ഐഎസ്ഡിസിയും മാർ ഇവാനിയോസ് കോളജും ധാരണാപത്രം ഒപ്പുവെച്ചു

തിരുവനന്തപുരം: ഇന്റർനാഷണൽ സ്കിൽ ഡെവലപ്മെന്റ് കോർപ്പറേഷൻ( ഐഎസ്ഡിസി), തിരുവനന്തപുരം മാർ ഇവാനിയോസ് ഓട്ടോണോമസ് കോളജുമായി ധാരണാപത്രം  ഒപ്പുവെച്ചു. വിദ്യാർത്ഥികൾക്ക് ലോകോത്തര നിലവാരമുള്ള എസിസിഎ അംഗീകൃത ബി.കോം കോഴ്സുകൾ നൽകുകയെന്ന ലക്ഷ്യത്തോടെയാണ് ഇരു സ്ഥാപനങ്ങളും പരസ്പര സഹകരണം ഉറപ്പാക്കുന്നത്. 

മാർ ഇവാനിയോസ് കോളജിൽ നടന്ന ചടങ്ങിൽ ഐഎസ്ഡിസി റീജിയണൽ മേധാവി ശരത് വേണുഗോപാൽ, കോളജ് പ്രിൻസിപ്പാൾ ഡോ. മീരാ ജോർജ്ജ് എന്നിവർ ധാരണാപത്രത്തിൽ ഒപ്പുവെച്ചു.

 സർട്ടിഫൈഡ് ചാർട്ടേഡ് അക്കൗണ്ടന്റുമാരുടെ ആഗോള സംഘടനനായ എസിസിഎയുടെ അംഗീകാരം  കരസ്ഥമാക്കുവാൻ പുതിയ പങ്കാളിത്തം സഹായകമാകുമെന്ന്  പ്രിൻസിപ്പാൾ ഡോ. മീര ജോർജ്ജ് പറഞ്ഞു. ആധുനിക കാലത്ത് വ്യവസായ മേഖല ആവശ്യപ്പെടുന്ന നൈപുണ്യം വിദ്യാർത്ഥികൾക്ക് ഉറപ്പുവരുത്തുകയെന്നത് തങ്ങളുടെ ലക്ഷ്യമാണെന്നും അവർ വ്യക്തമാക്കി.

 "ഉന്നത വിദ്യാഭ്യാസ മേഖലയിലെ വിദ്യാർത്ഥികൾക്ക് ആഗോള നിലവാരമുള്ള നൈപുണ്യം ഉറപ്പുവരുത്തുക, പുതിയ തൊഴിൽ അവസരങ്ങൾ പ്രയോജനപ്പെടുത്തുന്നതിന് വിദ്യാർത്ഥികളെ പ്രാപ്തമാക്കുക എന്നീ ലക്ഷ്യത്തോടെ രാജ്യത്തെ 300 -ൽ ഏറെ വിദ്യാഭ്യാസ സ്ഥാപനങ്ങളുമായും സർവകലാശാലകളുമായും സഹകരിച്ചുപ്രവർത്തിക്കുന്ന അന്താരാഷ്ട്ര വിദ്യാഭ്യാസ സ്ഥാപനമാണ് ഐഎസ്ഡിസി.  

എസിസിഎ സംയോജിത കോഴ്സുകളിലൂടെ മികച്ച പ്രൊഫഷണലുകളെ വാർത്തെടുക്കുവാൻ കഴിയും.  വിദ്യാർത്ഥികൾക്ക് തൊഴിൽ രംഗത്തെ മാറ്റങ്ങൾക്ക് അനുസരിച്ചുള്ള കാര്യങ്ങൾ പഠിക്കുവാനും  ലോകോത്തര നിലവാരമുള്ള സർട്ടിഫിക്കറ്റ്  കരസ്ഥമാക്കുവാനും പുതിയ പങ്കാളിത്തം വഴിയൊരുക്കും "- ഐഎസ്ഡിസി റീജിയണൽ മേധാവി ശരത് വേണുഗോപാൽ പറഞ്ഞു.

ചടങ്ങിൽ ഐഎസ്ഡിസി അസി. മാനേജർ അമൽ രാജ്, ബർസർ ഫാ. തോമസ് കൈയാലക്കൽ, വൈസ് പ്രിൻസിപ്പാൾ ഫാ. ഗീവർഗീസ് വലിയച്ചാങ്ങവീട്ടിൽ, കൊമേഴ്സ് വിഭാഗം മേധാവി ഡോ. സരിൻ തോമസ്,  കൊമേഴ്സ് വിഭാഗം (സെൽഫ് ഫിനാൻസ്) മേധാവി ഡോ. ജോർജ്ജി കെ.ഐ, കോളജ് പ്രോഗ്രാം കോർഡിനേറ്റർ (ബികോം അക്കൗണ്ട്‌സ് & ഓഡിറ്റ്) ഡോ. സാജോ ജോസഫ് എന്നിവർ പങ്കെടുത്തു