കെ ബി എഫ് ഇൻവിറ്റേഷൻസ് പ്രോഗ്രാം: ആറ്റിസ് റെസിസ്റ്റൻസ് അവതരിപ്പിക്കുന്ന 'ഗെറ്റോ ബിനാലെ വിത്ത് സ്പെക്ടർസ് ഓഫ് ഹിസ്റ്ററി' പ്രദർശനം തുടങ്ങി

കൊച്ചി: കൊച്ചി ബിനാലെ ഫൗണ്ടേഷൻ്റെ ഇൻവിറ്റേഷൻസ് പ്രോഗ്രാമിന് കീഴിൽ ആറ്റിസ് റെസിസ്റ്റൻസ് അവതരിപ്പിക്കുന്ന 'ഗെറ്റോ ബിനാലെ വിത്ത് സ്പെക്ടർസ് ഓഫ് ഹിസ്റ്ററി (2025)' പ്രദർശനം ആരംഭിച്ചു.  ഫോർട്ട് കൊച്ചി സെന്റ് ആൻഡ്രൂസ് പാരിഷ് ഹാളിൽ നടക്കുന്ന പ്രദർശനത്തിൽ ഹെയ്തിയിലെ പോർട്ട്-ഓ-പ്രിൻസിൽ നിന്നുള്ള ആറ്റിസ് റെസിസ്റ്റൻസ് എന്ന കലാകാരന്മാരുടെ സംഘമാണ്  കലാരൂപങ്ങൾ അവതരിപ്പിക്കുന്നത്.

കഥപറച്ചിലും പ്രകടനങ്ങളും തമ്മിലുള്ള ബന്ധമാണ് ഈ സൃഷ്ടികൾ വ്യക്തമാക്കുന്നത്.

ലഭ്യമായ പാഴ്വസ്തുക്കൾ ഉപയോഗിച്ചാണ് ഈ കലാകാരന്മാർ ശില്പങ്ങൾ നിർമ്മിക്കുന്നത്. എൻജിൻ ഭാഗങ്ങൾ, പഴയ ടെലിവിഷൻ സെറ്റുകൾ, മരക്കഷ്ണങ്ങൾ എന്നിവ ഇതിനായി ഉപയോഗിക്കുന്നു. ആഫ്രിക്കൻ പൈതൃകം, വൂഡൂ ആചാരങ്ങൾ, ഹെയ്തിയുടെ ചരിത്രം എന്നിവയാണ് ഇവരുടെ പ്രധാന പ്രമേയങ്ങൾ.

സാമ്പത്തിക സാഹചര്യങ്ങൾക്കനുസരിച്ചാണ് ഇവർ നിർമ്മാണ സാമഗ്രികൾ തിരഞ്ഞെടുക്കുന്നത്. സൈക്കിൾ ടയറുകൾ, പിസ്റ്റണുകൾ, സ്പ്രിംഗുകൾ എന്നിവയെല്ലാം ശില്പങ്ങളുടെ ഭാഗങ്ങളായി മാറുന്നു. മരിച്ചവരോടുള്ള ബഹുമാനസൂചകമായി ചില കലാകാരന്മാർ മനുഷ്യ അസ്ഥികളും സൃഷ്ടികളിൽ ഉൾപ്പെടുത്താറുണ്ട്. ഹെയ്തിയൻ വിപ്ലവത്തിന്റെ സ്വാധീനത്തെക്കുറിച്ചും ആഗോള കലാലോകത്തെ വിവേചനങ്ങളെക്കുറിച്ചും ഈ പ്രദർശനം ചർച്ച ചെയ്യുന്നു.

വിവിധ പ്രായത്തിലുള്ള കലാകാരന്മാരുടെ കൂട്ടായ്മയാണ് ആറ്റിസ് റെസിസ്റ്റൻസ്. ശില്പം, ചിത്രരചന എന്നിവയ്ക്ക് പുറമെ സംഗീതം, കവിത, വീഡിയോ, ഫോട്ടോഗ്രാഫി തുടങ്ങിയ മേഖലകളിലും ഇവർ പ്രവർത്തിക്കുന്നു. ഹെയ്തിയുടെ ചരിത്രവുമായും വിശ്വാസങ്ങളുമായും ബന്ധപ്പെട്ടാണ് ഇവരുടെ പ്രവർത്തനങ്ങൾ. പലപ്പോഴും ദുഷ്കരമായ സാഹചര്യങ്ങളിലാണ് ഇവർ ജോലി ചെയ്യുന്നത്.

സാധാരണക്കാരായ കലാകാരന്മാർക്ക് അന്താരാഷ്ട്ര തലത്തിൽ യാത്രാ സൗകര്യങ്ങൾ ലഭിക്കാത്തതിനെത്തുടർന്നാണ് 2009-ൽ ഇവർ 'ഗെറ്റോ ബിനാലെ' ആരംഭിച്ചത്. വിദേശ കലാകാരന്മാരെ തങ്ങളുടെ നാട്ടിലേക്ക് ക്ഷണിച്ച് ഒന്നിച്ച് പ്രവർത്തിക്കാനാണ് ഇതിലൂടെ ശ്രമിക്കുന്നത്. കഴിഞ്ഞ 12 വർഷത്തിനിടെ മുന്നൂറിലധികം വിദേശ കലാകാരന്മാർ ഇവരോടൊപ്പം ചേർന്ന് പ്രവർത്തിച്ചിട്ടുണ്ട്.