ലോക്സഭാ തെരഞ്ഞെടുപ്പ്: കുറഞ്ഞ പോളിങ്ങ് ശതമാനത്തെ ചൊല്ലിയുള്ള ചർച്ചകൾ അവസാനിക്കുന്നില്ല; ഒപ്പം നിന്ന ആരെങ്കിലും കാലുവാരിയോയെന്ന ആശങ്കയിൽ സ്ഥാനാർഥികൾ ! ആശങ്കയേറെയും യു.ഡി.എഫിൽ

കോട്ടയം: ലോക്സഭാ തെരഞ്ഞെടുപ്പിൽ കുറഞ്ഞ പോളിങ്ങ് ശതമാനത്തെ ചൊല്ലിയുള്ള ചർച്ചകൾ അവസാനിക്കുന്നില്ല. ഒപ്പം നിന്ന ആരെങ്കിലും കാലുവാരിയോ എന്ന ആശങ്കയും മുന്നണികൾക്കുണ്ട്.

യു.ഡി.എഫിൽ സ്ഥാനാർഥി കെ. ഫ്രാൻസിസ് ജോർജിൻ്റെ കേരളാ കോൺഗ്രസിന് സംശയം കോൺഗ്രസിനെയാണ്. കോട്ടയം സീറ്റ് കേരളാ കോൺഗ്രസിന് ലഭിച്ചതു മുതൽ ജില്ലയിലെ കോൺഗ്രസ് നേതൃത്വം അതൃപ്തരായിരുന്നു. അതിനു കാരണം കോൺഗ്രസ് ജില്ലയായ കോട്ടയത്ത് നേതാക്കൻമാർ മാത്രമുള്ള കേരളാ കോൺഗ്രസ് മത്സരിക്കുന്നു എന്നുള്ളതായിരുന്നു.

കേരളാ കോൺഗ്രസ് (എം) യു.ഡി.എഫ് പക്ഷത്തായിരുന്നപ്പോൾ കേരളാ കോൺഗ്രസ് എമ്മിൻ്റെ സീറ്റായിരുന്നു കോട്ടയം. പിന്നീട് കേരളാ കോൺഗ്രസ് (എം) യു.ഡി.എഫിൽ നിന്ന് പുറത്താക്കപ്പെട്ടപ്പോൾ കോട്ടയത്ത് മത്സരിക്കാൻ സ്വപ്നം കണ്ട പല നേതാക്കളും കോൺഗ്രസിൽ ഉണ്ടായിരുന്നു. എന്നാൽ യു.ഡി.എഫ് സംസ്ഥാന നേതൃത്വം വിട്ടുവീഴ്ചകൾക്ക് തയ്യാറായതോടെ കോട്ടയത്ത് കേരളാ കോൺഗ്രസ് മത്സരിക്കുകയായിരുന്നു. പിന്നാലെ മോൻസ് ജോസഫ് എം.എൽ.എയുടെ നേതൃത്വത്തിൽ പ്രചാരണം സംബന്ധിച്ചുള്ള തീരുമാനങ്ങൾ സ്വീകരിച്ചു തുടങ്ങി.  

കോൺഗ്രസുമായി കൂടിയാലോചനകൾ നടത്താതെ തീരുമാനം എടുത്ത് ഡി.സി.സിയെ അറിയിക്കുക മാത്രമാണ് ചെയ്തത്. ഇതോടെ പ്രചാരണത്തിന് കോൺഗ്രസ് നേതാക്കൾ ഒപ്പം ഉണ്ടായിരുന്നെങ്കിലും തഴെത്തട്ടിൽ കോൺഗ്രസിൻ്റെ സംഘടനാ പ്രവർത്തനങ്ങൾ നിർജീവമായിരുന്നു.

 ഒടുവിൽ പ്രതിപക്ഷ നേതാവ് വി.ഡി സതീശനടക്കം ഇടപെട്ടതോടെയാണ് പ്രചാരണത്തിൻ്റെ അവസാന നാളുകളിൽ സംഘടനാ സംവിധാനം ചലിച്ചു തുടങ്ങിയത്. ഇതും പോളിങ്ങിനെ എത്രത്തോളം ബാധിച്ചെന്ന ആശങ്കയും കേരളാ കോൺഗ്രസിനുണ്ട്. പുതുപ്പള്ളി ഉപതെരഞ്ഞെടുപ്പിൽ പോളിങ്ങ് കുറഞ്ഞിട്ടും ജയിച്ചത് എടുത്തു പറഞ്ഞാണ് കോൺഗ്രസ് നേതാക്കൾ ആശങ്കകൾക്ക് മറുപടി നൽകുന്നത്.

പല അവകാശവാദങ്ങൾ ഉന്നയിക്കുന്ന എൻ.ഡി.എയിലും ആശങ്ക പുകയുന്നുണ്ട്. കഴിഞ്ഞ തവണ പി.സി തോമസ് നേടിയ 1.55 ലക്ഷം വോട്ടുകൾ തുഷാറിന് വെല്ലുവിളി തന്നെയാണ്. എൽഡി.എഫിൻ്റെ എസ്.എൻ.ഡി.പി വോട്ടുകൾ പിടിച്ചെടുത്തെന്ന് അവകാശപ്പെടുന്ന ബി.ഡി.ജെ.എസ് പ്രതീക്ഷിക്കുന്നത് രണ്ട് ലക്ഷം വോട്ടുകളാണ്. എന്നാൽ, പ്രതീക്ഷിച്ചത് പോലെ സി.പി.എം. വോട്ടുകൾ ബി. ഡി.ജെ.എസിലേക്ക് മറിഞ്ഞില്ലെങ്കിൽ അത് തുഷാറിൻ്റെ പ്രതിച്ഛായയ്ക്കും കളങ്കമാകും.

പടിഞ്ഞാറന്‍ മേഖലയില്‍ ഉള്‍പ്പെടെ വോട്ടിങ് ശതമാനത്തിലുണ്ടായ വ്യത്യാസം എന്‍.ഡി.എയുടെ ആത്മവിശ്വാസം വര്‍ധിപ്പിക്കുമ്പോഴും വൈക്കം, ഏറ്റുമാനൂർ മണ്ഡലങ്ങളിലെ ഉയർന്ന പോളിങ് അനുകൂലമാണെന്ന അവകാശവാദങ്ങളിൽ കഴമ്പുണ്ടോയെന്നറിയാൻ ഫലം വരുന്നതുവരെ കാത്തിരിക്കണം. 

ഇടതിൻ്റെ മുഴുവന്‍ വോട്ടുകളും പെട്ടിയിലായെന്നും പോളിങ് ശതമാനത്തിലെ ഏറ്റക്കുറച്ചിൽ വിജയത്തെ സ്വാധീനിക്കില്ലെന്നുമാണ് എല്‍.ഡി.എഫ് വിലയിരുത്തൽ. എല്ലാം നിയോജക മണ്ഡലങ്ങളിലും ഭൂരിപക്ഷം ലഭിക്കുമെന്ന് നേതൃത്വം പ്രതീക്ഷിക്കുന്നില്ല. എന്നാല്‍, മികച്ച വിജയം ഉറപ്പാണെന്ന വിശ്വാസത്തിലാണ് എൽ ഡി.എഫ്. തങ്ങളുടെ വോട്ടർമാരെല്ലാം ബൂത്തികളിലെത്തിയതായി എൽ.ഡി.എഫ് കേന്ദ്ര തെരഞ്ഞെടുപ്പ് കമ്മിറ്റി വിലയിരുത്തുകയും ചെയ്യുന്നു.

അതേസമയം എസ്.എൻ.ഡി.പി. വോട്ടുകൾ സി.പിഎമ്മിനെയും കാര്യങ്ങൾ ഗൗരവത്തിലെടുക്കണമെന്ന മുന്നറിയിപ്പാണ് നൽകുന്നതെന്ന് രാഷ്ട്രീയ നിരീക്ഷകർ പറയുന്നു.  തുടർച്ചയായി ഒരു വിഭാഗത്തെ പ്രീണിപ്പിക്കാൻ സി.പി.എം. ശ്രമിക്കുന്നത് മധ്യകേരളത്തിലടക്കം പ്രവർത്തകർ ബിജെപിയിലേക്കു മാറുന്നതിന് കാരണമായിട്ടുണ്ടെന്നാണ് വിലയിരുത്തൽ.