ഇന്ത്യ ഇൻ ബഹ്‌റൈൻ ഫെസ്റ്റിവലിൽ സജീവ സാന്നിധ്യമായി വോയിസ് ഓഫ് ട്രിവാൻഡ്രം

മനാമ: ഇന്ത്യ–ബഹ്‌റൈൻ നയതന്ത്ര ബന്ധങ്ങളുടെ 55-ാം വാർഷികാഘോഷത്തിന്റെ ഭാഗമായി ഇന്ത്യൻ എംബസി, ബഹ്‌റൈൻ സംഘടിപ്പിച്ച “ഇന്ത്യ ഇൻ ബഹ്‌റൈൻ ഫെസ്റ്റിവൽ ” എന്ന പരിപാടിയിൽ വോയിസ് ഓഫ് ട്രിവാൻഡ്രം – ബഹ്‌റൈൻ ഫോറം (VOT)  ശ്രദ്ധേയമായ സാന്നിധ്യം രേഖപ്പെടുത്തി.

ഫെബ്രുവരി 6 വെള്ളിയാഴ്ച വൈകുന്നേരം ലുലു ദാന മാൾ ഔട്ട്‌ഡോർ ഏരിയയിൽ നടന്ന ഫെസ്റ്റിവലിൽ VOT-യുടെ പ്രത്യേക സ്റ്റാൾ ഒരുക്കിയിരുന്നു.

 ബഹ്‌റൈനിലെ തിരുവനന്തപുരം പ്രവാസികളുടെ സാമൂഹിക–സാംസ്കാരിക സംഘടനയായ VOT, ഇന്ത്യയുടെ സമ്പന്നമായ പൈതൃകവും അനന്തപുരിയുടെ തനിമയും ഒരുമിച്ച് പൊതുജനങ്ങൾക്ക് പരിചയപ്പെടുത്തുന്ന വേദിയാക്കി ഈ അവസരം മാറ്റുകയായിരുന്നു.

സ്റ്റാളിലൂടെ തിരുവനന്തപുരം ജില്ലയുടെ തനതായ രുചി  വൈവിധ്യങ്ങൾ സന്ദർശകർക്ക് അനുഭവിക്കുവാനുള്ള അവസരം VOT ഒരുക്കി. നാടൻ വിഭവങ്ങൾ സൗജന്യമായി വിതരണം ചെയ്തതിലൂടെ നിരവധി സന്ദർശകരുടെ പ്രശംസയും ശ്രദ്ധയും സംഘടന നേടി.

ഇന്ത്യൻ എംബസിയുടെ നേതൃത്വത്തിൽ സംഘടിപ്പിച്ച ഫെസ്റ്റിവലിൽ, VOT ജോയിന്റ് സെക്രട്ടറി പ്രദീപ്‌ മാധവന്റെ നേതൃത്വത്തിൽ അംഗങ്ങൾ അവതരിപ്പിച്ച തെയ്യം, കാണികളിൽ ഗംഭീരമായ ആവേശം സൃഷ്ടിക്കുകയും കുമാരി.ജാനു പ്രശോഭിന്റെ പ്രകടനം,ഫെസ്റ്റിവലിലെ അവിസ്മരണീയമായ മുഹൂർത്തങ്ങളിൽ ഒന്നായി മാറുകയും ചെയ്തു.

ഇത്തരത്തിലുള്ള പരിപാടികൾ പ്രവാസി സമൂഹത്തിനിടയിൽ സൗഹൃദവും സാമൂഹിക ബന്ധങ്ങളും കൂടുതൽ ശക്തിപ്പെടുത്തുന്നതിന് സഹായകരമാണെന്ന് VOT പ്രസിഡന്റ്‌ സിബി കെ തോമസും സെക്രട്ടറി വിനീഷ് എസും എക്സിക്യൂട്ടീവ് കമ്മിറ്റിയെ പ്രതിനിധീകരിച്ച് അഭിപ്രായപ്പെട്ടു.