/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2024/12/06/Hmz7AswXe2i5aClW3wYZ.jpg)
കോട്ടയം: എച്ച്ഐവി അണുബാധിതരോടുള്ള സഹാനുഭൂതി വര്‍ധിച്ചതും ബഹിഷ്‌കരണം വലിയൊരു പരിധിവരെ അവസാനിപ്പിക്കാനും കഴിഞ്ഞത് നേട്ടമാണെന്ന് അഡ്വ. സെബാസ്റ്റ്യന്‍ കുളത്തുങ്കല്‍ എം.എല്‍.എ അഭിപ്രായപ്പെട്ടു.
ലോക എയ്ഡ്സ് ദിനത്തോടനുബന്ധിച്ച് ആരോഗ്യ വകുപ്പിന്റെ നേതൃത്വത്തിലുള്ള ജില്ലാതല പൊതുസമ്മേളനം കാഞ്ഞിരപ്പള്ളി സെന്റ് ഡൊമിനിക് കോളജില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
അണുബാധിതര്‍ക്ക് തുല്യത ഉറപ്പുവരുത്താന്‍ ഇനിയുമേറെ മുന്നോട്ടുപോകാനുണ്ടെങ്കിലും അവരുടെ ജീവിതം സുരക്ഷിതമാക്കാന്‍ കഴിഞ്ഞിട്ടുണ്ട്. ഈ രംഗത്തെ ശക്തമായ ബോധവത്കരണവും ചികിത്സയിലുണ്ടായ വമ്പിച്ച മുന്നേറ്റവുമാണ് ഇതിന്റെ പ്രധാന കാരണമെന്നും അഡ്വ. സെബാസ്റ്റ്യന്‍ കുളത്തുങ്കല്‍ പറഞ്ഞു.
എച്ച്.ഐ.വി അണുബാധിതര്‍ക്കു പ്രമേഹം പോലെ തന്നെ ചികിത്സ നല്‍കാനും ആരോഗ്യകരമായ ജീവിതം നയിക്കാനും, കൃത്യമായി മരുന്ന് കഴിക്കുന്നതിലൂടെ രോഗപകര്‍ച്ച പൂര്‍ണമായും തടയാനും ആധുനിക ചികിത്സാ സംവിധാനങ്ങള്‍ക്ക് കഴിഞ്ഞിട്ടുണ്ടെന്നും ജില്ലാ മെഡിക്കല്‍ ഓഫീസര്‍ മുഖ്യപ്രഭാഷണത്തില്‍ പറഞ്ഞു.
അണുബാധ തുടക്കത്തിലേ കണ്ടെത്തി ചികിത്സിക്കാനായാല്‍ ആരോഗ്യകരമായ ജീവിതം സാധ്യമാണ്. കേരളത്തില്‍ അണുവ്യാപന തോത് 0.07 ശതമാനം ആയികുറയ്ക്കാന്‍ കൃത്യമായ രോഗ നിര്‍ണയത്തിലൂടെയും ചികിത്സയിലൂടെയും കഴിഞ്ഞിട്ടുണ്ട്.
ഒന്നിലേറെ പേരുമായി ലൈംഗിക ബന്ധത്തിലേര്‍പ്പെടുന്ന സ്ത്രീ ലൈംഗിക തൊഴിലാളികള്‍, സ്വവര്‍ഗാനുരാഗികളായ പുരുഷന്മാര്‍, മയക്കുമരുന്ന് കുത്തിവെയ്ക്കുന്നവര്‍ എന്നിവരുടെയിടയില്‍ ശക്തമായ പ്രവര്‍ത്തനങ്ങളാണ് സംസ്ഥാനത്ത് നടന്നു വരുന്നതെന്നും ഡി.എം.ഒ. പറഞ്ഞു.
യോഗത്തില്‍ കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്റ് അജിതാ രതീഷ് അധ്യക്ഷത വഹിച്ചു. പാറത്തോട് ഗ്രാമപഞ്ചായത്ത് പ്രസിഡന്റ് കെ.കെ. ശശികുമാര്‍ പ്രതിജ്ഞ ചൊല്ലിക്കൊടുത്തു. ചലച്ചിത്രതാരം ട്രിനിറ്റി എലിസ പ്രകാശ് മുഖ്യാതിഥിയായിരുന്നു.
ആരോഗ്യകേരളം ജില്ലാ പ്രോഗ്രാം മാനേജര്‍ ഡോ വ്യാസ് സുകുമാരന്‍, പ്രിന്‍സിപ്പല്‍ ഡോ. സീമോന്‍ തോമസ്, ഗ്രാമപഞ്ചായത്തംഗം ഷാലിമ്മ ജെയിംസ്, ജില്ലാ മാസ് മീഡിയ ഓഫീസര്‍ ടോമി ജോണ്‍, പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം, കെയര്‍ ആന്‍ഡ് സപ്പോര്‍ട്ട് കോഓര്‍ഡിനേറ്റര്‍ ജിജി തോമസ്, എന്‍.എസ്.എസ് പ്രോഗ്രാം ഓഫീസര്‍മാരായ ഡോ ജോജി തോമസ്, ഡോ. ജിനു എലിസബത്ത് സെബാസ്റ്റ്യന്‍ തുടങ്ങിയവര്‍ സംസാരിച്ചു.
തുടര്‍ന്ന് നടന്ന ബോധവത്കരണ സെമിനാര്‍ കോട്ടയം മെഡിക്കല്‍ കോളേജ് എച്ച് ഐ വി ചികിത്സാവിഭാഗത്തിലെ ഡോ. അഖില ജെ.എസ്. നയിച്ചു. ദിനാചരണത്തോടൊപ്പം എച്ച് ഡി.എഫ്.സി ബാങ്ക്, ലയണ്‍സ് ക്ലബ് എന്നിവരുടെ സഹകരണത്തോടെ നടന്ന സന്നദ്ധ രക്തദാന ക്യാമ്പ് കോട്ടയം എസ്. എച്ച് മെഡിക്കല്‍ സെന്റര്‍ നേതൃത്വം നല്‍കി. ക്യാമ്പില്‍ 50 വിദ്യാര്‍ത്ഥികള്‍ രക്തംദാനംചെയ്തു.
ലോക എയ്ഡ്സ് ദിനത്തോടനുബന്ധിച്ച് ആരോഗ്യ വകുപ്പിന്റെ നേതൃത്വത്തിലുള്ള ജില്ലാതല പൊതുസമ്മേളനം കാഞ്ഞിരപ്പള്ളി സെന്റ് ഡൊമിനിക് കോളജില്‍ അഡ്വ. സെബാസ്റ്റ്യന്‍ കുളത്തുങ്കല്‍ എം.എല്‍.എ ഉദ്ഘാടനം ചെയ്യുന്നു.