കുവൈത്ത് സാമൂഹിക കാര്യ മന്ത്രാലയത്തിന്റെ പേരില്‍ വ്യാജ ഇന്‍സ്റ്റഗ്രാം അക്കൗണ്ട്

കുവൈത്ത് സിറ്റി: സാമൂഹികകാര്യ മന്ത്രാലയം ഇന്‍സ്റ്റാഗ്രാം പ്ലാറ്റ്ഫോമില്‍ mosa1.kw എന്ന പേരില്‍ ഒരു വ്യാജ അക്കൗണ്ട് കണ്ടെത്തിയതായി അറിയിച്ചു. ഈ വ്യാജ അക്കൗണ്ട് മന്ത്രാലയത്തിന്റെ പേരില്‍ കടം തിരിച്ചടയ്ക്കാന്‍ സഹായിക്കുന്ന ക്യാമ്പയിന്‍ ഉപയോഗിച്ച് പണം ശേഖരിക്കുകയും സംഭാവന നല്‍കുന്നവരുടെ അക്കൗണ്ടുകള്‍ ഹാക്ക് ചെയ്യുകയും ചെയ്യുന്നുവെന്നാണ് കണ്ടെത്തല്‍. 

ഇത്തരം വ്യാജ അക്കൗണ്ടുകളെക്കുറിച്ച് ജാഗ്രത പാലിക്കണമെന്ന് മന്ത്രാലയം ആവശ്യപ്പെട്ടു. mosa1_kw എന്ന പേരിലുള്ള മന്ത്രാലയത്തിന്റെ ഔദ്യോഗികമായി വെരിഫൈ ചെയ്ത ഇന്‍സ്റ്റാഗ്രാം അക്കൗണ്ടും കടം തിരിച്ചടയ്ക്കാന്‍ സഹായിക്കുന്ന കാമ്പയിനിന്റെ ഔദ്യോഗിക വെബ്സൈറ്റും മാത്രം ഉപയോഗിക്കേണ്ടതിന്റെ പ്രാധാന്യം മന്ത്രാലയം ചൂണ്ടിക്കാട്ടി.

വ്യാജ അക്കൗണ്ടിന് പിന്നിലുള്ളവര്‍ക്കെതിരെ ആവശ്യമായ എല്ലാ നിയമനടപടികളും സ്വീകരിച്ചിട്ടുണ്ടെന്ന് മന്ത്രാലയം വ്യക്തമാക്കി.