വിദേശ വിദ്യാഭ്യാസത്തിന്റെ കാലം അവസാനിച്ചോ? മുരളി തുമ്മാരുകുടി എഴുതുന്നു

കേരളത്തിലെ പത്രവാർത്തകളും വിദേശത്തു നിന്നു വരുന്ന "അയ്യോ ഇവിടം സ്വർഗ്ഗമാണെന്ന് കരുതിയ ഞങ്ങൾക്ക് പറ്റിപ്പോയി, ഇവിടെ ഇനി ഒരു ചാൻസും ഇല്ല, ആരും ഇങ്ങോട്ട് വരല്ലേ" എന്നുപറയുന്ന റീൽസുകളും മാത്രം ശ്രദ്ധിച്ചാൽ കേരളത്തിൽ നിന്നും വിദേശ വിദ്യാഭ്യാസത്തിനുള്ള ഒഴുക്കിന്റെ അവസാനമായി എന്ന് തോന്നാം. പക്ഷെ കൂടുതൽ ശ്രദ്ധിക്കേണ്ടത് വസ്തുതകൾ ആണല്ലോ.

2025 ജുലൈ 24 ന് ഒരു രാജ്യസഭാ ചോദ്യത്തിന് ഉത്തരമായി വിദേശകാര്യ സഹമന്ത്രി നൽകിയ ഉത്തരം ഈ വിഷയത്തിൽ താല്പര്യമുള്ളവർ ശ്രദ്ധിക്കേണ്ടതാണ്. 2020 മുതൽ 2024 വരെയുള്ള വർഷങ്ങളിൽ ഇന്ത്യയിൽനിന്നും വിദേശത്തേയ്ക്ക് പോയ വിദ്യാർത്ഥികളുടെ എണ്ണവും അവർ എവിടേക്ക് പോയി എന്നുമായിരുന്നു ചോദ്യം. അനുബന്ധമായി വേറെ കുറച്ചു ചോദ്യങ്ങളും ഉണ്ടായിരുന്നു.

2020 ൽ 180 രാജ്യങ്ങളിലേയ്ക്കായി 2,59,655 വിദ്യാർത്ഥികളാണ് വിദേശത്തേക്ക് പോയത്. ഇത് അതിവേഗത്തിൽ ഉയർന്ന് 2023 ആയപ്പോഴേക്കും 220 രാജ്യങ്ങളിലായി 8,92,899 വിദ്യാർത്ഥികളാണ് വിദേശത്തേക്ക് പോയത്.

2024 ൽ കാനഡയുമായിട്ടുണ്ടായ ഡിപ്ലോമാറ്റിക്ക് പ്രശ്നങ്ങൾ, കാനഡയിൽ തന്നെ വിദ്യാർത്ഥികളുടെ അതിവേഗത്തിലുണ്ടായ വരവ് അവിടുത്തെ ഹൗസിങ്ങ് മാർക്കറ്റിൽ ഉണ്ടാക്കിയ പ്രശ്നങ്ങൾ, UK യിലെ പുതിയ സർക്കാർ, വിദ്യാർത്ഥി കുടിയേറ്റ നിയമത്തിൽ വരുത്തിയ മാറ്റങ്ങൾ എല്ലാം കാരണം കുടിയേറ്റത്തിൽ കുറവുണ്ടായി. ഇതേ സമയത്താണ് അവിടെ ഏറെ നാളായി കുടിയേറിയിരുന്ന മറ്റ് ഇന്ത്യക്കാരും അടുത്തയിടെ എത്തിയ വിദ്യാർത്ഥികളും കാനഡയിലും UK യിലും എല്ലാം സാദ്ധ്യതകൾ അവസാനിച്ചു എന്ന മട്ടിൽ  റീലുകളിൽ നെഗറ്റീവ് റിവ്യൂവും ആയി ഇറങ്ങിയത്. ഇതും തള്ളിക്കയറ്റം കുറക്കാൻ കാരണമായി. എന്നാൽ വാസ്തവത്തിൽ നമ്മൾ മാധ്യമങ്ങളിൽ കാണുന്നത് പോലുള്ള മൊത്തമായി ഒരു ഇടിവ് വിദേശ വിദ്യാഭ്യാസത്തിന്റെ ഡിമാന്റിൽ ഉണ്ടായിട്ടുണ്ടോ?

ഇല്ല.

രണ്ടായിരത്തി ഇരുപത്തി നാലി 2024 ലും 7,59,064 വിദ്യാർത്ഥികളാണ് വിദേശത്തേക്ക് പോയത്. അതായത് 2020 ൽ പോയതിന്റെ ഏകദേശം മൂന്നിരട്ടി. 2023 ൽ പോയതിനേക്കാൾ കൂടുതൽ! അതുകൊണ്ട് വിദേശ വിദ്യാഭ്യാസത്തിന്റെ കാലം അവസാനിച്ചിട്ടൊന്നുമില്ല.

രാജ്യസഭ ഉത്തരം സശ്രദ്ധം പരിശോധിച്ചാൽ കാണുന്ന മറ്റു ചില വസ്തുതകൾ കൂടി ഉണ്ട്.

1. കഴിഞ്ഞ അഞ്ചു വർഷമായി അമേരിക്ക തന്നെയാണ് ഇന്ത്യയിൽ നിന്നും ഏറ്റവും കൂടുതൽ വിദ്യാർത്ഥികളെ ആകർഷിക്കുന്നത്. 2020 ൽ 60,000 ത്തിന് മുകളിൽ ആയിരുന്നത് 2025 ൽ രണ്ടുലക്ഷത്തിന് മുകളിൽ നിൽക്കുന്നു.

2. എണ്ണത്തിൽ ഏറ്റവും കൂടുതൽ വളർച്ച ഉണ്ടായത് കാനഡയിലേക്കാണ്. 2020 ൽ 40,000 ങ്ങളിൽ നിന്നത് 2023 ൽ 2,30,000 ത്തിൽ എത്തി. 2025 ൽ ഇത് ഒരു ലക്ഷത്തോളം ഇടിഞ്ഞു.

3. പൊതുവെ വിദ്യാർത്ഥി കുടിയേറ്റം കുറഞ്ഞ 2025 ലും ജർമ്മനിയിലേക്ക് ഉള്ള കുടിയേറ്റം കൂടിയിട്ടുണ്ട്. 2023 ൽ ഇരുപത്തി മൂവായിരം ആയിരുന്നത് 2024 ൽ 34,000 ആയി.

4. ഏറ്റവും കൂടുതൽ ആളുകൾ കുടിയേറിയിരുന്ന ലിസ്റ്റിൽ 2020 ൽ 6,723 കുട്ടികളുമായി ആറാം സ്ഥാനത്തുണ്ടായിരുന്ന ഉക്രൈൻ ഇപ്പോൾ 252 പേർ മാത്രമായി അറുപത്തിരണ്ടാം സ്ഥാനത്താണ്.

5. അതേസമയം 2020 ൽ 1,387 വിദ്യാർത്ഥികൾ മാത്രം പോയിരുന്ന റഷ്യൻ ഫെഡറേഷൻ ഇപ്പോൾ 31,444 ആളുകളുമായി അഞ്ചാം സ്ഥാനത്താണ്.

6. ആറാം സ്ഥാനത്ത് 29,232 ഇന്ത്യൻ വിദ്യാർത്ഥികളുമായി ബംഗ്ലാദേശ്  നിൽക്കുന്നു എന്നത് വാസ്തവത്തിൽ എന്നെ അതിശയിപ്പിച്ചു. മെഡിക്കൽ വിദ്യാഭ്യാസത്തിനാണ് പ്രധാനമായും റഷ്യ, ബംഗ്ലാദേശ്, ഫിലിപ്പൈൻസ്, ജോർജിയ, നേപ്പാൾ, ഉസ്‌ബെക്കിസ്ഥാൻ എല്ലാം കുട്ടികൾ തിരഞ്ഞെടുക്കുന്നത്. എത്ര ഇന്ത്യൻ വിദ്യാർത്ഥികൾ വിദേശത്ത് മെഡിസിന് പഠിക്കുന്നുണ്ടെന്നത് മനസ്സിലാക്കി നമ്മുടെ മെഡിക്കൽ വിദ്യാഭ്യാസ രംഗം വിപുലീകരിക്കേണ്ട കാലം കഴിഞ്ഞു.

7. 2024 ൽ ആദ്യത്തെ പത്തിൽ സ്ഥാനം നേടിയ രണ്ടു രാജ്യങ്ങൾ അയർലണ്ടും സിംഗപ്പൂരും ആണ്. ഇവിടെ രണ്ടിടത്തും 2024 നെ അപേക്ഷിച്ച് കൂടുതൽ കുട്ടികൾ അഡ്മിഷൻ നേടിയിട്ടുണ്ട് എന്നതും ശ്രദ്ധിക്കേണ്ട കാര്യമാണ്. അതായത് ചില രാജ്യങ്ങളിൽ കുറവുണ്ടായപ്പോൾ മറ്റു രാജ്യങ്ങളിൽ വർദ്ധനവ് ഉണ്ടായി. മൊത്തം ഡിമാൻഡിൽ കുറവുണ്ടായപ്പോഴും വിദേശ വിദ്യാഭ്യാസ വിപണി മൊത്തമായി കൂപ്പു കുത്തിയിട്ടില്ല. ഇതിൽ അതിശയിക്കാനില്ല.

കേരളത്തിൽ നിന്ന് (ഇന്ത്യയിൽ നിന്ന്, മറ്റു വികസിത രാജ്യങ്ങളിൽ നിന്ന്) പാശ്ചാത്യ വികസിത രാജ്യങ്ങളിലേക്കുള്ള വിദ്യാർത്ഥി കുടിയേറ്റത്തിന്റെ അടിസ്ഥാന കാരണങ്ങളിൽ ഇപ്പോഴും മാറ്റമില്ല. വികസിത രാജ്യങ്ങളിലെ സമ്പദ്‌വ്യവസ്ഥയിൽ താഴേത്തട്ടിലുള്ള തൊഴിലുകൾക്ക് വേണ്ടത്ര ആളുകളെ കിട്ടാതിരിക്കുന്നത്, ഇന്ത്യ പോലുള്ള അനവധി രാജ്യങ്ങളിൽ ഉന്നത വിദ്യാഭ്യാസം കഴിഞ്ഞവർക്ക് പോലും തൊഴിൽ ലഭിക്കാൻ ബുദ്ധിമുട്ടുളളത്, കിട്ടുന്ന തൊഴിലുകൾക്ക് ഒരു മധ്യവർഗ്ഗ ജീവിതം നയിക്കാനുള്ള ശമ്പളം കിട്ടാത്തത് എല്ലാം ഇപ്പോഴും പഴയത് പോലെ തുടരുന്നു. വിദേശ ‘വിദ്യാഭ്യാസ’ത്തിനായി പോകുന്ന വലിയൊരു ശതമാനം കുട്ടികൾ താഴേത്തട്ടിലുള്ള ഈ ലേബർ മാർക്കറ്റിനെ ആണ് ലക്ഷ്യമിടുന്നത്. പാശ്ചാത്യരാജ്യങ്ങളിലെ കുടിയേറ്റ നിയമങ്ങളിൽ മാറ്റം ഉണ്ടായി താഴേത്തട്ടിലുള്ള തൊഴിൽ രംഗത്തേക്ക് നേരിട്ട് ഇമ്മിഗ്രെഷൻ സാധ്യമാകുന്നത് വരെ ഈ തരത്തിലുള്ള ‘വിദ്യാഭ്യാസ കുടിയേറ്റം’ തുടരും.

ഞാൻ മുൻപ് പറഞ്ഞിട്ടുള്ളത് പോലെ വിദേശരാജ്യങ്ങളിലെ താഴേക്കിടയിലുള്ള ജോലിക്കുപോലും കിട്ടുന്ന മികച്ച ശമ്പളവും നാട്ടിൽ മികച്ച വിദ്യാഭ്യാസം ഉണ്ടെങ്കിലും ശരാശരി ശമ്പളത്തിൽ ഉള്ള ജോലിയെങ്കിലും ലഭിക്കാനുള്ള ബുദ്ധിമുട്ടും മാത്രമല്ല കേരളത്തിൽ നിന്നും വിദ്യാർത്ഥി കുടിയേറ്റത്തെ പ്രോത്സാഹിപ്പിക്കുന്നത്. വികസിത രാജ്യങ്ങളിലെപ്പോലെ കൂടുതൽ സ്വാതന്ത്ര്യം ഉളള, അച്ഛനമ്മമാരും ബന്ധുക്കളും നാട്ടുകാരും ഒന്നും അവരുടെ വസ്ത്രം മുതൽ പങ്കാളിയുടെ തിരഞ്ഞെടുപ്പ് വരെയുള്ള വിഷയങ്ങളിൽ ഇടപെടാത്ത ഒരു ജീവിതമാണ് നമ്മുടെ പുതിയ തലമുറ ഇപ്പോൾ ആഗ്രഹിക്കുന്നത്. അത് ഇപ്പോൾ കേരളത്തിൽ സാധ്യമല്ല. കേരളത്തിലെ സാമ്പത്തിക സാഹചര്യം മെച്ചപ്പെട്ടാൽ പോലും സാമൂഹ്യ സാഹചര്യം മാറുന്നത് വരെ പുറത്തേക്ക് പോകാനുള്ള കുട്ടികളുടെ ശ്രമം തുടരും.

ഇപ്പോൾ വിദേശ വിദ്യാഭ്യാസത്തെപ്പറ്റി ചിന്തിക്കുന്നവരോട് എന്താണ് പറയാനുള്ളത് ?

1. "വിദേശ വിദ്യാഭ്യാസത്തിന്റെ കാലം കഴിഞ്ഞു" "യു കെയിൽ, കാനഡയിൽ, ആസ്‌ട്രേലിയയിൽ ഇനി അവസരം ഇല്ല എന്നുള്ള തരം പ്രചാരണങ്ങളെ മുഖവിലക്കെടുക്കാതിരിക്കുക. അവിടെ എത്തിയ, ഇപ്പോഴും അവിടെ നിൽക്കുന്ന, ‘കഷ്ടപ്പെട്ടിട്ടും’ തിരിച്ചു വരാത്തവരാണ് ഈ പ്രചാരണത്തിന് മുന്നിൽ നിൽക്കുന്നത്. അവർ പറയുന്നതിൽ കാര്യമില്ല എന്നല്ല, പക്ഷെ അവർ പറയുന്നത് മാത്രമല്ല കാര്യം. വിദേശ വിദ്യാഭ്യാസവും കുടിയേറ്റവും തുടരും എന്ന് മാത്രമല്ല കൂടാനാണ് പോകുന്നത്. കേരളത്തിൽ നിന്നുള്ളവർ ലോകത്തെ വിദ്യാഭ്യാസ കുടിയേറ്റത്തിന്റെ ഒരു ശതമാനം പോലും വരില്ല. അപ്പോൾ നമ്മൾ പോയാലും ഇല്ലെങ്കിലും ലോകത്തിന് അതൊരു വിഷയമല്ല. പക്ഷെ അവസരങ്ങൾ അവസാനിച്ചു എന്നുള്ള ചിന്തകൊണ്ട് വിദേശ വിദ്യാഭ്യാസം എന്ന ഓപ്‌ഷൻ ഒഴിവാക്കരുത്.  1986 ൽ സിവിൽ എഞ്ചിനീയറിങ്ങ് കഴിഞ്ഞു ഗൾഫിൽ ഒരു ജോലി അന്വേഷിച്ച എന്നോട് “ഗൾഫിലെ അവസരങ്ങളുടെ കാലം ഒക്കെ കഴിഞ്ഞു" എന്ന്  പറഞ്ഞുമനസ്സിലാക്കിയ സുഹൃത്തിനെ ഇത്തരുണത്തിൽ ഓർക്കുന്നു. ഈശ്വരാ, ഭഗവാനെ, അദ്ദേഹത്തിന് നല്ലത് മാത്രം വരുത്തണെ!

2. നാട്ടിലെ പ്രീമിയർ ഇൻസ്റ്റിട്യൂഷനുകളിൽ പഠിച്ചതിന് ശേഷം വിദേശങ്ങളിലെ ഏറ്റവും നല്ല യൂണിവേഴ്സിറ്റികളിൽ പഠിക്കുന്നവർക്ക് നല്ല തൊഴിൽ അവസരങ്ങൾ ഇപ്പോഴും ലഭ്യമാണ്. പക്ഷെ ഇതൊരു വളരെ ചെറിയ ശതമാനത്തിന് മാത്രം സാധിക്കുന്ന കാര്യമാണ്, നാട്ടുകാരാണെങ്കിലും മറുനാട്ടുകാർ ആണെങ്കിലും.

3. പക്ഷെ കാനഡയും UK യും പോലുള്ള രാജ്യങ്ങളിലെ അനവധി വിദ്യാഭ്യാസ സ്ഥാപനങ്ങൾ നമ്മുടെ വിദ്യാഭ്യാസ സ്ഥാപനങ്ങളുടെ അത്രപോലും നിലവാരം ഉള്ളതല്ല. വിദേശ വിദ്യാഭ്യാസം തിരഞ്ഞെടുക്കുമ്പോൾ കൂടുതൽ നല്ല വിദ്യാഭ്യാസമാണോ അതോ അവിടുത്തെ കൂടുതൽ ശമ്പളവും സ്വാതന്ത്ര്യവുമുള്ള ജീവിതമാണോ പ്രധാനം എന്ന് നിങ്ങളോട് തന്നെ സത്യസന്ധമായി ചോദിക്കുക. ബിരുദധാരികൾക്ക്  ലഭിക്കാവുന്ന ജോലികൾക്ക് വേണ്ടിയല്ല അവിടങ്ങളിലെ ഇക്കോണമിയും ജനങ്ങളും കുടിയേറ്റക്കാരെ ആഗ്രഹിക്കുന്നത് എന്ന കാര്യം മനസ്സിൽ വക്കുക. പക്ഷെ നാട്ടിലെ ശരാശരി കോളേജിൽ നിന്നും വിദേശത്തെ  ശരാശരിയോ അതിന് താഴെയോ ഉളള വിദ്യാഭ്യാസസ്ഥാപനത്തിൽ എത്തി പഠിച്ചതിന് ശേഷം ആ  ബിരുദത്തിനോ ബിരുദാനന്തബിരുദത്തിനോ ചേർന്ന ജോലി ലഭിച്ചാൽ അതൊരു ബോണസ് ആയി കരുതുക. ഡിഫാൾട്ട് എന്ന് പറയുന്നത് നിങ്ങളുടെ യോഗ്യതക്കും താഴെയുള്ള തൊഴിലുകൾ ആയിരിക്കും. അതിന് തയ്യാറല്ലാത്തവർ വിദേശ വിദ്യാഭ്യാസം തിരഞ്ഞെടുക്കുന്നതിന് മുൻപ് രണ്ടാമത് ആലോചിക്കുന്നത് നല്ലതാണ്.

4. മറ്റേത് രംഗത്തേയും പോലെ വിദേശ വിദ്യാഭ്യാസരംഗത്ത് മുതൽ മുടക്കുമ്പോഴും നഷ്ട സാദ്ധ്യതകൾ ഉണ്ട്. ഒരു രാജ്യത്തിൻറെ സാമ്പത്തിക രംഗത്ത് ഉണ്ടാകുന്ന മാറ്റം, ഇമ്മിഗ്രെഷൻ നിയമങ്ങളിൽ ഉണ്ടാകുന്ന മാറ്റങ്ങൾ, രാഷ്ട്രീയ മാറ്റങ്ങൾ, യുദ്ധം, ദുരന്തം, കാലാവസ്ഥ, ഇതൊക്കെ നിങ്ങളുടെ പഠനത്തേയും തൊഴിൽ സാധ്യതയേയും ബാധിക്കാൻ സാധ്യത ഉണ്ട്. അങ്ങനെ ഒരു സാഹചര്യം ഉണ്ടായാൽ തിരിച്ചു നാട്ടിൽ പോകേണ്ടി വന്നാൽ നിങ്ങളുടെ കുടുംബത്തിന്റെ സാമ്പത്തിക അടിത്തറ തകരും എന്ന സാഹചര്യം ഉണ്ടെങ്കിൽ വിദേശ വിദ്യാഭ്യാസത്തിനായി ലക്ഷങ്ങൾ ലോണെടുത്തോ കിടപ്പാടം പണയം വച്ചോ പോകുന്നവർ താഴെ സുരക്ഷാവലയില്ലാത്ത സാമ്പത്തിക ട്രപ്പീസ് കളിക്കുകയാണ്.

അപ്പോൾ വിദേശ വിദ്യാഭ്യാസത്തിന്റെ കാലം കഴിഞ്ഞു എന്ന പൊതുബോധത്തിനിടയിലും ഞാൻ ഇപ്പോഴും ഈ രംഗത്ത് സാദ്ധ്യതകൾ ഉണ്ടെന്ന് വിശ്വസിക്കുന്ന ആളാണ്. രാജ്യസഭാ ചോദ്യത്തിന്റെ ഉത്തരവും അത് തന്നെയാണ് പറയുന്നത്. വസ്തുതകൾ മാറിയാൽ അപ്പോൾ വീണ്ടും എഴുതാം.

മുരളി തുമ്മാരുകുടി, നീരജ ജാനകി