രാഷ്ട്ര പുരോഗമനത്തിന് ജാഗ്രതയുള്ള പൗര സമൂഹം അനിവാര്യം: കേന്ദ്ര വിജിലന്‍സ് കമ്മീഷണര്‍

തൃശൂര്‍:  നിത്യജീവിതത്തില്‍ സത്യസന്ധതയും ഐക്യവും നിലനിര്‍ത്തണമെന്നും സാമൂഹിക ജാഗ്രതയുള്ള പൗര സമൂഹത്തിനു മാത്രമേ രാഷ്ട്ര പുരോഗമനത്തിന് സംഭാവന നല്‍കാന്‍ സാധിക്കുകയുള്ളു എന്നും കേന്ദ്ര വിജിലന്‍സ് കമ്മീഷണര്‍ എ എസ് രാജീവ്.

ഇസാഫ് സ്മോള്‍ ഫിനാന്‍സ് ബാങ്ക് മണ്ണുത്തിയില്‍ സംഘടിപ്പിച്ച വിജിലന്‍സ് ബോധവല്‍ക്കരണ വാരാചരണത്തില്‍ സംസാരിക്കുകയായിരുന്നു അദ്ദേഹം. 'രാഷ്ട്ര സമൃദ്ധിക്ക് സമഗ്രതയുടെ സംസ്‌കാരം' എന്ന വിഷയത്തിലൂന്നിയാണ് ഒരാഴ്ച നീണ്ടുനില്‍ക്കുന്ന ബോധവല്‍ക്കരണ പരിപാടികള്‍ സംഘടിപ്പിച്ചത്. 

ഇസാഫ് സ്മോള്‍ ഫിനാന്‍സ് ബാങ്ക് എംഡിയും സിഇഒയുമായ കെ പോള്‍ തോമസ് അധ്യക്ഷത വഹിച്ചു. ധാര്‍മ്മിക മൂല്യങ്ങളിലൂന്നിയുള്ള സാമൂഹിക ശാക്തീകരണത്തോടുള്ള ഇസാഫ് ബാങ്കിന്റെ പ്രതിബദ്ധത ദൈന്യംദിന പ്രവര്‍ത്തനങ്ങളിലൂടെയും വിവിധ കമ്മ്യുണിറ്റി പ്രോഗ്രാമുകളിലൂടെയും ഉറപ്പാക്കാന്‍ കഴിഞ്ഞതായി ഇസാഫ് സ്മോള്‍ ഫിനാന്‍സ് ബാങ്ക് എംഡിയും സിഇഒയുമായ കെ പോള്‍ തോമസ് പറഞ്ഞു.

ഇസാഫിന്റെ രാജ്യത്തുടനീളമുള്ള ശാഖകളിലൂടെ വിജിലന്‍സ് ബോധവല്‍ക്കരണ വാരാചരണം നടത്തി. ദേശീയതലത്തില്‍ ക്വിസ് മത്സരം, ബോധവല്‍ക്കരണ സെമിനാറുകള്‍, വിവിധ പ്രോഗാമുകള്‍ എന്നിവയും സംഘടിപ്പിച്ചു. വിജിലന്റ് വാരിയേഴ്‌സിനെ ആദരിക്കുകയും ക്വിസ് മത്സരത്തില്‍ വിജയികളായവര്‍ക്ക് അവാര്‍ഡ് നല്‍കുകയും ചെയ്തു.

 ചടങ്ങില്‍ ഇസാഫ് സ്മോള്‍ ഫിനാന്‍സ് ബാങ്ക് എക്സിക്യുട്ടീവ് വൈസ് പ്രസിഡന്റുമാരായ ജോര്‍ജ് തോമസ്, ഹരി വെള്ളൂര്‍, ഹേമന്ത് കുമാര്‍ തംത, ബോസ്‌കോ ജോസഫ്, ഗിരീഷ് സി പി, സുദേവ് കുമാര്‍ വി, വിജിലന്‍സ് മേധാവി എം സി പോള്‍, ഡെപ്യൂട്ടി വൈസ് പ്രസിഡന്റ്  ഗോപാലകൃഷ്ണന്‍ എന്നിവര്‍ സംസാരിച്ചു.