തദ്ദേശ തെരഞ്ഞെടുപ്പിൽ എൽഡിഎഫ് മുന്നണിയും സ്ഥാനാർഥിയും ജയിക്കുമെന്ന് പന്തയം. ഫലം വന്നപ്പോൾ മീശ പോയി

പത്തനംതിട്ട: തദ്ദേശ തെരഞ്ഞെടുപ്പിൽ സ്വന്തം മുന്നണിയും സ്ഥാനാർഥിയും ജയിക്കുമെന്ന് പന്തയം വച്ച എൽഡിഎഫ് പ്രവർത്തകന് ഫലം വന്നപ്പോൾ മീശ പോയി. 

പത്തനംതിട്ട മുനിസിപ്പാലിറ്റിയിലെ പ്രവർത്തകനായ ബാബു വർ​ഗീസിനാണ് പന്തയം വച്ച് മീശ നഷ്ടമായത്. മുനിസിപ്പാലിറ്റിയിൽ എൽഡിഎഫിന് അധികാരം കിട്ടിയില്ലെങ്കിൽ മീശ വടിക്കുമെന്നായിരുന്നു ബാബു വർ​ഗീസ് പന്തയം വച്ചത്.

എന്നാൽ പത്തനംതിട്ട മുനിസിപ്പാലിറ്റിയിൽ 17 സീറ്റുകൾ നേടി യുഡിഎഫ് അധികാരത്തിലെത്തുകയായിരുന്നു. 

12 സീറ്റുകളാണ് എൽഡിഎഫിന് നേടാനായത്. ഇതോടെയാണ് ബാബു വാർ​ഗീസ് വാക്ക് പാലിച്ചത്. പന്തയം വച്ച യുഡിഎഫ് പ്രവർത്തകരുമായി നാട്ടിലെ ഒരു കടയ്ക്ക് മുന്നിലെത്തി കസേരയിൽ ഇരിപ്പുറപ്പിച്ചു. തുടർന്ന് ബാർബർ മീശ വടിക്കുകയായിരുന്നു.

സംഭവത്തിന്റെ ദൃശ്യങ്ങൾ പന്തയത്തിൽ വിജയിച്ചവർ തന്നെ മൊബൈലിൽ പകർത്തുകയും ചെയ്തു.