എംടി വാസുദേവന്‍ നായരുടെ വീട്ടിലെത്തി കേന്ദ്ര മന്ത്രി സുരേഷ് ഗോപി. മലയാളത്തിന്റെ കലാമഹത്വമാണ് എംടിയെന്നും മന്ത്രി

കോഴിക്കോട്: കേന്ദ്ര മന്ത്രി സുരേഷ് ഗോപി എംടി വാസുദേവന്‍ നായരുടെ വീട്ടിലെത്തി. ഇന്ന് രാവിലെയാണ് കോഴിക്കോട്ടെ എംടിയുടെ വീട്ടില്‍ സുരേഷ് ഗോപിയെത്തിയത്.

എംടിയുടെ കുടുംബാംഗങ്ങളുമായി സുരേഷ് ഗോപി സംസാരിച്ചു. എംടിയ്‌ക്കൊപ്പമുള്ള ഓര്‍മകളും  കുടുംബാംഗങ്ങളോടൊപ്പം പങ്കുവെച്ചു. 

എംടിയുടെ ഭാര്യ സരസ്വതി ടീച്ചറോടും മകള്‍ അശ്വതിയോടും 15 മിനുട്ടോളം സുരേഷ് ഗോപി സംസാരിച്ചു. വടക്കന്‍ വീരഗാഥയുടെ ഓര്‍മ്മകളും തിരക്കഥയുടെ പ്രസക്തിയും പങ്കുവെച്ച സുരേഷ് ഗോപി മലയാളത്തിന്റെ കലാമഹത്വമാണ് എംടി എന്ന് അനുസ്മരിക്കുകയും ചെയ്തു. 

വടക്കന്‍ വീരഗാഥ പോലുള്ള തിരക്കഥകളില്‍ എംടിയുടെ മാജിക് തന്നെ കാണാന്‍ സാധിക്കും. മനുഷ്യ മനസുകളുടെ ഉള്ളറകളിലേക്ക് കടന്നുചെന്ന് ആഴത്തില്‍ സ്പര്‍ശിച്ചിക്കുന്നതായിരുന്നു അദ്ദേഹത്തിന്റെ കഥാപാത്രങ്ങളെന്നും സുരേഷ് ഗോപി പറഞ്ഞു.