കോണ്‍ഗ്രസിന്റെ സൈബര്‍ ഗ്രൂപ്പുകള്‍ ഇപ്പോഴും നിയന്ത്രിക്കുന്നത് രാഹുല്‍ മാങ്കൂട്ടത്തിലും സംഘവും. അതിജീവിതയുടെ ചിത്രം പ്രചരിപ്പിച്ച്, അവരുടെ ഐഡന്റിറ്റി വെളിവാക്കിയത് കോണ്‍ഗ്രസ് നേതാക്കള്‍ ഉള്‍പ്പെടുന്ന സൈബർ ഗ്രൂപ്പില്‍ നടന്ന ഗൂഢാലോചനയെന്നു ആരോപണം. നീക്കം നടത്തിയത് രാഹുലിന്റെ വിശ്വസ്തര്‍

കോട്ടയം: കോണ്‍ഗ്രസിന്റെ സൈബര്‍ ഗ്രൂപ്പുകള്‍ നിയന്ത്രിക്കുന്നത് ഇപ്പോഴും രാഹുല്‍ മാങ്കൂട്ടത്തിലും സംഘവും. പാർട്ടിയിൽ നിന്ന് സസ്‌പെന്‍ഷനിലായതോടെ ഔദ്യോഗിക ഗ്രൂപ്പുകളില്‍ നിന്നു രാഹുലിനെ പുറത്താക്കിയെങ്കിലും പല നേതാക്കളും ഉള്‍പ്പെടുന്ന അനൗദ്യോഗിക ഗ്രൂപ്പുകളില്‍ രാഹുല്‍ തുടരുന്നുണ്ട്. ഔദ്യോഗിക ഗ്രൂപ്പുകളില്‍ രാഹുലിനെ പിന്തുണയ്ക്കുന്നവര്‍ രാഹുലിനു വേണ്ടി വാദിക്കുന്നു. ഇത്തരത്തില്‍ രാഹുലിനോട് അടുപ്പം ഉള്ള നേതാക്കള്‍ ഉള്ള ഗ്രൂപ്പില്‍ നിന്നാണ് അതിജീവിതയുടെ ചിത്രം പ്രചരിപ്പിച്ച്, അവരുടെ ഐഡന്റിറ്റി വെളിവാക്കിയതെന്ന ആരോപണം ശക്തമാണ്.

രാഹുല്‍ മാങ്കൂട്ടത്തിലിനെതിരെ പരാതി നല്‍കിയ യുവതിക്കെതിരെ കെ.പി.സി.സി ഡിജിറ്റല്‍ മീഡിയ സെല്‍ അംഗങ്ങളുടെ നേതൃത്വത്തില്‍ കടുത്ത സൈബര്‍ ആക്രമണമാണ് നടക്കുന്നത്. യുവതിയുടെ ഐഡന്റിറ്റി വെളിപ്പെടുത്താന്‍ വാട്സാപ്പ് ഗ്രൂപ്പില്‍ നിര്‍ദേശം നല്‍കി എന്നുള്ള ആരോപണങ്ങളും ഉയരുന്നുണ്ട്.

ഭയമില്ലാത്തവര്‍ ഇതുപോലെ പോസ്റ്റ് ചെയ്യണം എന്നാണു ഫോട്ടോ സഹിതം വാട്സാപ്പ് ഗ്രൂപ്പില്‍ പങ്കുവെച്ച് ആഹ്വാനം ചെയ്തിരിക്കുന്നത്. ആ ആഹ്വാനത്തിനു പിന്നാലെയാണു സാമൂഹിക മാധ്യമങ്ങളില്‍ വ്യാപകമായി യുവതിയുടെ ഫോട്ടോയും വീഡിയോയും പ്രത്യക്ഷപ്പെട്ടത്. അതേസമയം സൈബര്‍ ആക്രമണത്തിനെതിരെ യുവതി പോലീസില്‍ പരാതി നല്‍കി. സംഭവത്തില്‍ പോലീസ് പെണ്‍കുട്ടിയുടെ മൊഴി രേഖപ്പെടുത്തി.

തങ്ങള്‍ക്ക് സൈബർ ആക്രമണവുമായി ബന്ധമില്ലെന്നാണ് കോണ്‍ഗ്രസ് പക്ഷം. എന്നാല്‍, കോണ്‍ഗ്രസിലെ സമ്മുന്നത നേതാക്കള്‍ അടക്കം ഉള്‍പ്പെടുന്ന ഈ ഗ്രൂപ്പില്‍ നടന്ന ഗൂഢാലോചനയാണെന്നു കാണിക്കുന്ന തെളിവുകള്‍ ഉള്‍പ്പടെ സി.പി.എം നേതാവ് പി. സിരിന്‍ പുറത്തു വിട്ടിരുന്നു.

ഇത്രയൊക്കെയേയുള്ളൂ നിങ്ങളുടെ കടുത്ത അനുഭാവികളെ മാത്രം വര്‍ഷങ്ങളായി ഫില്‍ട്ടര്‍ ചെയ്ത് ചേര്‍ത്ത ഗ്രൂപ്പിന്റെ വിശ്വാസ്യത എന്ന് ഇനിയെങ്കിലും തിരിച്ചറിയുക. എന്നിട്ട്, അവനവന്‍ ഉപയോഗിക്കുന്ന വാട്‌സാപ്പ് നമ്പറുകള്‍ എന്നന്നേക്കുമായി ഉടന്‍ ഉപേക്ഷിക്കുക. ബിക്കോസ്, കേരള പോലീസ് ഈസ് ലുക്കിങ് ഫോര്‍ യൂ ആള്‍. പരാതി പോയിട്ടുണ്ട്. ആഹ്വാന പോസ്റ്റിട്ട മഹാന്റെ നമ്പര്‍ മാത്രമേ ഇപ്പോ ഞാനായിട്ട് ഇവിടെ പരസ്യപ്പെടുത്തുന്നുള്ളൂ. ഈ യന്ത്രം ഇനിയും പ്രവര്‍ത്തിപ്പിച്ചാല്‍ സകലതിന്റേയും നമ്പര്‍ പുറം ലോകം അറിയുമെന്നും സരിന്‍ പറയുന്നു.