ഉഴവൂരിലെ ഇ.ജെ ലുക്കോസ് സ്മാരക ഫ്ളഡ് ലൈറ്റ് സ്റ്റേഡിയം ഞായറാഴ്ച നാടിന് സമർപ്പിക്കും

ഉഴവൂർ: കോട്ടയം ജില്ലയിലെ ഉഴവൂർ എന്ന കൊച്ചു ഗ്രാമത്തെ പുരോഗതിയുടെപാതയിലേക്ക് നയിക്കുകയും രാഷ്ട്രീയ സാമൂഹ്യ സാമുദായിക രംഗങ്ങളിൽ നേതൃത്വം വഹിച്ച് കാലയവനികക്കുള്ളിൽ മറഞ്ഞവരുമായ മഹത് വ്യക്തികളെ ഉഴവൂരിലെ പുതുതലമുറ എന്നും  ഓർക്കുന്നതിനായി ഇവരുടെ അര്‍ദ്ധകായ പ്രതിമകള്‍ അനാച്ഛാദനം ചെയ്യുന്നു.

ഉഴവൂരിൽ നാല് ശതാബ്ദങ്ങൾക്ക് മുൻപ് സെൻ്റ് സ്റ്റീഫൻസ് ദേവാലയം നിർമ്മിച്ച കുമ്മനത്ത് ഇട്ടൂപ്പ് കത്തനാര്‍, ഉഴവൂരിന്റെ എല്ലാ വികസനങ്ങൾക്കും വർഷങ്ങൾക്കു മുൻപ് അടിസ്ഥാനമിട്ട മുൻ എംഎൽഎ  ജോസഫ്  ചാഴികാടന്‍, ഉഴവൂരിൽ നിന്നും വിശ്വ പൗരന്റെ പദവിയിലേക്കുയർന്ന മുൻ രാഷ്ട്രപതി ഡോ. കെ ആർ നാരായണന്‍, രാഷ്ട്രീയ സാമുദായിക രംഗങ്ങളിൽ തന്റേതായ വ്യക്തിമുദ്ര പതിപ്പിച്ച മുൻ എംഎൽഎ ഇ.ജെ ലൂക്കോസ് എള്ളങ്കിൽ എന്നിവരുടെ അർദ്ധകായ പ്രതിമകളുടെ അനാച്ഛാദനം ഉഴവൂർ സെന്റ് സ്റ്റീഫൻസ് പള്ളിയുടെ പ്രവേശന കവാടത്തിന് സമീപം മെയിൻ റോഡ് സൈഡിൽ പ്രത്യേകം നിർമ്മിച്ചിരിക്കുന്ന ഗാലറിയിൽ ഞായറാഴ്ച അഞ്ചിന് നിർവ്വഹിക്കും.  

തുടർന്ന് ഹയർ സെക്കൻഡറി സ്കൂളിന് മുൻവശത്തായി ഗ്രൗണ്ടിൽ മുൻ ഇ.ജെ ലൂക്കോസ് എള്ളങ്കിൽ മെമ്മോറിയൽ ചാരിറ്റബിൾ ട്രസ്റ്റ് നേതൃത്വം നൽകി ഒന്നേകാൽ കോടിയിൽ അധികം രൂപ മുതൽമുടക്കി ചുറ്റിലും ഗ്യാലറി, വ്യായാമത്തിനുള്ള നടപ്പാത, ഫ്ലഡ് ലൈറ്റുകൾ, വിഐപി പവലിയൻ എന്നിങ്ങനെ എല്ലാ ആധുനിക സൗകര്യങ്ങളോടും കൂടി കേരളത്തിലെ തന്നെ മികച്ച ഫുട്ബോൾ സ്റ്റേഡിയമായ ഇ.ജെ ലൂക്കോസ് എള്ളങ്കിൽ മെമ്മോറിയൽ സ്റ്റേഡിയത്തിന്റെ ഉദ്ഘാടനവും ഉഴവൂരിൽ നടക്കും. 

ഫാ.ഇട്ടൂപ്പ് കത്തനാരുടെ പ്രതിമ അനാച്ഛാദനം കോട്ടയം അതിരൂപത വികാരി ജനറാൾ ഫാ. തോമസ് ആനിമൂട്ടിലും, മുൻ രാഷ്ട്രപതി ഡോ കെ.ആർ നാരായണന്റെ പ്രതിമ അനാച്ഛാദനം കൃഷി വകുപ്പ് മന്ത്രി പി. പ്രസാദും, മുൻ എംഎൽഎ ജോസഫ് ചാഴികാടൻ്റെ പ്രതിമ അനാച്ഛാദനം തിരുവഞ്ചൂർ രാധാകൃഷ്ണൻ എംഎൽഎയും, മുൻ എംഎൽഎ ഇ.ജെ ലൂക്കോസ് പ്രതിമ അനാച്ഛാദനം പി.ജെ ജോസഫ് എംഎൽഎയും നിർവഹിക്കും.

അഡ്വ . മോൻസ് ജോസഫ് എംഎൽഎ അധ്യക്ഷത വഹിക്കും. കോട്ടയം അതിരൂപത മെത്രാപ്പോലീത്ത മാർ മാത്യു മൂലക്കാട്ട് അനുഗ്രഹ പ്രഭാഷണം നടത്തും. കെ.എം ജോസഫ്, സാബു മാത്യു, ഫ്രാൻസിസ് ജോർജ് എം.പി, മാണി സി കാപ്പൻ എംഎൽഎ, മുൻ എം.പി തോമസ് ചാഴികാടൻ, ഉഴവൂർ പള്ളി വികാരി ഫാദർ അലക്സ് ആക്കപറമ്പിൽ, ഉഴവൂർ ബ്ലോക്ക് പഞ്ചായത്ത് പ്രസിഡന്റെ രാജു ജോൺ ചിറ്റേടത്ത്, സെനിത്ത് ലൂക്കോസ്, സജോസൈമൺ എന്നിവർ പങ്കെടുത്തു പ്രസംഗിക്കും. തുടർന്ന് കലാസന്ധ്യ നടത്തപ്പെടും.