കുരങ്ങുകൾ തേങ്ങ പറിക്കുന്നത് കണ്ട് ഓടിച്ചു വിടാൻ ശ്രമിച്ച വീട്ടമ്മയെ തിരിച്ച് ആ​ക്രമിച്ച് കുരങ്ങുകൾ, 64കാരിയെ ശസ്ത്രക്രിയയ്‌ക്ക് വിധേയയാക്കി

കണ്ണൂർ: കുരങ്ങുകളുടെ തേങ്ങ കൊണ്ടുള്ള ആക്രമണത്തിൽ വീട്ടമ്മയുടെ കണ്ണിന് പരിക്ക്. ഇരട്ടി പടിയൂർ സ്വദേശിനി സതീദേവി (64)യുടെ കണ്ണിനാണ് പരിക്കേറ്റത്. 

വീടിന് പുറക് വശത്തെ തെങ്ങിൽ നിന്നും കുരങ്ങുകൾ തേങ്ങ പറിക്കുന്നത് ശ്രദ്ധയിൽപ്പെട്ട സതീദേവി ഇവയെ ഓടിക്കുന്നതിനായി വെളിയിലിറങ്ങുകയായിരുന്നു. മുകളിലേക്ക് നോക്കി ശബ്ദമുണ്ടാക്കി കുരങ്ങുകളെ ഓടിപ്പിക്കുന്നതിനിടെ തേങ്ങ പറിച്ച് മുഖത്തേക്കെറിയുകയായിരുന്നുവെന്ന് സതീദേവി പറഞ്ഞു.

ബഹളം കേട്ട് ഓടിയെത്തിയ നാട്ടുകാരും ബന്ധുക്കളുമാണ് ഇവരെ ആശുപത്രിയിലെത്തിച്ചത്. സതീദേവിയെ ശസ്ത്രക്രിയയ്‌ക്ക് വിധേയയാക്കി. കുരങ്ങിന്റെയും കാട്ടുപന്നിയുടെയും ശല്യം പ്രദേശത്ത് രൂക്ഷമായി വരികയാണെന്ന് നാട്ടുകാർ പറഞ്ഞു. കുരങ്ങുകൾ പലപ്പോഴും ഇത്തരത്തിൽ അക്രമകാരികളാകാറുണ്ട്. ഇവയെ തുരത്താനായി വനംവകുപ്പ് നടപടി സ്വീകരിക്കുന്നില്ലെന്ന് നാട്ടുകാർ ആരോപിച്ചു.