റിട്ടുണ്ട്. ഇവരെ പത്തനംതിട്ടയിലെ സ്വകാര്യ ആശുപത്രിയിൽ പ്രവേശിപ്പിച്ചു.

ആരുടെയും പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു.