ഗവ. സൈബര്‍പാര്‍ക്കിലെ ക്രോണസ് സ്റ്റീല്‍ ഡീറ്റെയിലിംഗിന് അന്താരാഷ്ട്ര പുരസ്ക്കാരം

കോഴിക്കോട്: ഗവ. സൈബർപാർക്കിലെ ക്രോണസ് സ്റ്റീൽ ഡീറ്റൈലിംഗ്  കമ്പനിക്ക് അമേരിക്കയിലെ ബില്‍ഡ് ഫോര്‍വേഡ് കോണ്‍ഫറന്‍സ് പുരസ്ക്കാരം ലഭിച്ചു. യുഎസിലെ ഒമഹായോയില്‍ നടന്ന ചടങ്ങില്‍ കമ്പനി ഡയറക്ടർമാരായ  ജയഘോഷ് രാജേന്ദ്രനും വിനയദാസ് പി. വിജയനും പുരസ്‌കാരം ഏറ്റുവാങ്ങി.

അമേരിക്കയിലെ ഒമഹായിൽ നടന്ന ബിൽഡ് ഫോർവേഡ് കോൺഫറൻസിനു ഭാഗമായിട്ടാണ് ഈ അവാർഡ് ദാന ചടങ്ങ് സംഘടിപ്പിച്ചത്. ഇതിനു പുറമെ വിനയദാസ് പി. വിജയന് മികച്ച ഇന്നൊവേഷൻ പുരസ്‌കാരവും ലഭിച്ചു. ലോകമെമ്പാടുമുള്ള ആയിരത്തിലധികം പ്രമുഖ കമ്പനികൾ പങ്കെടുത്ത ഈ അന്താരാഷ്ട്ര പുരസ്ക്കാരവേദിയില്‍ ക്രോണസ് സ്റ്റീൽ ഡീറ്റൈലിംഗിന് ലഭിച്ച ഇരട്ട പുരസ്‌കാരം, സ്ഥാപനത്തിന്റെ അന്താരാഷ്ട്ര നിലവാരത്തിനുള്ള മികച്ച ഉദാഹരണമാണെന്ന് ജയഘോഷും വിനയദാസും പറഞ്ഞു.

അന്താരാഷ്ട്ര തലത്തിലെ ഈ നേട്ടത്തില്‍ ക്രോണസ് സ്റ്റീല്‍ ഡിറ്റെയിലിംഗിനെ അഭിനന്ദിക്കാന്‍ ഗവ. സൈബര്‍പാര്‍ക്കില്‍ യോഗം ചേര്‍ന്നു. ഈ നേട്ടം കേരളത്തിന്റെ ഐടി–വ്യവസായ രംഗത്തിനും, പ്രത്യേകിച്ച് സൈബർപാർക്കിനും അഭിമാന നിമിഷമാണെന്ന് സൈബര്‍പാര്‍ക്ക് സിഒഒ വിവേക് നായര്‍ അഭിപ്രായപ്പെട്ടു. ഇന്ത്യയിലെ തന്നെ പ്രധാനപ്പെട്ട ഐടി ഡെസ്റ്റിനേഷനായി കോഴിക്കോട്  മാറിയിരിക്കുകയാണെന്നും അദ്ദേഹം പറഞ്ഞു.

 2019-ൽ തുടങ്ങിയ ക്രോണസ് സ്റ്റീല്‍ ഡീറ്റെയലിംഗിന് കേരളത്തിലും മംഗലാപുരത്തുമായി 120 ഓളം ജീവനക്കാരുണ്ട്.

വയനാട് ചുരൽമല സ്വദേശിയാണ് ജയഘോഷ് രാജേന്ദ്രൻ. തൃശൂര്‍ ജില്ലയിലെ തിരുവില്വാമല സ്വദേശിയാണ് വിനയദാസ് പി. വിജയൻ.