മത്സരിക്കാനില്ലെന്ന് സുധാകരൻ; മത്സരിച്ചേ തീരുവെന്ന് നേതൃത്വം; പകരക്കാരുടെ പട്ടികയിൽ പേരുകളും അനവധി ! ചർച്ചകളിങ്ങനെ ഡൽഹിയിൽ തുടരുമ്പോൾ കാത്തിരിക്കാനാവില്ലെന്ന നിലപാടില്‍ പ്രവർത്തകർ; നേതൃത്വത്തിൻറെ തീരുമാനത്തിന് കാക്കാതെ കണ്ണൂരില്‍ സുധാകരന് വേണ്ടി പ്രചരണം തുടങ്ങി അണികള്‍

കണ്ണൂര്‍: കണ്ണൂരിൽ യു ഡി എഫ് സ്ഥാനാർത്ഥിയാരന്ന അനിശ്ചിതത്വം തുടരുന്നതിനിടെ കെ സുധാകരന് വേണ്ടി പ്രചാരണം തുടങ്ങി അണികൾ. ജില്ലയുടെ വിവിധ ഇടങ്ങളിൽ പോസ്റ്ററുകളും ഫ്ലക്സ് ബോർഡുകളും സ്ഥാപിച്ചാണ് പ്രവർത്തകർ തെരഞ്ഞെടുപ്പ് പ്രചാരണം തുടങ്ങിയത്. മത്സരിക്കാനില്ലെന്ന് സുധാകരൻ ആദ്യം നിലപാടെടുത്തിരുന്നു.

എന്നാല്‍ സുധാകരന്‍ മത്സരിച്ചേ തീരുവെന്നാണ് നേതൃത്വത്തിന്റെ തീരുമാനം. സുധാകരന്‍ മത്സരിച്ചില്ലെങ്കില്‍ പകരക്കാരുടെ പട്ടികയിൽ പേരുകൾ അനവധിയുണ്ട്. ചർച്ചകളിങ്ങനെ ഡൽഹിയിൽ തുടരുമ്പോൾ കാത്തിരിക്കാനാവില്ലെന്ന നിലപാടിലാണ് പ്രവർത്തകർ. നേതൃത്വത്തിൻറെ തീരുമാനത്തിനൊന്നും കാക്കാതെ കണ്ണൂരിലെ കോൺഗ്രസ് പ്രവർത്തകർ പണി തുടങ്ങിക്കഴിഞ്ഞു.

ദിവസങ്ങൾക്ക് മുന്നേ തന്നെ പലയിടങ്ങളിലും സ്ഥാനാർത്ഥിയുടെ പേരില്ലാതെ ചുവരെഴുത്തുകൾ പ്രത്യക്ഷപ്പെട്ടിരുന്നു. തീരുമാനം വരാൻ  വീണ്ടും വൈകിയതോടെയാണ് സുധാകരന് വേണ്ടി പോസ്റ്റർ ഒട്ടിച്ചും ഫ്ലകസ് വെച്ചും പ്രവർത്തകർ പ്രചാരണം തുടങ്ങിയത്. അഴീക്കോട്,കണ്ണൂർ സിററി തുടങ്ങിയ
പ്രദേശങ്ങളിലാണ് ഇന്നലെ രാത്രിയോടെ സുധാകരന് വോട്ടഭ്യർത്ഥിച്ച് പോസ്റ്ററുകൾ പ്രത്യക്ഷപ്പെട്ടത്.

ഉളിക്കൽ അടക്കമുളള മലയോര മേഖലകളിൽ ഫ്ലക്സുകളും  സ്ഥാപിച്ചിട്ടുണ്ട്. എന്തായാലും എം വി ജയരാജന് എതിരാളിയായി കെ സുധാകരൻ കളത്തിലിറങ്ങുമോ  എന്നറിയാൻ ഇനിയും രണ്ടോ മൂന്നോ ദിവസം കഴിയണം. എന്നിട്ട് വേണം നിൽക്കണോ പോണോ എന്ന് തീരുമാനിക്കാൻ എന്ന മൂഡിലാണ് സുധാകരൻറെ പ്രചാരണ ബോർഡുകൾ.