പായസക്കൂട്ട് ഉൾപ്പെടെയുള്ള പലതും എത്തിയില്ല; ഓണക്കിറ്റ് വിതരണം തുടക്കത്തിലേ പ്രതിസന്ധിയിൽ

സംസ്ഥാന സർക്കാരിന്റെ ഓണക്കിറ്റ് വിതരണം തുടക്കത്തിലേ പാളിയതായി റിപ്പോർട്ട്. പ്രഖ്യപനം പോലെ ഇന്ന് എല്ലായിടത്തും ഓണക്കിറ്റ് വിതരണം സാധ്യമായില്ല. തിരുവനന്തപുരത്ത് മാത്രമാണ് കിറ്റുകൾ വിതരണം ചെയ്തത്.

കശുവണ്ടി, പായസം മിക്‌സ് എന്നിവ എത്തിയിട്ടില്ല എന്നകാരണത്താലാണ് കിറ്റുകൾ തയ്യാറാക്കുന്നതിൽ പ്രതിസന്ധി നേരിട്ടത്. മറ്റ് ജില്ലകളിൽ നാളെ മുതൽ കിറ്റ് വിതരണം ചെയ്യാനാകുമെന്നാണ് പ്രതീക്ഷ.

തേയില( ശബരി)–-100 ഗ്രാം, ചെറുപയർ പരിപ്പ്‌–-250ഗ്രാം, സേമിയ പായസം മിക്‌സ്‌(മിൽമ)‌–-250 ഗ്രാം , നെയ്യ്‌( മിൽമ)–-50 മില്ലി, വെളിച്ചെണ്ണ (ശബരി) ‌–-അരലിറ്റർ, സാമ്പാർപ്പൊടി( ശബരി)–-100 ഗ്രാം, മുളക്‌ പൊടി( ശബരി)–-100ഗ്രാം, മഞ്ഞൾപ്പൊടി( ശബരി)–-100 ഗ്രാം, മല്ലിപ്പൊടി( ശബരി)–-100ഗ്രാം, ചെറുപയർ–-500ഗ്രാം, തുവരപ്പരിപ്പ്‌–-250ഗ്രാം, പൊടി ഉപ്പ്‌–ഒരുകിലോ, കശു വണ്ടി–-50 ഗ്രാം, തുണി സഞ്ചി–-1 എന്നീ 14 ഇനങ്ങളാണ്‌ കിറ്റിലുണ്ടാകുക.

കിറ്റിന് അർഹരായ മഞ്ഞ കാർഡുകാർക്ക് ഇന്നുമുതൽ റേഷൻ കടകളിൽ നിന്നും കിറ്റ് കൈപ്പറ്റാമെന്നായിരുന്നു അറിയിപ്പ് നൽകിയിരുന്നത്. എന്നാൽ മിൽമയിൽ നിന്നും ലഭ്യമാകുന്ന ചില ഉത്പന്നങ്ങളും, പായസം മിക്സുമൊന്നും കിറ്റിൽ ഇല്ലാത്തതിനാൽ വിതരണം മാറ്റിവയ്ക്കുകയായിരുന്നു. ഇന്ന് വൈകുന്നേരത്തോടെ സാധനങ്ങൾ എത്തുമെന്ന പ്രതീക്ഷയിലാണ് ഭക്ഷ്യവകുപ്പ്. 6.07 ലക്ഷം കിറ്റുകളാണ്‌ വിതരണം ചെയ്യുന്നത്‌.

റേഷൻ കാർഡുകാർ അതാത്‌ റേഷൻ കടകളിൽനിന്ന്‌ പരമാവധി കിറ്റുകൾ വാങ്ങണമെന്നും അതിനുള്ള ക്രമീകരണമാണ്‌ വരുത്തിയതെന്നും ഭക്ഷ്യവകുപ്പ്‌ അറിയിച്ചു. 27 നകം കിറ്റ്‌ വിതരണം പൂർത്തീകരിക്കും. ഞായർ,തിങ്കൾ ദിവസങ്ങളിൽ റേഷൻ കടകൾ പ്രവർത്തിക്കും. കിറ്റ്‌ വിതരണത്തിന്റെ സംസ്ഥാന ഉദ്‌ഘാടനം തമ്പാനൂരിൽ ബുധനാഴ്‌ച ഭക്ഷ്യമന്ത്രി ജി ആർ അനിൽ നിർവഹിച്ചു.