ഇടുക്കിയിൽ മുതിർന്ന സിപിഎം നേതാവിനെ മകൻ മർദ്ദിച്ചു. ടേബിൾ ഫാനും ഫ്ലാസ്കും ഉപയോഗിച്ച് മർദ്ദിക്കുകയായിരുന്നു. നേതാവിന്റെ നില ഗുരുതരം. മകൻ അറസ്റ്റിൽ

തൊടുപുഴ: ഇടുക്കിയിൽ മുതിർന്ന സിപിഎം നേതാവിനെ മകൻ ക്രൂരമായി മർദ്ദിച്ചു. രാജകുമാരി കജനാപ്പാറ സ്വദേശി 84 വയസുകാരൻ ആണ്ടവർക്കാണ് ഗുരുതരമായി പരിക്കേറ്റത്. 

സംഭവത്തിൽ മകൻ മണികണ്ഠനെ പൊലീസ് കസ്റ്റഡിയിൽ എടുത്തു. ഞായറാഴ്ച രാത്രി 11 ഓടെയാണ് സംഭവം.

പിതാവുമായി വാക്കുതർക്കത്തിൽ ഏർപ്പെട്ട മണികണ്ഠൻ, ടേബിൾ ഫാനും ഫ്ലാസ്കും ഉപയോഗിച്ച് ആണ്ടവരെ മർദ്ദിയ്ക്കുകയായിരുന്നു. 

സംഭവ സമയം വീട്ടിൽ മറ്റാരും ഇല്ലായിരുന്നു. ആണ്ടവരുടെ തലയിലും മുഖത്തും അടിയേറ്റു. സാരമായി പരിക്കേറ്റ ആണ്ടവരെ ആദ്യം തേനി മെഡിക്കൽ കോളജിലും തുടർന്ന് മധുര മെഡിക്കൽ കോളജിലും പ്രവേശിപ്പിച്ചു. 

ഇയാളുടെ നില ഗുരുതരമായി തുടരുകയാണ്. മണികണ്ഠനെ രാജാക്കാട് പൊലിസാണ് കസ്റ്റഡിയിൽ എടുത്തത്. രാജകുമാരി ഗ്രാമപഞ്ചായത്ത്‌ മുൻ വൈസ് പ്രസിഡന്റും ദീർഘ കാലം സിപിഎം രാജാക്കാട് ഏരിയ കമ്മിറ്റി അംഗവുമായി പ്രവർത്തിച്ച ആളാണ് ആണ്ടവർ.