കോളേജ് വിദ്യാര്‍ത്ഥിയില്‍ നിന്ന് കഞ്ചാവ് മിഠായി പിടികൂടി. മൂന്ന് മാസമായി ഓണ്‍ലൈനില്‍ നിന്ന് വാങ്ങിയതെന്ന് പൊലീസ്. വിദ്യാര്‍ത്ഥിക്കെതിരെ കേസെടുത്തു

വയനാട്: വയനാട് ബത്തേരിയില്‍ കഞ്ചാവ് അടങ്ങിയ മിഠായി പിടികൂടി. ബത്തേരിയിലെ കോളേജ് വിദ്യര്‍ത്ഥിയില്‍ നിന്നാണ് കഞ്ചാവ് മിഠായി പിടിച്ചെടുത്തത്. വിദ്യര്‍ത്ഥി ഓണ്‍ലൈനില്‍ നിന്നാണ് കഞ്ചാവ് അടങ്ങിയ  മിഠായി വാങ്ങിയതെന്ന് പൊലീസ് പറയുന്നു. 

കഴിഞ്ഞ മൂന്ന് മാസമായി ഓണ്‍ലൈനിലൂടെ വാങ്ങിയ മിഠായി വിദ്യാര്‍ത്ഥി മറ്റ് വിദ്യാര്‍ത്ഥികള്‍ക്കിടയില്‍ വില്‍പ്പന നടത്തുന്നുണ്ടെന്നും പൊലീസ് കണ്ടെത്തി. കഴിഞ്ഞ ദിവസമായിരുന്നു സംഭവം. പൊലീസ് വിദ്യാര്‍ത്ഥിക്കെതിരെ കേസെടുത്തു.

സംശയാസ്പദമായ സാഹചര്യത്തില്‍ കണ്ട വിദ്യാര്‍ത്ഥികളെ ചോദ്യം ചെയ്തപ്പോഴാണ് കഞ്ചാവ് മിഠായി കണ്ടെത്തിയത്. മറ്റൊരു വിദ്യാര്‍ത്ഥിയാണ് നല്‍കിയതെന്ന് ഇവര്‍ മൊഴി നല്‍കി. 

തുടര്‍ന്ന് നടത്തിയ അന്വേഷണത്തില്‍ വിദ്യാര്‍ത്ഥികളില്‍ ഒരാളാണ് ഓണ്‍ലൈനിലൂടെ വാങ്ങി മുപ്പത് രൂപ നിരക്കില്‍ കഞ്ചാവ് മിഠായി വില്‍പ്പന നടത്തിയതെന്ന് വ്യക്തമായതായി പൊലീസ് പറഞ്ഞു. വിദ്യാര്‍ത്ഥികള്‍ക്കെതിരെ എന്‍ഡിപിഎസ് വകുപ്പ് പ്രകാരം കേസെടുത്തിട്ടുണ്ട്.