സംസ്ഥാനത്ത് മൂന്ന് ഓക്‌സിജന്‍ പ്ലാന്റുകള്‍ കൂടി അനുവദിച്ചതായി കേന്ദ്ര ആരോഗ്യ മന്ത്രാലയം

തിരുവനന്തപുരം: സംസ്ഥാനത്ത് മൂന്ന് ഓക്‌സിജൻ പ്ലാന്റുകൾ കൂടി അനുവദിച്ചതായി കേന്ദ്ര ആരോഗ്യ മന്ത്രാലയം. കോട്ടയം, കൊല്ലം, ആലപ്പുഴ ജില്ലകളിലാണ് പുതിയ പ്ലാന്റ് അനുവദിച്ചിരിക്കുന്നത്. കോട്ടയത്ത് പാലാ ജനറൽ ആശുപത്രിയിലും കൊല്ലം പാതിരപ്പള്ളി ആശുപത്രിയിലും ആലപ്പുഴ ബീച്ച്‌ ആശുപത്രിയിലുമാണ് പുതിയ പ്ലാന്റുകൾ അനുവദിച്ചിരിക്കുന്നത്. നേരത്തെ മൂന്ന് പ്ലാന്റുകൾ അനുവദിച്ചിരുന്നു.

പിഎം കെയർ ഫണ്ടിൽ നിന്നാണ് പുതിയ പ്ലാന്റുകൾക്കുള്ള തുക അനുവദിച്ചിരിക്കുന്നത്. പ്ലാന്റ് സ്ഥാപിക്കുന്നതിനുള്ള സ്ഥലവും സൗകര്യങ്ങളും കണ്ടെത്തി ഉടൻ സ്ഥാപിക്കണം. ഈ മാസം 31നകം പ്ലാന്റ് കമ്മീഷൻ ചെയ്യണമെന്നും കേന്ദ്രം ആവശ്യപ്പെടുന്നു.

കോവിഡ് രണ്ടാം തരംഗത്തിൽ സംസ്ഥാനത്ത് ഓക്‌സിജൻ ആവശ്യമുള്ള രോഗികളുടെ എണ്ണം കുതിച്ചുയരുകയാണ്. കാസർഗോഡ്, വയനാട് ജില്ലകളിൽ സ്വകാര്യ ആശുപത്രികളിൽ ഓക്‌സിജൻ ക്ഷാമം റിപ്പോർട്ട് ചെയ്തിട്ടുണ്ട്. കല്പറ്റ ഫാത്തിമ ആശുപത്രിയിലാണ് പുതുതായി ഓക്‌സിജൻ ക്ഷാമം റിപ്പോർട്ട് ചെയ്തിരിക്കുന്നത്. സംസ്ഥാനം ഉത്പാദിപ്പിക്കുന്ന ഓക്‌സിജൻ അയൽ സംസ്ഥാനങ്ങളുമായി പങ്കുവയ്ക്കാൻ ബുദ്ധിമുട്ടുണ്ടെന്ന് കാണിച്ച്‌ മുഖ്യമന്ത്രി പ്രധാനമന്ത്രിക്ക് കത്തയക്കുകയും ചെയ്തിരുന്നു.