എരമല്ലൂരില്‍ നിന്ന് കഞ്ചാവുമായി യുവാവ് പിടിയില്‍. 2.5 കിലോഗ്രാം കഞ്ചാവാണ് പിടികൂടിയത്

ആലപ്പുഴ: എരമല്ലൂരില്‍ നിന്ന് 2.5 കിലോഗ്രാം കഞ്ചാവുമായി യുവാവ് പിടിയില്‍. എഴുപുന്ന പഞ്ചായത്ത് ആറാം വാര്‍ഡ് സുബൈര്‍ മന്‍സിലില്‍ മുഹമ്മദ് ആസിഫിനെ(29) ആണ് എക്‌സൈസ് ആലപ്പുഴ സ്‌പെഷ്യല്‍ സ്‌ക്വാഡ് സിഐ മഹേഷും സംഘവും പിടികൂടിയത്. 

കഴിഞ്ഞ ദിവസം വൈകിട്ട് എരമല്ലൂര്‍ ജംങ്ഷന് സമീപത്ത് വെച്ച് ബൈക്കില്‍ പോവുകയായിരുന്ന രണ്ട് പേരുടെ ബാഗില്‍ നിന്ന് കഞ്ചാവ് റോഡില്‍ വീഴുകയും പിന്നാലെ മറ്റൊരു സ്‌കൂട്ടറില്‍ വന്ന ആസിഫ് ഇത് കൈക്കലാക്കുകയുമായിരുന്നു. 

സംഭവം അടുത്തുള്ള സിസിടിവി കാമറയില്‍ പതിയുകയും ആലപ്പുഴ എക്‌സൈസ് സൈബര്‍ സെല്‍ ഇത് സ്‌ക്വാഡ് ടീമിന് കൈമാറുകയും ചെയ്തു. പിന്നീട് പ്രതിയെ വീടിന് സമീപത്ത് നിന്ന് അറസ്റ്റ് ചെയ്യുകയായിരുന്നു.