പത്തനംതിട്ട ഓമല്ലൂരില്‍ അച്ചന്‍കോവിലാറ്റില്‍ കുളിക്കാനിറങ്ങിയ രണ്ട് വിദ്യാര്‍ത്ഥികള്‍ ഒഴുക്കില്‍പ്പെട്ട് മുങ്ങി മരിച്ചു

പത്തനംതിട്ട: പത്തനംതിട്ട ഓമല്ലൂരില്‍ അച്ചന്‍കോവിലാറ്റില്‍ കുളിക്കാനിറങ്ങിയ രണ്ട് വിദ്യാര്‍ത്ഥികള്‍ ഒഴുക്കില്‍പ്പെട്ട് മുങ്ങി മരിച്ചു. പത്തനംതിട്ട ഓമല്ലൂര്‍ ആര്യ ഭാരതി സ്‌കൂളിലെ പത്താം ക്ലാസ് വിദ്യാര്‍ത്ഥികളായ ശരണ്‍, ഏബല്‍ എന്നീവരാണ് മരിച്ചത്. 

ട്യൂഷന്‍ സെന്റര്‍ സംഘടിപ്പിച്ച കായിക പരിപാടിക്ക് ശേഷം അച്ചന്‍കോവിലാറ്റില്‍ കുളിക്കാനിറങ്ങിയപ്പോഴാണ് വിദ്യാര്‍ത്ഥികള്‍ ഒഴുക്കില്‍പ്പെട്ടത്. ഉച്ചയ്ക്ക് മൂന്നു മണിയോടെ ആയിരുന്നു അപകടം  നടന്നത്.

 5 വിദ്യാര്‍ത്ഥികളാണ് ആറ്റില്‍ ഇറങ്ങിയത്. ഇതില്‍ ശരണും ഏബലും ഒഴുക്കില്‍പ്പെട്ട ഉടന്‍ തന്നെ മറ്റ് വിദ്യാര്‍ത്ഥികള്‍ നാട്ടുകാരെയും പോലീസിനെയും വിവരമറിയിച്ചു. പത്തനംതിട്ടയില്‍ നിന്ന് ഫയര്‍ ഫോഴ്‌സ് സ്‌ക്യൂബ ടീമെത്തി വിദ്യാര്‍ത്ഥികളെ കണ്ടെത്തിയെങ്കിലും ജീവന്‍ രക്ഷിക്കാനായില്ല. 

ശരണ്‍ ഇലവുന്തിട്ട സ്വദേശിയും ഏബല്‍ ചീക്കനാല്‍ സ്വദേശിയുമാണ്. മൃതദേഹങ്ങള്‍ പോസ്റ്റ്മോര്‍ട്ടം നടപടികള്‍ക്കായി പത്തനംതിട്ട ജനറല്‍ ആശുപത്രി മോര്‍ച്ചറിയിലേക്ക് മാറ്റി.