ഇഡിയേയും സിബിഐയേയും രാഷ്ട്രീയ ആയുധങ്ങളാക്കി കേന്ദ്രം ജനാധിപത്യത്തെ കശാപ്പ് ചെയ്യുന്നു. വിമർശനങ്ങൾക്ക് കോൺഗ്രസിന്റെ ഉൾപ്പാർട്ടി സ്വാതന്ത്ര്യമാണ് ശക്തി, പിണറായി മോദി നയങ്ങൾ നടപ്പാക്കുന്നതിൽ തിടുക്കമെന്നും കെ.സി. വേണുഗോപാൽ. തദ്ദേശ തെരഞ്ഞെടുപ്പില്‍ ജനങ്ങളുടെ മനസ്സ് യുഡിഎഫിനൊപ്പമെന്നും കെ.സി

കൊച്ചി: ഇഡിയും സിബിഐയും കോണ്‍ഗ്രസിനേയും പ്രതിപക്ഷത്തെയും ഉന്നം വെയ്ക്കാനുള്ള ഏജന്‍സികളാണെന്ന് എഐസിസി സംഘടനാ ചുമതലയുള്ള ജനറല്‍ സെക്രട്ടറി കെസി വേണുഗോപാല്‍ എംപി. അവരെത്ര കേസെടുത്താലും ഒന്നുമില്ല. അതൊന്നും കൊണ്ട് പേടിക്കുന്നില്ലെന്നും അദ്ദേഹം പറഞ്ഞു.

നാഷണല്‍ ഹെറാള്‍ഡ് കേസില്‍ സോണിയാ ഗാന്ധിക്കും രാഹുല്‍ ഗാന്ധിക്കും എതിരെ എഫ് ഐആര്‍ ഇടാനുള്ള നടപടി സംബന്ധിച്ച ചോദ്യത്തോട് പ്രതികരിക്കുക ആയിരുന്നു കെസി വേണുഗോപാല്‍. 

കേന്ദ്ര അന്വേഷണ ഏജന്‍സികളെയും തെരഞ്ഞെടുപ്പ് കമ്മീഷനേയും കൂട്ടി ജനാധിപത്യത്തെ കശാപ്പ് ചെയ്യുന്ന നടപടികളാണ് നടക്കുന്നതെന്നും വേണുഗോപാല്‍ പറഞ്ഞു.

തെരഞ്ഞെടുപ്പ് കമ്മീഷന്‍ പോലും ഒരു ഭാഗം പിടിക്കുകയാണ്. പൗരന്‍മാരുടെ വോട്ട് മാറ്റാനുള്ള ബിജെപിയുടെ എക്‌സര്‍സൈസാണ് എസ് ഐ ആര്‍. കേരളത്തിലത് സിപിഎം ചെയ്യുന്നു.

വിമര്‍ശനങ്ങൾ കോണ്‍ഗ്രസിലെ സ്വതന്ത്ര ഉള്‍പ്പാര്‍ട്ടി ജനാധിപത്യത്തിന്റെ മനോഹാരിത:

ശശി തരൂരിന്റെ പരാമര്‍ശം ചൂണ്ടിക്കാട്ടിയുള്ള മാധ്യമ പ്രവര്‍ത്തകരുടെ ചോദ്യത്തോടും കെസി വേണുഗോപാല്‍ പ്രതികരിച്ചു. പാര്‍ട്ടിക്കുള്ളില്‍ നിന്ന് വിമര്‍ശിക്കാന്‍ കഴിയുന്നവെന്നതാണ് കോണ്‍ഗ്രസിന്റെ ഉള്‍പ്പാര്‍ട്ടി ജനാധിപത്യത്തിന്റെ മനോഹാരിത. 

അഭിപ്രായസ്വാതന്ത്രത്തിന് കോണ്‍ഗ്രസ് നല്‍കുന്ന പ്രധാന്യം കൂടിയാണത്. ബിജെപിയില്‍ നിന്ന് കൊണ്ട് രാഹുല്‍ ഗാന്ധിയെ പുകഴ്ത്തിയിരുന്നെങ്കില്‍ ഒരു നിമിഷം അങ്ങനെയുള്ള നേതാവിന് ആ പാര്‍ട്ടിയില്‍ തുടരാന്‍ സാധിക്കുമോ ? സിപിഎമ്മില്‍ നില്‍ക്കുന്ന ഒരാള്‍ക്ക് ഇങ്ങനെ പറയാന്‍ കഴിയുമോ ? 

തന്നെ ജയിപ്പിക്കാന്‍ ശ്രമിച്ച പ്രവര്‍ത്തകരുടെ കഠിനാധ്വാനത്തെ കുറിച്ചും എതിര്‍ത്ത് തോല്‍പ്പിക്കാന്‍ ശ്രമിച്ചവരുടെ മലീമസമായ പ്രചരണത്തെ കുറിച്ചും ഇത്തരം വിമര്‍ശനങ്ങള്‍ പറയുന്നവരാണ് ആലോചിക്കേണ്ടതെന്നും കെസി വേണുഗോപാല്‍ പറഞ്ഞു.

പിണറായിക്ക് മോദി സര്‍ക്കാരിന്റെ പരിപാടികള്‍ നടപ്പാക്കാന്‍ തിടുക്കം

മോദി സര്‍ക്കാരിന്റെ പരിപാടികള്‍ നടപ്പിലാക്കാനുള്ള തിടുക്കമാണ് പിണറായി വിജയനുള്ളത്. മോദിക്ക് വിധേയനായ പിണറായി വിജയന്‍ സര്‍ക്കാര്‍ ജനവിരുദ്ധ, വര്‍ഗീയ നയങ്ങള്‍ കേരളത്തില്‍ നടപ്പിലാക്കുകയാണ്. 

ബിജെപിയുമായുള്ള രഹസ്യ ധാരണയുടെ അടിസ്ഥാനത്തിലാണ് തെരഞ്ഞെടുപ്പില്‍ സിപിഎം മുന്നോട്ട് പോകുന്നത്. പരാജയം തിരിച്ചറിഞ്ഞ് വിഷയം മാറ്റാനുള്ള ശ്രമമാണ് അവരിപ്പോള്‍ നടത്തുന്നത്. 

രാഹുല്‍ മാങ്കൂട്ടത്തില്‍ വിഷയത്തില്‍ കോണ്‍ഗ്രസ് ഒളിച്ചോടിയിട്ടില്ല.  മറ്റേത് പാര്‍ട്ടിയേക്കാളും കൃത്യമായ നിലപാടും നടപടിയും കോണ്‍ഗ്രസ് എടുത്തുവെന്നും കെസി വേണുഗോപാല്‍ പറഞ്ഞു.

തദ്ദേശ തെരഞ്ഞെടുപ്പില്‍ ജനങ്ങളുടെ മനസ്സ് യുഡിഎഫിനൊപ്പം. തദ്ദേശ സ്ഥാപനങ്ങളുടെ അധികാരവും സാമ്പത്തികവും എല്‍ഡിഎഫ് സര്‍ക്കാര്‍ വെട്ടിക്കുറച്ചു. പ്രതിവര്‍ഷം 2000 കോടിയുടെ പദ്ധതിവിഹിതമാണ് സര്‍ക്കാര്‍ വെട്ടിമാറ്റിയത്.

ജനങ്ങള്‍ ഈ സര്‍ക്കാരിനെ മടുത്തു. അത് തെരഞ്ഞെടുപ്പിലും പ്രതിഫലിക്കും. ജനങ്ങളുടെ ജീവല്‍ പ്രശ്‌നങ്ങള്‍ ഉയര്‍ത്തിയാണ് യുഡിഎഫ് തെരഞ്ഞെടുപ്പിനെ നേരിടുന്നത്. 

ആരോഗ്യമേഖല കുത്തഴിഞ്ഞു. നമ്പര്‍ വണ്‍ കേരളമെന്ന് മുഖ്യമന്ത്രി വിദേശത്ത് പോയി പ്രംസഗിക്കുമ്പോഴാണ് ഇവിടെ ആളുകള്‍ മരിക്കുന്നത്. വിദ്യാഭ്യാസ രംഗത്തെ പിഎം ശ്രീ വിവാദം യുഡിഎഫ് ഉണ്ടാക്കിയതല്ലെന്നും കെസി വേണുഗോപാല്‍ പറഞ്ഞു.